ഫ്‌ലാറ്റുടമക്ക് ഒത്താശ ചെയ്ത് 1.33 കോടി രൂപയുടെ നികുതി വെട്ടിപ്പ് നടത്തി സര്‍ക്കാരിന് നഷ്ടം വരുത്തിയെന്ന ഹര്‍ജിയില്‍ അസി.കമ്മീഷണര്‍ക്കും ഫ്‌ലാറ്റുടമക്കുമെതിരെ കോടതി നിര്‍ദ്ദേശപ്രകാരം വിജിലന്‍സ് എസ്.പി കേസെടുത്തു.


എഫ് ഐ ആര്‍ തിരുവനന്തപുരം വിജിലന്‍സ് സ്‌പെപെഷ്യല്‍ കോടതി ജഡ്ജി ജി.ഗോപകുമാര്‍ മുമ്പാകെ സമര്‍പ്പിച്ചു. നികുതി വകുപ്പ് അസി.കമ്മീഷണര്‍ ശ്രീബിന്ദു , കവഡിയാര്‍ ഹീരാ കണ്‍സ്ട്രക്ഷന്‍സ് കമ്പനി എം.ഡി ഹീരാ ബാബു എന്ന അബ്ദുള്‍ റഷീദ് എന്നിവരെ ഒന്നും രണ്ടും പ്രതികളാക്കിയാണ് കേസെടുത്തത്. അഡ്വ.നെയ്യാറ്റിന്‍കര. പി.നാഗരാജ് സമര്‍പ്പിച്ച ഹര്‍ജിയിലാണ് കേസെടുക്കാന്‍ കോടതി ഉത്തരവിട്ടത്.


ഒന്നാം പ്രതി ചരക്ക് സേവന നികുതി ഓഫീസിലെ വര്‍ക്‌സ് കോണ്‍ട്രാക്റ്റ് വിഭാഗത്തില്‍ 2014 മെയ് 30 മുതല്‍ 2015 ജൂണ്‍ 20 വരെ അസി.കമ്മീഷണര്‍ തസ്തികയില്‍ ജോലി നോക്കി വരവേ 2012-13 സാമ്പത്തിക വര്‍ഷത്തെ രണ്ടാം പ്രതിയുടെ നികുതി അസസ്‌മെമെന്റ് ഓഫീസില്‍ വച്ച് ഒന്നാം പ്രതി നടത്തി 2014 ഡിസംബര്‍ 6 ന് ഉത്തരവ് പുറപ്പെടുവിച്ചതില്‍ രണ്ടാം പ്രതിയുടെ വിവിധ സബ് കോണ്‍ട്രാക്റ്റര്‍മാര്‍ ചെയ്ത മൊത്തം കരാര്‍ ജോലികള്‍ക്ക് ഫോറം 20 എച്ച് സര്‍ട്ടിഫിക്കറ്റ് പ്രകാരം അനര്‍ഹമായ നികുതി ഇളവ് രണ്ടാം പ്രതിക്ക് അനുവദിച്ച് ഒന്നാം പ്രതി പൊതു സേവക എന്ന നിലയില്‍ തന്നില്‍ നിക്ഷിപ്തമായിട്ടുള്ള കര്‍ത്തവ്യത്തില്‍ കുറ്റകരമായ വീഴ്ച വരുത്തി രണ്ടാം പ്രതിക്ക് അനര്‍ഹമായി അന്യായ ലാഭം ഉണ്ടാക്കുന്നതിന് ഇടവരുത്തി സര്‍ക്കാരിന് നിയമപരമായി ലഭിക്കേണ്ട 1,33 , 31 ,691 രൂപ നഷ്ടം വരുത്തി പ്രതികള്‍ അഴിമതി നിരോധന നിയമത്തിലെ 13 (2) , 13 (1) (ഡി) (പൊതുസേവകന്‍ തന്റെ ഔദ്യോഗിക പദവി ദുരുപയോഗം ചെയ്ത് തനിക്കോ മൂന്നാം കക്ഷിക്കോ അനര്‍ഹമായ സാമ്പത്തിക നേട്ടം ഉണ്ടാക്കിക്കൊടുക്കല്‍) പ്രകാരമുള്ള കുറ്റം ചെയ്തുവെന്നാണ് കേസ്.