കേരളത്തില്‍ ഭരണം ഇല്ലാത്തതിന്റെ അടിയാണെങ്കില്‍ രാജസ്ഥാനില്‍ ഭരണം കയ്യാളാനുള്ള അടിയാണ്. മുഖ്യമന്ത്രി അശോക് ഗെലോട്ടിനെ ഡല്‍ഹിയില്‍ കെട്ടിയെടുത്ത് കോണ്‍ഗ്രസ് അധ്യക്ഷനാക്കാനായിരുന്നു ശ്രമം. അതിനെ ഗെലോട്ട് തന്നെ പൊളിച്ചു. ഇപ്പോഴിതാ സച്ചിന്‍ പൈലറ്റിനെതിരെ പ്രതിപക്ഷം പോലും ആരോപിക്കാത്ത വെളിപ്പെടുത്തലുകളാണ് നടത്തിയത്. സച്ചിന്‍ പൈലറ്റ് വഞ്ചകനാണെന്നും സംസ്ഥാന സര്‍ക്കാരിനെ അട്ടിമറിക്കാന്‍ അദ്ദേഹവും ഏതാനും എംഎല്‍എമാരും ബിജെപിയില്‍നിന്നു 10 കോടി രൂപ വീതം വാങ്ങിയെന്നും രാജസ്ഥാന്‍ മുഖ്യമന്ത്രി അശോക് ഗെലോട്ട് ആരോപിച്ചു.

ഗെലോട്ടിനെ മുഖ്യമന്ത്രിസ്ഥാനത്തുനിന്നു മാറ്റുന്ന കാര്യത്തില്‍ ഉടനെ തീരുമാനം വേണമെന്നു സച്ചിന്‍ പക്ഷം ഹൈക്കമാന്‍ഡിനോട് ആവശ്യപ്പെട്ടിരിക്കെയാണ് ഗുരുതരമായ ആരോപണവുമായി ഗെലോട്ട് രംഗത്തെത്തിയത്. രാഹുല്‍ ഗാന്ധിക്കും പ്രിയങ്ക ഗാന്ധിക്കുമൊപ്പം മധ്യപ്രദേശില്‍ ഭാരത് ജോഡോ യാത്രയില്‍ പങ്കെടുക്കുന്ന സച്ചിന്‍ ആരോപണത്തോടു പ്രതികരിക്കാന്‍ തയാറായില്ല.

എന്നാല്‍, യാത്രയുടെ ചിത്രങ്ങള്‍ ട്വിറ്ററിലൂടെ പങ്കുവച്ച സച്ചിന്‍, രാഹുലിനും പ്രിയങ്കയ്ക്കും ഒപ്പമുള്ള ഓരോ ചുവടും അനുകൂല മാറ്റമാണ് സൂചിപ്പിക്കുന്നതെന്നും അടിക്കുറിപ്പെഴുതി. തന്നെ മാറ്റി, വഞ്ചകനും 2020 ല്‍ സര്‍ക്കാരിനെ അട്ടിമറിക്കാന്‍ ശ്രമിച്ചവനുമായ സച്ചിനെ മുഖ്യമന്ത്രിയാക്കാനാവില്ലെന്ന് ഒരു ടിവി ചാനലിനു നല്‍കിയ അഭിമുഖത്തില്‍ ഗെലോട്ട് പറഞ്ഞു. അഭിമുഖത്തില്‍ 6 തവണയാണ് സച്ചിനെ വഞ്ചകനെന്ന് ഗെലോട്ട് വിളിച്ചത്.

സച്ചിന്റെ അട്ടിമറി നീക്കത്തിനു പിന്നില്‍ ആഭ്യന്തര മന്ത്രി അമിത് ഷാ ഉള്‍പ്പെട്ടിട്ടുണ്ട്. സച്ചിനൊപ്പമുള്ള വിമത എംഎല്‍എമാര്‍ ഒരു മാസം ഹരിയാനയിലെ ഗുരുഗ്രാമില്‍ ഹോട്ടലില്‍ താമസിച്ചപ്പോള്‍ കേന്ദ്രമന്ത്രി ധര്‍മേന്ദ്ര പ്രധാന്‍ പലതവണ അവരെ സന്ദര്‍ശിച്ചിരുന്നു. സച്ചിന്‍ ഉള്‍പ്പെടെ ഓരോ എംഎല്‍എയ്ക്കും 10 കോടി രൂപ വീതം നല്‍കിയെന്നതിനു തെളിവുണ്ട് ഗെലോട്ട് അവകാശപ്പെട്ടു. എന്നാല്‍, എംഎല്‍എമാര്‍ക്കു പാര്‍ട്ടി പണം നല്‍കിയിട്ടില്ലെന്ന് രാജസ്ഥാന്‍ ബിജെപി അധ്യക്ഷന്‍ സതീഷ് പുനിയ പറഞ്ഞു.

