ഗുരുവായൂര്‍ ക്ഷേത്രത്തില്‍ ഈ മാസത്തെ ഭണ്ഡാര വരവായി ലഭിച്ചത് 5,88,12,781 രൂപ. 2.95 കിലോ സ്വര്‍ണ്ണം ലഭിച്ചു. 9.71 കിലോ വെള്ളിയും ലഭിച്ചു.
നിരോധിച്ച ആയിരം രൂപയുടെ 52 കറന്‍സിയും അഞ്ഞൂറിന്റെ 67 കറന്‍സിയും ലഭിച്ചു. പഞ്ചാബ് നാഷണല്‍ ബാങ്ക് ഗുരുവായൂര്‍ ശാഖയ്ക്കായിരുന്നു എണ്ണല്‍ ചുമതല.


ക്ഷേത്രത്തിന്റെ കിഴക്കേ നടയിലെ എസ്ബിഐയുടെ ഇ-ഭണ്ഡാരം വഴി ഡിസംബറില്‍ 1,06,606 രൂപ ലഭിച്ചു. ഡിസംബര്‍ മാസത്തെ സ്ഥിരം ഭണ്ഡാര വരവിന് പുറമെയാണ് ഇ ഭണ്ഡാര വരവ്.


അതേസമയം ഇത്തവണ ഗുരുവായൂര്‍ ഏകാദശി ഡിസംബര്‍ മൂന്ന്, നാല് തീയതികളിലായി ആഘോഷിച്ചു. ക്ഷേത്രം തന്ത്രി പിസി ദിനേശന്‍ നമ്പൂതിരിപ്പാടിന്റെയും ക്ഷേത്രം ഊരാളന്‍ മല്ലിശ്ശേരി പരമേശ്വരന്‍ നമ്പൂതിരിപ്പാടിന്റെയും അഭിപ്രായം പരിഗണിച്ച് ദേവസ്വം ഭരണസമിതി ഏകകണ്ഠമായാണ് തീരുമാനം എടുത്തത്. ഡിസംബര്‍ മൂന്നിനായിരുന്നു ദേവസ്വം വക ഉദയാസ്തമയ പൂജ. ഡിസംബര്‍ നാലിന് ദേവസ്വം വക വിളക്കാഘോഷവും നടന്നു, മൂന്നിനും നാലിനും ഏകാദശി പ്രസാദ ഊട്ടുണ്ടായിരുന്നു. ഗജരാജന്‍ കേശവന്‍ അനുസ്മരണം നേരത്തെ നിശ്ചയിച്ചതു പോലെ ഡിസംബര്‍ രണ്ടിന് നടത്തി. ചെമ്പൈ സംഗീതോത്സവം ഡിസംബര്‍ മൂന്നിന് സമാപിച്ചു
ഇത്തവണ സാധാരണയില്‍ നിന്ന് ഭിന്നമായി രണ്ട് ദിവസമായാണ് ഏകാദശി വന്നത്. 57.38 നാഴിക ഏകാദശിയായി വരുന്നത് വൃശ്ചികം 17ാം തീയതിയായ ഡിസംബര്‍ മൂന്നിനായിരുന്നു. അന്ന് ഏകാദശി ആഘോഷിക്കാനാണ് നേരത്തെ നിശ്ചയിച്ചിരുന്നതെങ്കിലും പിന്നീട് ജ്യോതിഷ പണ്ഡിതന്‍മാരുടെയും വൈദികരുടെയും അഭിപ്രായം കൂടി പരിഗണിച്ച് 1992- 93 വര്‍ഷങ്ങളില്‍ സമാന സാഹചര്യത്തില്‍ ദേവസ്വം സ്വീകരിച്ച നടപടിക്രമം കൂടി കണക്കിലെടുത്ത് ഇത്തവണ ഡിസംബര്‍ നാലിനും ഏകാദശി ആഘോഷിക്കാനും ദേവസ്വത്തിന്റെ ആഭിമുഖ്യത്തില്‍ വിളക്ക് നടത്താനും ഭരണ സമിതി തീരുമാനിക്കുകയായിരുന്നു.

ദ്വാദശി പണ സമര്‍പ്പണം ഡിസംബര്‍ നാലിന് രാത്രി 12 മണി മുതല്‍ ഡിസംബര്‍ അഞ്ച് രാവിലെ ഒന്‍പത് മണി വരെ നടന്നു. ത്രയോദശി ഊട്ട് ഡിസംബര്‍ ആറിന് നടത്തി. എകാദശി ദിവസങ്ങളില്‍ കാലത്ത് ആറ് മണി മുതല്‍ ഉച്ചയ്ക്ക് ഒരു മണി വരെ പൊതുവായ ക്യൂവില്‍ നിന്നുള്ള ദര്‍ശനം മാത്രമേ ഉണ്ടായിരുന്നുള്ളൂ. ചോറൂണ്‍ കഴിഞ്ഞ് വരുന്നവര്‍ക്കുള്ള പ്രത്യേക ദര്‍ശനവും ഉണ്ടായിരുന്നില്ല. ശ്രീലകത്ത് നെയ്യ് വിളക്ക് ശീട്ടാക്കുന്നവര്‍ക്കുള്ള പ്രത്യേക ദര്‍ശനം അനുവദിച്ചു.