ആശ്രമം കത്തിച്ച സംഭവവുമായി ബന്ധപ്പെട്ട വിവാദം പുകയുന്നതിനിടെ സ്വാമി സന്ദീപാനന്ദഗിരിയും ബിജെപി സംസ്ഥാന പ്രസിഡന്റ് കെ സുരേന്ദ്രനും തമ്മിലുള്ള വാക്പോര് തുടരുന്നു. സോഷ്യൽമീഡിയയിൽ രണ്ടും പേരും തമ്മിൽ പരസ്പരം പരിഹസിക്കുകയും കുറ്റപ്പെടുത്തുകയുമാണ്. ഇപ്പോഴിതാ സുരേന്ദ്രന്റെ കൂടെയുള്ള ഒരു ഫോട്ടോ പോസ്റ്റ് ചെയ്തുകൊണ്ടാണ് സന്ദീപാനന്ദഗിരി അടുത്ത പോരിന് തുടക്കമിട്ടിരിക്കുന്നത്. എന്നാൽ തൊട്ട് പിന്നാലെ മറുപടിയുമായി സുരേന്ദ്രനും എത്തിയിട്ടുണ്ട്. കഴിഞ്ഞ ദിവസം തിരുവനന്തപുരം ഹയാത്ത് റീജന്‍സി ഹോട്ടലിന്റെ ഉദ്ഘാടനത്തിനിടെ പകര്‍ത്തിയ ചിത്രമാണ് അദ്ദേഹം സാമൂഹികമാധ്യമത്തില്‍ പങ്കുവച്ചത്.

അതേസമയം കെ സുരേന്ദ്രനൊപ്പമുള്ള ചിത്രം പങ്കുവെച്ചതിനൊപ്പം നാലുവരി ശ്ലോകവും കുറിച്ചിട്ടുണ്ട്. ''വിചിത്രവിജയം' നാടകത്തിലെ ഒരു ശ്ലോകമാണ് സന്ദീപാനന്ദഗിരി പങ്കുവെച്ചത്."സ്നേഹിക്കയുണ്ണീ നീ നിന്നെ ദ്രോഹിക്കുന്ന ജനത്തെയും..ദ്രോഹം ദ്വേഷത്തെ നീക്കിടാ സ്നേഹം നീക്കിടുമോർക്ക നീ!'' എന്ന ശ്ലോകമാണ് പങ്കിട്ടത്.

എന്നാൽ ഫോട്ടോ സോഷ്യൽമീഡിയയിൽ വൈറലായതിന് പിന്നാലെ സുരേന്ദ്രൻ ഫേസ്ബുക്ക് പോസ്റ്റുമായെത്തി. ഒരു പൊതു ചടങ്ങിനിടെ ഒരാൾ ഒരു സെൽഫി എടുത്തോട്ടെ എന്നു ചോദിക്കുന്നു. സമ്മതിക്കുന്നു. പിന്നീട് ആ സെൽഫി അയാൾ എങ്ങനെ ഉപയോഗിക്കുന്നു എന്നുള്ളത് അയാളുടെ മാത്രം കാര്യം. ജഡിലോമുണ്ഡീ ലുഞ്ജിതകേശാ.....ഉദരനിമിത്തം ബഹുകൃതവേഷം. എന്നാണ് അദ്ദേഹം ഫേസ്ബുക്ക് പോസ്റ്റിനൊപ്പം കുറിച്ചത്.