നാലും ഒമ്പതും വയസ്സുള്ള രണ്ടു മൈനര്‍ മക്കളെ ഉപേക്ഷിച്ച് ഷെയര്‍ ചാറ്റുവഴി പരിചയപ്പെട്ട യുവാവിനൊപ്പം പോയി താമസിച്ച കേസില്‍ യുവതിയും കാമുകനും ഹാജരാകാന്‍ കോടതി ഉത്തരവിട്ടു.

തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് എ.അനീസയുടേതാണുത്തരവ്.1860 ലെ ഇന്ത്യന്‍ ശിക്ഷാ നിയമത്തിലെ 109 (ഗൂഢാലോചനയടങ്ങുന്ന പ്രേരണ) , 317 (12 വയസിന് താഴെ പ്രായമുള്ള കുട്ടിയെ മാതാവോ പിതാവോ അതിന്റെ സംരക്ഷണയുള്ള ആളോ അരക്ഷിതാവസ്ഥയിലിട്ടിട്ടു പോകലും ഉപേക്ഷിക്കലും) , 34 ( കൂട്ടായ്മ) , 2015 ല്‍ നിലവില്‍ വന്ന ബാലനീതി (കുട്ടികളുടെ സംരക്ഷണവും പരിപാലനവും) നിയമത്തിലെ 75 എന്നീ വകുപ്പുകള്‍ പ്രകാരം കമ്മിറ്റല്‍ കേസെടുത്താണ് പ്രതികളോട് ഹാജരാകാന്‍ കോടതി ആവശ്യപ്പെട്ടത്.


മുട്ടത്തറ വില്ലേജില്‍ വള്ളക്കടവ് വാര്‍ഡ് നിവാസിയായ ആതിര (29) , പാലക്കാട് വെണ്ണക്കര നൂറാണി സ്വദേശി മുഹമ്മദ് നിസാര്‍ (25) എന്നിവരാണ് ഒന്നും രണ്ടും പ്രതികള്‍.

2022 ജനുവരി 20 നാണ് കേസിനാസ്പദമായ സംഭവം നടന്നത്. ഒന്നാം പ്രതി ഷെയര്‍ ചാറ്റ് വഴി പരിചയപ്പെട്ട രണ്ടാം പ്രതിയുമൊത്ത് ഭാര്യാ ഭര്‍ത്താക്കന്‍മാരായി ജീവിക്കുന്നതിന് രണ്ടാം പ്രതിയുടെ പ്രേരണയാല്‍ പ്രായപൂര്‍ത്തിയാകാത്ത നാലും ഒമ്പതും വയസ്സ് പ്രായമുള്ള കുട്ടികളെ ഉപേക്ഷിച്ച് അവരെ അരക്ഷിതാവസ്ഥയിലാക്കി വള്ളക്കടവ് വീട്ടില്‍ നിന്നും ഇറങ്ങി രണ്ടാം പ്രതിയോടൊപ്പം പാലക്കാടുള്ള രണ്ടാം പ്രതിയുടെ വീട്ടില്‍ പോയി ഭാര്യാ ഭര്‍ത്താക്കന്‍മാരായി താമസിച്ച് പ്രതികള്‍ കുറ്റം ചെയ്തുവെന്നാണ് കേസ്.