കൊല്ലം കരിക്കോട് പോലീസ് ഉദ്യോഗസ്ഥർ വീട്ടിൽ കയറി സ്ത്രീകളോട് അതിക്രമം കാണിച്ചതായി പരാതി.
കുണ്ടറ പോലീസ് സ്റ്റേഷനിലെ ഉദ്യോഗസ്ഥരാണ് രാത്രി സമയത്ത് മഫ്തിയിൽ വീട്ടിൽ അതിക്രമിച്ചു കയറിയത്.
ബഹളം കേട്ടെത്തിയ സമീപവാസിയായ സിനി ലാൽ എന്നയാളെ പോലീസ് ക്രൂരമായി മർദ്ദിച്ചുവെന്നും ആരോപണം.
സിനിലാലിനെ എഴോളം വകുപ്പുകൾ ചുമത്തി പോലീസ് അറസ്റ്റ് ചെയ്തു.
കഴിഞ്ഞ ദിവസം രാത്രിയാണ് യൂണിഫോം ധരിക്കാത്ത 3 പോലീസ് ഉദ്യോഗസ്ഥർ സമീപത്തെ വീട്ടിൽ നിന്നും പ്രതിയെ പിടിക്കാനെന്ന കാരണം പറഞ്ഞു കരിക്കോട് ടി കെ എം ആർട്സ് കോളേജിന് എതിർ വശത്തുള്ള അലി മനസിലിൽ എത്തിയത്.

ആ സമയത്ത് സ്ത്രീകളും കുട്ടികളും മാത്രമേ വീട്ടിൽ ഉണ്ടായിരുന്നുള്ളു.
വീട്ടിൽ അതിക്രമിച്ചു കയറിയ പോലീസ് ഉദ്യോഗസ്ഥരോട് ആരാണെന്ന് ചോദിച്ചതോടെ തങ്ങളോട് തട്ടി കയറുകയായിരുന്നുവെന്ന് സംഭവ സമയം വീട്ടിൽ ഉണ്ടായിരുന്ന സ്ത്രീകൾ പറഞ്ഞു.
സ്ത്രീകളുടെ ബഹളം കേട്ട് സമീപവാസിയായ സിനിലാൽ സ്ഥലത്തെത്തി പോലീസ് ആണെങ്കിൽ ഐ ഡി കാർഡ് കാണിക്കാൻ ആവിശ്യപ്പെട്ടത്തോടെ പോലീസ് സിനി ലാലിനെ ആക്രമിച്ചു.

ഉടൻ തന്നെ കിളികൊല്ലൂർ പോലീസ് സ്റ്റേഷനിൽ നിന്നും യൂണിഫോം ധരിച്ച പോലീസ് ഉദ്യോഗസ്ഥർ എത്തുകയും പോലീസ് ഉദ്യോഗസ്ഥരെ മർദ്ധിച്ചുവെന്നാരോപിച്ചു സിനി ലാലിനെ കസ്റ്റഡിയിലെടുക്കുകയും ചെയ്തു.

7 ഓളം വകുപ്പുകൾ ചുമത്തിയാണ് സിനിലാലിനെതിരെ പോലീസ് കേസെടുത്തിരിക്കുന്നത്.
അതിക്രമിച്ചു കയറിയ പോലീസ് ഉദ്യോഗസ്ഥർക്കെതിരെ വീട്ട് ഉടമസ്ഥരായ സ്ത്രീകളും പരാതി നൽകിയിട്ടുണ്ട്.

ബിനു പളളിമൺ