സങ്കടം അടക്കാനാവാതെ.... മണര്കാട് ഗവ. യു.പി.സ്കൂളില് നടക്കുന്ന എന്.എസ്.എസ്. ക്യാമ്പില് പങ്കെടുക്കുന്നതിനിടെ പ്ലസ് വണ് വിദ്യാര്ഥി മരിച്ചു.... മകന്റെ വേര്പാട് താങ്ങാനാവാതെ മാതാപിതാക്കള്, കരഞ്ഞ് നിലവിളിച്ച് സഹോദരി
മണര്കാട് ഗവ. യു.പി.സ്കൂളില് നടക്കുന്ന എന്.എസ്.എസ്. ക്യാമ്പില് പങ്കെടുക്കുന്നതിനിടെ പ്ലസ് വണ് വിദ്യാര്ഥി മരിച്ചു. മണര്കാട് തിരുവഞ്ചൂര് പായിപ്രപ്പടി പാറയില് പുള്ളോത്ത് സാമന്തിന്റെയും (സന്തോഷ്) സിന്ധുവിന്റെയും മകന് സന്ദീപ് (16) ആണ് മരിച്ചത്.
അരീപ്പറമ്പ് ഗവ. ഹയര് സെക്കന്ഡറി സ്കൂള് വിദ്യാര്ഥിയാണ്. സന്ദീപിനെ ആശുപത്രിയിലെത്തിക്കാന് അധ്യാപകര് വൈകിയതാണ് മരണകാരണമെന്നാരോപിച്ച് ബന്ധുക്കള് ആശുപത്രി വളപ്പില് ബഹളമുണ്ടാക്കി. മണര്കാട് പോലീസും സ്ഥലത്തെത്തിയിരുന്നു.സന്ദീപ് അപസ്മാരരോഗത്തിന് ചികിത്സയിലായിരുന്നുവെന്നും ഇതുസംബന്ധിച്ച വിവരങ്ങള് സ്കൂള് അധികൃതരെ അറിയിച്ചിരുന്നതായും ബന്ധുക്കള് പറഞ്ഞു.
ശനിയാഴ്ച രാവിലെ ക്യാമ്പിന്റെ ഭാഗമായി സന്ദീപ് ഉള്പ്പെടെയുള്ള കുട്ടികള് മണര്കാടുള്ള അങ്കണവാടി പെയിന്റുചെയ്യുന്നതിനായി പോയിരുന്നു.ഉച്ചയ്ക്ക് മൂന്ന് മണിയോടെ മടങ്ങിയെത്തിയശേഷം ക്ഷീണം തോന്നിയതിനെ തുടര്ന്ന് സന്ദീപ് കിടന്നതായി സ്കൂള് അധികൃതര് പോലീസിനോട് പറഞ്ഞു.
ഈസമയം, മറ്റ് കുട്ടികള് ക്യാമ്പ് പ്രവര്ത്തനങ്ങള്ക്കായി പോയി. അഞ്ചരമണി കഴിഞ്ഞു വിളിച്ചിട്ട് ഉണരാതെവന്നതോടെ അധ്യാപകര് വീട്ടുകാരെ വിവരം അറിയിച്ചു. ആറരയോടെ അച്ഛന് സന്തോഷ് സ്കൂളിലെത്തുമ്പോള് കുട്ടിയുടെ ശരീരം തണുത്ത നിലയിലായിരുന്നു. അധ്യാപകരുടെ സഹായത്തോടെ മണര്കാട് സെന്റ് മേരീസ് ആശുപത്രിയിലെത്തിച്ചു.
അരമണിക്കൂര് മുമ്പേ മരണം നടന്നതായി ഡോക്ടര്മാര് അറിയിച്ചതായി ബന്ധുക്കള് പറഞ്ഞു. മൃതദേഹം മണര്കാട് സെന്റ് മേരീസ് ആശുപത്രി മോര്ച്ചറിയിലേക്ക് മാറ്റി. സംഭവത്തില് മണര്കാട് പോലീസ് കേസെടുത്തു. മൃതദേഹം ഞായറാഴ്ച പോസ്റ്റ്മോര്ട്ടം നടത്തും. സഹോദരി: സ്നേഹ മണര്കാട് ഇന്ഫന്റ് ജീസസ് സ്കൂള് എട്ടാംക്ലാസ് വിദ്യാര്ഥിയാണ്.
"
https://www.facebook.com/Malayalivartha
