ഹൈസ്‌കൂൾ അധ്യാപകനെ ഹയർസെക്കൻഡറി പ്രിൻസിപ്പലാക്കാൻ ഗസറ്റഡ് അധ്യാപികയെ സർവീസിൽനിന്ന് തരംതാഴ്ത്തിയ പൊതുവിദ്യാഭ്യാസ ഡയറക്ടറുടെ ഉത്തരവ് വിവാദമാകുന്നു. ഇതിന് പിന്നിൽ രാഷ്ട്രീയതാത്പര്യമാണെന്ന് ആക്ഷേപം ഉയർന്നു കഴിഞ്ഞു. കേരള വിദ്യാഭ്യാസ ചട്ടം ലംഘിച്ചുള്ള ഉത്തരവിനെതിരേ കോടതിയെ സമീപികാനാണ് അധ്യാപക സംഘടനകളുടെ തീരുമാനം.

കണ്ണൂർ മാതമംഗലം സി.പി.എൻ.എസ്. ഗവ. എച്ച്.എസ്.എസ്. സ്‌കൂളിലെ സോഷ്യോളജി വിഭാഗം സീനിയർ അധ്യാപിക നിഷ ലൂക്കോസിനെയാണ് ജൂനിയറായി തരംതാഴ്ത്തി വ്യാഴാഴ്ച ഉത്തരവിറങ്ങിയത്. തുടർന്ന്, ഇവരെ മലപ്പുറം കോക്കൂർ ഗവ. എച്ച്.എസ്.എസിലേക്കു സ്ഥലംമാറ്റി.നിശ്ചിത വിഷയത്തിലുള്ള ഒരു അധ്യാപകൻ പ്രിൻസിപ്പലായി നിയമിക്കപ്പെടണമെങ്കിൽ അതേവിഷയത്തിലുള്ള തസ്തികയിൽ ഒഴിവുവേണമെന്നാണ് വ്യവസ്ഥ. ഒഴിവില്ലാത്തതിനാൽ എച്ച്.എസ്.എസ്.ടി. സോഷ്യോളജി അധ്യാപികയായ നിഷ ലൂക്കോസിനെ ജൂനിയറായി തരംതാഴ്ത്തി സ്ഥലംമാറ്റിയതു.