മദ്യപിച്ച് ബസോടിച്ചതിന് മൂന്ന് കെഎസ്ആര്‍ടിസി ഡ്രൈവര്‍മാരെ സസ്‌പെന്‍ഡ് ചെയ്തു. കോട്ടയം ജില്ലയില്‍ വൈക്കം യൂണിറ്റിലെ ഡ്രൈവര്‍ സി.ആര്‍ ജോഷി, ഇടുക്കി തൊടുപുഴ യൂണിറ്റിലെ ലിജോ.സി ജോണ്‍, മല്ലപ്പള്ളിയിലെ വി.രാജേഷ് കുമാര്‍ എന്നിവരെയാണ് സസ്‌പെന്‍ഡ് ചെയ്തത്. മദ്യപിച്ച് ജോലിക്കുവന്നതിന് ഒരു ഡിപ്പോ ജീവനക്കാരനെയും സസ്‌പെന്‍ഡ് ചെയ്തിട്ടുണ്ട്. പത്തനംതിട്ട ഗ്യാരേജിലെ സ്‌റ്റോര്‍ ഇഷ്യുവറായ വി.ജെ പ്രമോദാണ് അച്ചടക്ക നടപടി നേരിട്ടത്. മാര്‍ച്ച് രണ്ടിന് മദ്യപിച്ച് ജോലിക്കെത്തിയ ഇയാളുടെ മോശം പെരുമാറ്റമാണ് സസ്‌പെന്‍ഷന് ഇടയാക്കിയത്.

അന്താരാഷ്ട്ര വനിതാദിനത്തില്‍ തൊടുപുഴയില്‍ ക്യാബിനില്‍ വച്ച് മീറ്റിംഗിനിടെ അസിസ്റ്റന്റ് ജാക്‌സണ്‍ ദേവസ്യയുമായി വാക്കേറ്റം നടത്തിയ ശേഷം കൈയേറ്റം ചെയ്ത കുറ്റത്തിനാണ് തൊടുപുഴ ക്‌ളസ്റ്റര്‍ ഓഫീസര്‍ വി.ആര്‍ സുരേഷ് (അസിസ്റ്റന്റ് ട്രാന്‍സ്‌പോര്‍ട്ട് ഓഫീസര്‍) അച്ചടക്ക നടപടിയ്ക്കിരയായത്.

ഫെബ്രുവരി 13ന് തൃപ്പൂണിത്തുറ ഹില്‍പാലസ് പൊലീസ് നടത്തിയ വാഹനപരിശോധനയിലാണ് വൈക്കം യൂണിറ്റിലെ ഡ്രൈവര്‍ സി.ആര്‍ ജോഷിയും തൊടുപുഴയിലെ ലിജോ.സി ജോണും കുടുങ്ങിയത്. ജോഷിയും ലിജോയും ഇനി മദ്യപിച്ച് വാഹനമോടിക്കില്ലെന്ന് പൊലീസ് സ്‌റ്റേഷനില്‍ ഇംപോസിഷന്‍ എഴുതിയത് വലിയ കളങ്കം കോര്‍പറേഷനുണ്ടാക്കി എന്നാണ് പൊതുഅഭിപ്രായം. ഫെബ്രുവരി 21ന് കറുകച്ചാലില്‍ നടത്തിയ വാഹനപരിശോധനയിലാണ് കോഴഞ്ചേരികോട്ടയം റൂട്ടില്‍ വാഹനമോടിക്കുകയായിരുന്ന രാജേഷ് കുമാറിനെ പിടികൂടിയത്. പൊലീസ് ഇയാളെ കസ്റ്റഡിയിലെടുക്കുകയും കേസെടുക്കുകയും ചെയ്തിരുന്നു.