ജി.എസ്.ടി നഷ്ടപരിഹാരത്തില്‍ കേരളത്തിന് ലഭിക്കുന്നത് 780 കോടി രൂപ. മഹാരാഷ്ട്രയ്ക്കാണ് ഏറ്റവും കൂടുതല്‍ തുക ലഭിക്കാനുള്ളത്. 2102 കോടി. കര്‍ണാടകയ്ക്ക് 1934 കോടി രൂപയും ഉത്തര്‍പ്രദേശിന് 1215 കോടി രൂപയുമാണ് ലഭിക്കുക. ഏറ്റവും കുറവ് തുക ലഭിക്കുന്നത് പുതുച്ചേരിക്കാണ് 73 കോടി.

ഇന്ന് ചേര്‍ന്ന ജി.എസ്.ടി കൗണ്‍സില്‍ യോഗത്തിലാണ് സംസ്ഥാനങ്ങള്‍ക്ക് ലഭിക്കേണ്ട കുടിശിക തുക അനുവദിക്കുമെന്ന് കേന്ദ്ര ധനമന്ത്രി നിര്‍മ്മല സീതാരാമന്‍ അറിയിച്ചത്. 16982 കോടി രൂപയാണ് സംസ്ഥാനങ്ങള്‍ക്ക് കൊടുത്തു തീര്‍ക്കാന്‍ അനുവദിച്ചത്. തുക ഇന്ന് തന്നെ കൊടുക്കുമെന്നും മന്ത്രി പറഞ്ഞു. നഷ്ടപരിഹാര ഫണ്ടില്‍ ഈ തുക ഇല്ലാത്തതിനാല്‍ സര്‍ക്കാര്‍ സ്വന്തം കൈയില്‍ നിന്നാണ് തുക അനുവദിക്കുന്നതെന്നും ജി.എസ്.ടി കൗണ്‍സില്‍ യോഗത്തിന് ശേഷം കേന്ദ്രമന്ത്രി പറഞ്ഞു. ഈ തുക ഭാവിയില്‍ നഷ്ടപരിഹാര സെസ് പിരിക്കുമ്പോള്‍ അതില്‍ നിന്ന് തിരിച്ചുപിടിക്കുമെന്നും മന്ത്രി അറിയിച്ചു.

2017ല്‍ ജി.എസ്.ടി നിലവില്‍ വന്നതുമുതല്‍ 2022 ജൂണ്‍ വരെയുള്ള ജി.എസ്.ടിയിലെ നഷ്ടപരിഹാരത്തിന് കുടിശികയായി ബാക്കിയുണ്ടായിരുന്ന തുകയാണ് കേന്ദ്രം ഇപ്പോള്‍ അനുവദിച്ചിരിക്കുന്നത്. സംസ്ഥാനങ്ങള്‍ക്കുണ്ടാകുന്ന വരുമാന നഷ്ടം അഞ്ച് വര്‍ഷത്തേക്ക് കേന്ദ്രം നല്‍കുമെന്ന് ഉറപ്പുനല്‍കിയിരുന്നു, ജൂണില്‍ ഇത് അവസാനിച്ചിരുന്നു. എന്നാല്‍ കേരളം അടക്കം സംസ്ഥാനങ്ങള്‍ ജി.എസ്.ടി നഷ്ടപരിഹാര കാലാവധി നീട്ടുന്ന കാര്യം ആവശ്യപ്പെട്ടെങ്കിലും ധനമന്ത്രാലയം ഇക്കാര്യത്തില്‍ തീരുമാനമെടുത്തിട്ടില്ല.