സംസ്ഥാനത്ത് വന്യ ജീവികളുടെ വംശ വര്‍ദ്ധനവ് തടയാനുള്ള അനുമതിക്കായി സുപ്രീം കോടതിയെ സമീപിക്കുമെന്ന് സംസ്ഥാന വനം വകുപ്പ് മന്ത്രി എകെ ശശീന്ദ്രന്‍.


അടിയന്തിര പ്രാധാന്യമുള്ള വിഷയമായി ഇക്കാര്യത്തില്‍ ഹര്‍ജി നല്‍കുകയും ചെയ്യും. സംസ്ഥാന സര്‍ക്കാര്‍ നിയമോപദേശം തേടിയിട്ടുണ്ട്. വന്യമൃഗ ശല്യത്തെ കുറിച്ച് പഠിക്കാനായി കെ എഫ് ആര്‍ ഐയെ ചുമതലപ്പെടുത്തിയിട്ടുണ്ടെന്നും വ്യക്തമാക്കി മന്ത്രി .


കടുവയുടെ ആക്രമണം തുടരുന്ന സാഹചര്യത്തില്‍ നാളെ വയനാട്ടില്‍ സര്‍വകക്ഷി യോഗം ചേരുമെന്ന് മന്ത്രി പറഞ്ഞു. ഇതില്‍ ഉയരുന്ന നിര്‍ദേശങ്ങള്‍ സര്‍ക്കാര്‍ ഗൗരവമായി എടുക്കുകയും ദ്രുത കര്‍മ സേനയുടെ അംഗ ബലം കൂട്ടുകയും ചെയ്യും.

ജനത്തിന്റെ ജീവല്‍ പ്രശ്‌നങ്ങള്‍ രാഷ്ട്രീയ ആയുധമാക്കരുത്. സമരമല്ല സഹകരണമാണ് ഈ വിഷയത്തില്‍ വേണ്ടതെന്നും മന്ത്രി ആവശ്യപ്പെട്ടു.
അതേസമയം
കഴിഞ്ഞ രണ്ട് മൂന്ന് വര്‍ഷമായാണ് ഈ നിലയില്‍ വന്യജീവി ആക്രമണം വര്‍ധിച്ചത്. പല പഠനങ്ങളും ഈ വിഷയത്തില്‍ നടത്തി. ഇവയൊന്നും യുക്തിസഹമല്ല. വനത്തിനകത്ത് ആവാസ വ്യവസ്ഥയില്‍ മാറ്റമുണ്ടായിട്ടുണ്ട്. വന്യമൃഗങ്ങള്‍ക്ക് കാട്ടില്‍ ഭക്ഷണവും വെള്ളവും കിട്ടുന്നില്ല. വംശ വര്‍ധനവും ഉണ്ടായി. കടുവകള്‍ക്കൊക്കെ കാട്ടില്‍ നിശ്ചിത സ്ഥലം ആവശ്യമാണ്. അത് ഇപ്പോള്‍ ഇല്ലാത്ത സ്ഥിതിയാണെന്നും അദ്ദേഹം പറഞ്ഞു.

ഇതിന്റെ ശാസ്ത്രീയതയും യുക്തിഭദ്രതയും ഉറപ്പാക്കാനാണ് കെ എഫ് ആര്‍ ഐയെ പഠനത്തിന് ചുമതലപ്പെടുത്തിയത്. നിയമ നിര്‍മ്മാണമാണ് ആവശ്യമെന്നുണ്ടെങ്കില്‍ അത് ചെയ്യും.