രോഗമുള്ളവർ മാസത്തിലൊരിക്കലെങ്കിലും ഡോക്ടറെ കണ്ട് രോഗങ്ങൾ നിയന്ത്രണവിധേയമെന്ന് ഉറപ്പ് വരുത്തണം; ഡോക്ടറുടെ നിർദേശപ്രകാരമല്ലാതെ ജീവിതശൈലിരോഗങ്ങൾക്ക് തടയിടാനുള്ള മരുന്നുകൾ നിർത്തുന്നതിന് വലിയ പ്രത്യാഘാതങ്ങൾ ഉണ്ടാകാം; യഥാസമയം രോഗപരിശോധനകളും ശീലമാക്കുക; ഒരൽപം ശ്രദ്ധയുണ്ടെങ്കിൽ ജീവിതശൈലി രോഗങ്ങളെ അകറ്റി നിർത്താം; നിർണായകമായ കുറിപ്പ് പങ്കു വച്ച് ഷിംന അസീസ്
രോഗമുള്ളവർ മാസത്തിലൊരിക്കലെങ്കിലും ഡോക്ടറെ കണ്ട് രോഗങ്ങൾ നിയന്ത്രണവിധേയമെന്ന് ഉറപ്പ് വരുത്തണം. ഡോക്ടറുടെ നിർദേശപ്രകാരമല്ലാതെ ജീവിതശൈലിരോഗങ്ങൾക്ക് തടയിടാനുള്ള മരുന്നുകൾ നിർത്തുന്നതിന് വലിയ പ്രത്യാഘാതങ്ങൾ ഉണ്ടാകാം. യഥാസമയം രോഗപരിശോധനകളും ശീലമാക്കുക. മദ്യപാനവും പുകവലിയും മറ്റ് ലഹരിപദാർത്ഥങ്ങളും ആരോഗ്യത്തെ തീർച്ചയായും പ്രതികൂലമായി ബാധിക്കും.ഒരൽപം ശ്രദ്ധയുണ്ടെങ്കിൽ ജീവിതശൈലി രോഗങ്ങളെ അകറ്റി നിർത്താം, അല്ലെങ്കിൽ നിയന്ത്രണാധീനമാക്കിയെടുക്കാം. നിർണായകമായ കുറിപ്പ് പങ്കു വച്ച് ഷിംന അസീസ്. ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;
"പുള്ളിക്ക് എപ്പോഴും ബിപി കൂടുതലാണ്, നമ്മൾ പറഞ്ഞാൽ അംഗീകരിക്കില്ല." സാമാന്യം ഭേദപ്പെട്ട രീതിയിൽ അധികരിച്ച് നിൽക്കുന്ന ബിപി കണ്ട് കണ്ണു തള്ളിയ എന്നോട് കൂളായി ആ അമ്മ പറഞ്ഞു. പങ്കാളി ഗുളിക കഴിക്കുന്നതിൽ വീഴ്ച വരുത്താറുണ്ടോ എന്ന് കൂടി ചോദിക്കാൻ തുനിഞ്ഞതാണ്. പിന്നെ, മെഡിക്കൽ ക്യാംപിൽ ആളൊരുപാട് ക്യൂവിൽ ഉള്ളത് കൊണ്ട് 'ഗുളിക മുടക്കരുത്, ഉപേക്ഷ വിചാരിക്കാതെ ഉടനെ തന്നെ ഒരു ഫിസിഷ്യനെ കാണണം' എന്ന് മാത്രം പറഞ്ഞ് നിർത്തി. വീണ്ടും പലരും സമാനാവസ്ഥയിൽ മുന്നിൽ വന്നിരുന്നു. 'എന്നും ഗുളിക കഴിക്കേണ്ടുന്ന രോഗങ്ങൾ' എന്ന അറുബോറൻ കാറ്റഗറിയിൽ പെടുന്ന ഇവയോട് മനുഷ്യർക്ക് ഒരു നിസംഗത ഉള്ളത് പോലെ...
എന്നാൽ നിശബ്ദകൊലയാളികളായ ഇവയിൽ മിക്കതും വലിയ നാശമാണ് നമ്മുടെ ജീവിതങ്ങളിൽ വിതയ്ക്കുന്നത്. ജീവിതശൈലിരോഗങ്ങൾ അനുദിനം വർധിക്കുകയാണ്. പ്രമേഹവും രക്താതിമർദ്ദവും ഹൃദ്രോഗവും പക്ഷാഘാതവും തുടങ്ങി കാൻസർ വരെ സകലതിൻ്റെയും ഗ്രാഫ് മേലോട്ട് തന്നെ. തെറ്റായ ഭക്ഷണശീലങ്ങളും വ്യായാമക്കുറവും മാനസികസംഘർഷങ്ങളും എന്ന് വേണ്ട, ആധുനിക ജീവിതത്തിൻ്റെ ഭാഗമായ ശീലങ്ങളിൽ പലതും ഈ രോഗങ്ങൾക്ക് കുട പിടിക്കുന്നവയാണ്.
ഈ രോഗങ്ങൾ നമുക്ക് വരാതിരിക്കാൻ നമ്മുടെ ശീലങ്ങളിൽ കാതലായ മാറ്റങ്ങൾ വരുത്തേണ്ടതുണ്ട്. നേരത്തിന് ആവശ്യത്തിന് പോഷകങ്ങളുള്ള ആഹാരം ആവശ്യത്തിന് മാത്രം കഴിച്ചും, ആഴ്ചയിൽ രണ്ടര മണിക്കൂറെങ്കിലും വ്യായാമം ചെയ്തും 6-8 മണിക്കൂർ ഉറങ്ങിയും മറ്റ് സമ്മർദങ്ങൾ ഒഴിവാക്കിയും നമ്മൾ ശരീരവുമായി കൂട്ടാവണം.
രോഗമുള്ളവർ മാസത്തിലൊരിക്കലെങ്കിലും ഡോക്ടറെ കണ്ട് രോഗങ്ങൾ നിയന്ത്രണവിധേയമെന്ന് ഉറപ്പ് വരുത്തണം. ഡോക്ടറുടെ നിർദേശപ്രകാരമല്ലാതെ ജീവിതശൈലിരോഗങ്ങൾക്ക് തടയിടാനുള്ള മരുന്നുകൾ നിർത്തുന്നതിന് വലിയ പ്രത്യാഘാതങ്ങൾ ഉണ്ടാകാം. യഥാസമയം രോഗപരിശോധനകളും ശീലമാക്കുക. മദ്യപാനവും പുകവലിയും മറ്റ് ലഹരിപദാർത്ഥങ്ങളും ആരോഗ്യത്തെ തീർച്ചയായും പ്രതികൂലമായി ബാധിക്കും. ഒരൽപം ശ്രദ്ധയുണ്ടെങ്കിൽ ജീവിതശൈലി രോഗങ്ങളെ അകറ്റി നിർത്താം, അല്ലെങ്കിൽ നിയന്ത്രണാധീനമാക്കിയെടുക്കാം.
https://www.facebook.com/Malayalivartha
