41 ദിവസം നീണ്ടുനില്‍ക്കുന്ന മണ്ഡലകാല തീര്‍ഥാടനത്തിന് ഇന്ന് പരിസമാപ്തി.... ശബരിമലയില്‍ മണ്ഡലപൂജ ഇന്ന്.. തങ്കഅങ്കി ഘോഷയാത്രയെ ഇന്നലെ സന്നിധാനത്ത് ശരണംവിളികളോടെ വരവേറ്റു. പകല്‍ രണ്ടിന് ഘോഷയാത്രയെ പമ്പ ഗണപതി കോവിലിലേക്ക് പമ്പ ദേവസ്വം അഡ്മിനിസ്‌ട്രേറ്റീവ് ഓഫീസര്‍ അയ്യപ്പന്റെ നേതൃത്വത്തില്‍ സ്വീകരിച്ചു. വൈകിട്ട് 3.30വരെ തീര്‍ഥാടകര്‍ ഇവിടെ തങ്കഅങ്കി ദര്‍ശിച്ചു.


പമ്പയില്‍നിന്ന് പുറപ്പെട്ട് നീലിമലയും അപ്പാച്ചിമേടും ശബരീപീഠവും കടന്ന് 5.30ന് ശരകുത്തിയിലെത്തി. ഇവിടെനിന്ന് 6.15ന് പതിനെട്ടാംപടി കയറിയെത്തിയ ഘോഷയാത്രയെ കൊടിമരച്ചുവട്ടില്‍ സ്വീകരിച്ച് സോപാനത്തേക്ക് ആനയിച്ചു. സോപനത്ത് തന്ത്രി കണ്ഠര് രാജീവര് തങ്കഅങ്കി ഏറ്റുവാങ്ങി അയ്യപ്പവിഗ്രഹത്തില്‍ ചാര്‍ത്തി ദീപാരാധന നടത്തി. 41 ദിവസത്തെ മണ്ഡലകാലത്തിന് സമാപനംകുറിച്ച് ചൊവ്വ പകല്‍ 12.30നും ഒന്നിനുമിടയില്‍ കണ്ഠര് രാജീവരുടെ മുഖ്യകാര്‍മ്മികത്വത്തില്‍ മണ്ഡലപൂജ നടക്കും.


41 ദിവസത്തെ മണ്ഡലകാലത്തിന് സമാപ്തികുറിച്ച് ശബരിമലയില്‍ ചൊവ്വാഴ്ച മണ്ഡലപൂജ നടക്കും. പുലര്‍ച്ചെ മൂന്നിന് നടതുറന്നു. തുടര്‍ന്ന് അഭിഷേകവും പതിവുപൂജയും നടക്കും. പകല്‍ 12.30നും ഒന്നിനുമിടയിലാണ് തങ്കഅങ്കി ചാര്‍ത്തിയുള്ള മണ്ഡലപൂജ നടക്കുക. തുടര്‍ന്ന് നടയടച്ചാല്‍ വൈകിട്ട് വീണ്ടും തുറക്കും.

തീര്‍ഥാടകള്‍ക്ക് മണ്ഡലപൂജ തൊഴാനുള്ള ക്രമീകരണങ്ങള്‍ ദേവസ്വം ബോര്‍ഡും പൊലീസും ഒരുക്കിയിട്ടുണ്ട്. 27ന് രാത്രി പത്തിന് ഹരിവരാസനം പാടി അടയ്ക്കുന്ന നട മകരവിളക്ക് ഉത്സവത്തിനായി 30ന് വൈകിട്ട് അഞ്ചിന് തുറക്കും. മകരവിളക്ക് ജനുവരി 14നാണ് .