പുതുവത്സരാഘോഷത്തിന്റെ സമാപനം കുറിച്ച് കാര്‍ണിവല്‍ റാലി ഇന്ന് ഫോര്‍ട്ട് കൊച്ചിയില്‍ നടക്കും.വൈകുന്നേരം മൂന്നിന് പരേഡ് മൈതാനത്ത് നടക്കുന്ന റാലിയില്‍ സ്വദേശികളും വിദേശികളുമടക്കം നിരവധി പേര് പങ്കെടുക്കുകയും ചെയ്യും.

കലാരൂപങ്ങളുടെ അകമ്പടിയോടെ നീങ്ങുന്ന റാലിയില്‍ നിശ്ചല ദൃശ്യങ്ങളുടെ അവതരണവുമുണ്ടാവും. ഭീമന്‍ പാപ്പാഞ്ഞി കത്തിച്ച് ഇന്നലെ രാത്രി പുതുവര്‍ഷത്തെ ഫോര്‍ട്ടു കൊച്ചി വരവേറ്റിരുന്നു. ആടിയും പാടിയും ആര്‍ത്തുല്ലസിച്ചുമാണ് കേരളം പുതുവര്‍ഷത്തെ വരവേറ്റത്.

കനത്ത സുരക്ഷയിലായിരുന്നു കൊച്ചിയിലെ ആഘോഷം. കടപ്പുറമായിരുന്നു കോഴിക്കോടിന്റെ ആഹ്ലാദകേന്ദ്രം. കോവളത്ത് പുതുവത്സരമാഘോഷിക്കാന്‍ സ്വദേശികളും വിദേശികളുമായി നൂറുകണക്കിനാളുകളാണെത്തിയത്. ആഘോഷത്തിനിടയില്‍ ലഹരി പതയുന്നുണ്ടോയെന്നറിയാന്‍ കര്‍ശന പരിശോധനയുമുണ്ടായിരുന്നു.

നേരത്തെ ഹിറ്റ്‌ലിസ്റ്റില്‍ ഉള്‍പ്പെട്ടിട്ടുള്ള ഹോട്ടലുകളില്‍ മഫ്തിയില്‍ സംഘം പരിശോധന നടത്തി. ലഹരി ഉപയോഗമുണ്ടോ എന്നതിനൊപ്പം സ്ത്രീകള്‍ക്ക് എതിരെ അക്രമങ്ങള്‍ നടന്നോ എന്നും സംഘം പരിശോധിച്ചു. ഒരുതരത്തിലുള്ള ആഘോഷവും പാടില്ലെന്ന് നിര്‍ദേശത്തെ വലിയ വിമര്‍ശനതോടെ ആണ് കോഴിക്കോട്ടുകാര്‍ സ്വീകരിച്ചത്. 12.30 വരെ ബീച്ചില്‍ വലിയ തോതില്‍ ഉള്ള ജനക്കൂട്ടം ഉണ്ടായിരുന്നു.

ബഹളങ്ങളില്‍ നിന്ന് മാറി പുതുവത്സരമാഘോഷിക്കാന്‍ വയനാട്ടിലെത്തിയത്. ആയിരകണക്കിന് സഞ്ചാരികള്‍. ഹോട്ടലുകളും റിസോര്‍ട്ടുകളും കേന്ദ്രീകരിച്ചാണ് ജില്ലയില്‍ ആഘോഷ പരിപാടികള്‍ ഏറെയും നടന്നത്. സഞ്ചാരികളുടെ തിരക്ക് വര്‍ധിച്ചതോടെ ചുരത്തില്‍ ഉള്‍പ്പെടെ ഗതാഗതക്രമീകരണങ്ങള്‍ ഏര്‍പ്പെടുത്തിയിട്ടുണ്ടായിരുന്നു.