മുഖ്യമന്ത്രി പുട്ടാണോ ആവോ കഴിച്ചത്. വന്നൊരറ്റത്തള്ളാണ്......കേരളത്തിലെ റോഡ് ന്യൂയോര്‍ക്കിലെക്കാള്‍ കേമം. അവിടെയുള്ള മലയാളികള്‍ക്ക് അദ്ഭുതപ്പെടുന്നുവെന്ന് മുഖ്യമന്ത്രി. വെറുതെ എയറില്‍ക്കേറാനായിട്ട് വന്നോണം. കേരളത്തിലെ റോഡിന്റെ കൊണം കൊണ്ട്...യാത്രക്കാര്‍ ഓരോ കുഴിയില്‍ വീഴുമ്പോഴും ഭരിക്കുന്നവരുടെ തലമുറകള്‍ക്ക് വരെ വിളിക്കുന്നുണ്ട്. എന്നിട്ടും ഇത് പറയണേല്‍ മുക്യ ലേശം തൊലിക്കട്ടി കൂടുതല്‍ വേണം. തൊലിക്കട്ടി കൂടുതലാണെന്ന് മുഖ്യന്‍ വീണ്ടും വീണ്ടും തെളിയിച്ച് കൊണ്ടിരിക്കുകയാണ്......മരുമോന്‍ ഭരിക്കുന്ന വകുപ്പായോണ്ട് ഒന്ന് വെളുപ്പിക്കാന്‍ നോക്കീതാ പക്ഷെ ഒത്തില്ല.

ന്യൂയോര്‍ക്കില്‍ കഴിയുന്ന മലയാളികള്‍ അടുത്തയിടെ കേരളം വന്നു കണ്ടപ്പോള്‍ അദ്ഭുതപ്പെട്ടു പോയെന്നു മുഖ്യമന്ത്രി പിണറായി വിജയന്‍. യുഎസില്‍ മെഡിസിനില്‍ എംഡിക്കു പഠിക്കുന്ന മകനോടൊപ്പമാണ് ന്യൂയോര്‍ക്കിലുള്ള മലയാളി തന്നെ കാണാന്‍ എത്തിയത്. മെഡിസിനു പഠിക്കുന്ന ചെറുപ്പക്കാരന്റെ അമ്മയുടെ വീടു തൃശൂരാണ്. അമ്മയുടെ സഹോദരിയുടെ വീടു പാലക്കാടും. എല്ലാവരും ചേര്‍ന്നു തൃശൂരില്‍നിന്നു പാലക്കാട്ടേക്കു യാത്ര ചെയ്തപ്പോള്‍ ഭയങ്കര ആശ്ചര്യം ! ന്യൂയോര്‍ക്കിലെക്കാളും നല്ല റോഡാണല്ലോ ഇതെന്ന് അവര്‍ പരസ്പരം പറഞ്ഞു. ടണലിനുള്ളില്‍ കൂടി പോയപ്പോള്‍ നമ്മുടെ നാട് ഇപ്രകാരമൊക്കെ മാറിയല്ലോ എന്നായിരുന്നു ചിന്ത. മുന്‍പ് അവര്‍ ഇതുവഴി പോയപ്പോള്‍ ഇതായിരുന്നില്ല സ്ഥിതി.

നാടിനുണ്ടായ മാറ്റം ആളുകള്‍ അംഗീകരിക്കുകയും ഉള്‍ക്കൊള്ളുകയുമാണ്. റോഡിന്റെ കാര്യത്തിന്റെ മാത്രമല്ല മറ്റു പല കാര്യങ്ങളിലും കേരളത്തിനു മാറ്റമുണ്ടായെന്ന് അവര്‍ വെളിപ്പെടുത്തിയെന്നും മുഖ്യമന്ത്രി പറഞ്ഞു. മാറ്റത്തിന്റെ ഭാഗമായി ഇവിടെ നിന്നാല്‍ മാത്രം പോരാ, കൂടുതല്‍ ഉയരങ്ങളിലേക്കു പോകണം. അതാണു ലക്ഷ്യം വയ്ക്കുന്നതെന്നും മുഖ്യമന്ത്രി പറഞ്ഞു. ന്യൂയോര്‍ക്കിലുള്ള മലയാളിയുടെ പേര് വെളിപ്പെടുത്തുന്നില്ലെന്നും അദ്ദേഹം അറിയിച്ചു.

ഇതെല്ലാം ഞാന്‍ പറയും പക്ഷെ ആ നല്ലകാര്യം പറഞ്ഞ ആളിന്റെ പേര് വെളിപ്പെടുത്തില്ല കേട്ടോ. ഹാ അതെന്ത് പരിപടിയാ മുഖ്യമന്ത്രി. കേരളത്തിലെ റോഡിനെക്കുറിച്ച് ഇത്ര മനോഹരമായ വിവരണം നടത്തിയ ആളിനെ മലയാളികളൊന്ന് പരിചയപ്പെടട്ടെ. മൂപ്പരെ കൈയ്യിലെങ്ങാനും കിട്ടിയാല്‍ മലയാളികള്‍ എടുത്ത് പൊങ്കാലയിടും. കേരളത്തിലെ റോഡുകളെക്കുറിച്ച് ഒറ്റവാക്കില്‍ പറഞ്ഞാല്‍ കൊലക്കളം അതാണ്. നിറയെ കുണ്ടും കുഴിയും, ഈ കുഴിയില്‍ വീഴാതെ യാത്ര ചെയ്യുക എന്നതാണ് യാത്രക്കാര്‍ക്കുള്ള ടാസ്‌ക്. റോഡേതാ തോടേതാന്ന് അറിയില്ല അത്രയ്ക്ക് കേമമാണ് റോഡികള്‍. അതിസാഹസിക യാത്രയാണ് റോഡില്‍ സര്‍ക്കാര്‍ ഒരുക്കിയിരിക്കുന്നത്. വണ്ടര്‍ലായിലെ ഏതേലും റൈഡില്‍ക്കേറിയാല്‍ കിട്ടില്ല ഈ അഡ്വഞ്ചര്‍ ട്രിപ്പ്. മഴക്കാലത്ത് ബഹുകേമം ആണ് റോഡില്‍ വാഴകൃഷി നടത്തും മലയാളി...കൊലവെട്ടുകയും ചെയ്യും. പിന്നെ എടുത്ത് പറയേണ്ടത് ടാറില്ലാതെ റോഡ് പണി അതാണ് ഞങ്ങളുടെ ഹൈലൈറ്റ്. പിന്നെ ലോകം ഞെട്ടുന്ന ഒരു കണ്ടുപിടുത്തവും ഉണ്ട്. റോഡിലൂടെ ഞങ്ങള്‍ ബോട്ടും ഓടിക്കും. അത് മഴക്കാലത്തെ പ്രത്യേകതയാണ്. അങ്ങനെ വരുമ്പോള്‍ ന്യൂയോര്‍ക്കിലുള്ളവര്‍ ഞെട്ടിയില്ലെങ്കിലേ അത്ഭുതമുളളു. ഇനി ഞെട്ടാന്‍ കിടക്കുന്നതേയുള്ളു. വകുപ്പ് മന്ത്രിക്ക് കുഴിയെണ്ണലാണ് മെയ്ന്‍ പണി.