ലൈഫ് മിഷന്‍ കോഴക്കേസില്‍ അറസ്റ്റിലായ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിന്റെ കസ്റ്റഡി കാലാവധി ഇന്ന് അവസാനിക്കും.

കോടതിയില്‍ ഹാജരാക്കിയശേഷം കസ്റ്റഡി നീട്ടണമെന്ന് ഇ.ഡി ആവശ്യപ്പെട്ടേക്കും. കേസില്‍ ശിവശങ്കറിന്റെ പങ്ക് വ്യക്തമാക്കുന്ന വിവരങ്ങള്‍ ലഭിച്ചതായി ഇ.ഡി വൃത്തങ്ങള്‍. എന്നാല്‍, ചോദ്യം ചെയ്യലിനോട് ശിവശങ്കര്‍ കാര്യമായി സഹകരിച്ചില്ല. ലഭിച്ച വിവരങ്ങള്‍ ശിവശങ്കറില്‍ നിന്നുതന്നെ ഉറപ്പാക്കുന്നതിനാണ് കസ്റ്റഡി നീട്ടണമെന്നാണ് ആവശ്യപ്പെടുക.

ശിവശങ്കറിന്റെ ചാര്‍ട്ടേര്‍ഡ് അക്കൗണ്ടന്റ് വേണുഗോപാല്‍, ലൈഫ് മിഷന്‍ മുന്‍ സി.ഇ.ഒ യു.വി. ജോസ് എന്നിവരെ ഒപ്പമിരുത്തി ചോദ്യം ചെയ്തിട്ടുണ്ടായിരുന്നു. ഇവരില്‍ നിന്ന് ശിവശങ്കറിന്റെ പങ്ക് വ്യക്തമാക്കുന്ന മൊഴികള്‍ ലഭിച്ചിട്ടുണ്ട്. ഇക്കാര്യങ്ങള്‍ ഇന്ന് കോടതിയെ അറിയിക്കുകയും ചെയ്യും.

സ്വപ്ന സുരേഷിന്റെയും വേണുഗോപാലിന്റെയും സംയുക്ത പേരിലുള്ള ബാങ്ക് ലോക്കര്‍ ശിവശങ്കറിന്റേതാണെന്ന് വ്യക്തമായി. ശിവശങ്കറിന്റെ നിര്‍ദ്ദേശപ്രകാരമാണ് ലോക്കര്‍ എടുത്തതെന്ന് വേണുഗോപാല്‍ മൊഴി നല്‍കി. ലോക്കറില്‍ നിന്ന് ലഭിച്ച പണം ശിവശങ്കറിന്റേതാണെന്ന സ്വപ്നയുടെ മൊഴിയുമുണ്ട്. ലൈഫ് മിഷന്‍ കരാറില്‍ കോഴയായി ശിവശങ്കറിന് ലഭിച്ച തുകയാണ് ലോക്കറില്‍ സൂക്ഷിച്ചിരുന്നതെന്ന് തെളിയിക്കാനായി കഴിയുന്ന വിവരങ്ങള്‍ ലഭിച്ചതായി ഇ.ഡി വൃത്തങ്ങള്‍ പറഞ്ഞു.

ശിവശങ്കറിനും സ്വപ്നയ്ക്കുമപ്പുറം കരാര്‍ ഇടപാടില്‍ ബന്ധപ്പെട്ടവര്‍, കോഴ കൈപ്പറ്റിയവര്‍ എന്നിവരെക്കുറിച്ചും കള്ളപ്പണ ഇടപാട് നടന്നിട്ടുണ്ടോയെന്നും ഇ.ഡി അന്വേഷിക്കുന്നു്. ഉദ്യോഗസ്ഥ, രാഷ്ട്രീയ മേഖലയിലെ പ്രമുഖര്‍ക്ക് ഇടപാടിലുള്ള ബന്ധത്തെക്കുറിച്ചും അന്വേഷണം തുടരുന്നു. വാട്‌സ്ആപ്പ് ചാറ്റുകള്‍ അടക്കം ഡിജിറ്റല്‍ തെളിവുകള്‍ ഉള്‍പ്പെടെ കോര്‍ത്തിണക്കിയാണ് അന്വേഷണം നടക്കുന്നത്.