കോട്ടയത്ത് ഏറ്റുമാനൂർ നഗര മധ്യത്തിൽ എംസി റോഡിൽ ഡിവൈഡറിൽ ഇടിച്ചു തെറിച്ച് മറിഞ്ഞ കാർ കത്തി നശിച്ചു. കാറിനുള്ളിൽ നിന്നും ഡ്രൈവർ ഇറങ്ങി ഓടി രക്ഷപ്പെട്ടു. ഇയാളെ കണ്ടെത്താനായില്ല. ഞായറാഴ്ച രാത്രി 11.30 മണിയോടെ എംസി റോഡിൽ ഏറ്റുമാനൂർ ജംഗ്ഷനിൽ ആയിരുന്നു അപകടം.

എറണാകുളം ഭാഗത്തുനിന്നും എത്തിയ കാർ നിയന്ത്രണം നഷ്ടമായി ഏറ്റുമാനൂർ സെൻട്രൽ ജംഗ്ഷനിലെ ഡിവൈഡറിൽ ഇടിച്ചു പാലാ റോഡിലേക്ക് തെറിക്കുകയായിരുന്നു. അപകടത്തെ തുടർന്ന് മറിഞ്ഞ കാർ നേരെയാക്കിയ ശേഷം നാട്ടുകാർ രക്ഷാപ്രവർത്തനം നടത്തുന്നതിനിടെ തനിയെ സ്പാർക്കായി കാർ കത്തി നശിക്കുകയായിരുന്നു. ഉടൻതന്നെ നാട്ടുകാർ ഓടി മാറി.

ഈ സമയം കാറിനുള്ളിൽ നിന്നും ഇറങ്ങിയ ഡ്രൈവർ ഓടി രക്ഷപ്പെട്ടു. നാട്ടുകാർ വിവരമറിയിച്ചതോടെ സ്ഥലത്തെത്തിയ അഗ്നിരക്ഷാസേനാംഗങ്ങൾ ചേർന്ന് കാറിന്റെ തീ നിയന്ത്രണവിധേയമാക്കി. ഇടുക്കി രജിസ്ട്രേഷനിലുള്ള കാർ ആണ് കത്തി നശിച്ചത്.