അടുത്ത വര്‍ഷത്തെ നിയമസഭാ തിരഞ്ഞെടുപ്പില്‍ പാര്‍ട്ടിക്കു ഗുണം ചെയ്യുമെന്നുണ്ടെങ്കില്‍ സച്ചിന്‍ ഒഴികെ 102 എംഎല്‍എമാരില്‍ ആരെ വേണമെങ്കിലും മുഖ്യമന്ത്രിയായി കോണ്‍ഗ്രസ് നേതൃത്വത്തിനു തീരുമാനിക്കാമെന്ന് ഗെലോട്ട് പറഞ്ഞു. അട്ടിമറി ശ്രമം നടത്തിയ, വഞ്ചകനെന്നു വിളിക്കപ്പെടുന്നയാളെ എംഎല്‍എമാര്‍ അംഗീകരിക്കില്ല. സച്ചിന്‍ എംഎല്‍എമാരോടു മാപ്പു പറഞ്ഞിരുന്നെങ്കില്‍ സ്ഥിതി മാറുമായിരുന്നു.

സച്ചിന്‍ മാപ്പു പറയാഞ്ഞതിനാലാണ് താന്‍ സോണിയ ഗാന്ധിയോടു മാപ്പു പറയേണ്ടി വന്നത് കോണ്‍ഗ്രസ് നിയമസഭാ കക്ഷി യോഗം നടത്താനുള്ള പാര്‍ട്ടി നേതൃത്വത്തിന്റെ ശ്രമം തന്റെ പക്ഷത്തുള്ള എംഎല്‍എമാര്‍ തടസ്സപ്പെടുത്തിയതിന് മാപ്പു പറഞ്ഞതു സൂചിപ്പിച്ച് മുഖ്യമന്ത്രി വിശദീകരിച്ചു. എംഎല്‍എമാരുടെ നടപടി സച്ചിനെതിരെയുള്ള നീക്കമായിരുന്നുവെന്നും ഗെലോട്ട് പറഞ്ഞു. ഭാരത് ജോഡോ യാത്ര അടുത്ത മാസം അഞ്ചിനാണു രാജസ്ഥാനില്‍ പ്രവേശിക്കുന്നത്. അതിനു മുന്‍പ് ഗെലോട്ടിനെ മാറ്റുന്ന കാര്യത്തില്‍ തീരുമാനമുണ്ടാകണമെന്ന് സച്ചിന്‍ പക്ഷ നേതാക്കള്‍ ഹൈക്കമാന്‍ഡിനോട് ആവശ്യപ്പെട്ടിരുന്നു.

അതേസമയം പരിഹരിക്കാവുന്ന പ്രശ്‌നങ്ങളേ രാജസ്ഥാന്‍ കോണ്‍ഗ്രസിലുള്ളൂവെന്ന് പാര്‍ട്ടി വക്താവ് ജയറാം രമേശ് പറഞ്ഞു. അശോക് ഗലോട്ട് അനുഭവ സമ്പത്തുള്ള നേതാവാണെന്നും സച്ചിന്‍ പൈലറ്റുമായി അഭിപ്രായ ഭിന്നതയുണ്ടെന്ന് കരുതുന്നില്ലെന്നും ജയറാം രമേശ് പറഞ്ഞു. അതേസമയം പാര്‍ട്ടി അധ്യക്ഷന്‍ മല്ലികാര്‍ജ്ജുന്‍ ഖര്‍ഗെയോ മറ്റ് നേതാക്കളോ വിഷയത്തില്‍ പ്രതികരിച്ചിട്ടില്ല. മുഖ്യമന്ത്രി സ്ഥാനം വിട്ടുകൊടുക്കില്ലെന്ന് ഗലോട്ടും, അവസാന ഒരു വര്‍ഷം പദവി വേണമെന്ന നിലപാടില്‍ സച്ചിന്‍ പൈലറ്റും നില്‍ക്കുകയാണ്.

അശോക് ഗെലോട്ടിനാണ് ഗുജറാത്ത് തെരഞ്ഞെടുപ്പിന്റെ ചുമതലയെന്ന് ഓര്‍മ്മിപ്പിച്ച സച്ചിന്‍ പൈലറ്റ്, അവിടെ തെരഞ്ഞെടുപ്പ് വിജയത്തിനായി ശ്രമിക്കുകയാണ് ഗെലോട്ട് ചെയ്യേണ്ടതെന്നും പറഞ്ഞു. ആര്‍ക്കെതിരെയും ചെളിവാരിയെറിയാനില്ല. തന്നെ ഉപദ്രവിക്കാന്‍ ആരാണ് ഉപദേശം നല്‍കുന്നതെന്ന് മനസിലാകുന്നില്ലെന്നും സച്ചിന്‍ പൈലറ്റ് പ്രതികരിച്ചു.