ആര്യനാട് സര്‍ക്കാര്‍ ഭൂമി കൈയ്യേറ്റക്കേസില്‍ സാക്ഷികള്‍ക്ക് നേരില്‍ കണ്ട് നടപ്പിലാക്കേണ്ട സമന്‍സ് ഉത്തരവ് വാട്ട്‌സ്ആപ്പില്‍ അയച്ച ആര്യനാട് സര്‍ക്കിള്‍ ഇന്‍സ്‌പെക്ടര്‍ക്കും പോലീസ് കോണ്‍സ്റ്റബിള്‍ക്കും ചീഫ് ജുഡീഷ്യല്‍ മജിസ്ട്രേട്ട് കോടതിയുടെ രൂക്ഷ വിമര്‍ശനം.


തിരുവനന്തപുരം ചീഫ് ജുഡീഷ്യല്‍ മജിസ്ട്രേട്ട് കെ.വിദ്യാധരനാണ് പോലീസ് ഉദ്യോഗസ്ഥരുടെ നിഷ്‌ക്രിയത്വത്തെയും അലംഭാവത്തെയും രൂക്ഷമായി വിമര്‍ശിച്ചത്. സിഐക്കും സി പി ഒ ക്കും കോടതി കാരണം കാണിക്കല്‍ നോട്ടീസ് അയച്ചു. ഇരുവരും 26 ന് ഹാജരായി വിശദീകരണം ബോധിപ്പിക്കാനും കോടതി ഉത്തരവിട്ടു.


ആര്യനാട് വില്ലേജാഫീസര്‍ , തഹസില്‍ദാര്‍ തുടങ്ങി 1 , 3 , 4 എന്നീ 3 സാക്ഷികള്‍ക്ക് സമന്‍സ് ഉത്തരവ് ശരിയായ രീതിയില്‍ നല്‍കി സമന്‍സുത്തരവ് നടപ്പിലാക്കി വിവരം റിപ്പോര്‍ട്ടു ചെയ്യാനും കോടതി ഉത്തരവിട്ടു.


2017 ല്‍ ആര്യനാട് നടന്ന സര്‍ക്കാര്‍ ഭൂമി കൈയ്യേറ്റ കേസിലാണ് സാക്ഷികളെ ഹാജരാക്കുന്നതില്‍ പോലീസ് വീഴ്ച വരുത്തിയത്. ആര്യനാട് സ്ഥലവാസികളായ രാഘവന്‍ നായര്‍ , മുരളീധരന്‍ നായര്‍ , പ്രഫുല്ല ചന്ദ്രന്‍ നായര്‍ , ഷിബു , പ്രവീണ്‍ കുമാര്‍ എന്നിവരാണ് ഭൂമി കൈയ്യേറ്റ കേസിലെ 1 മുതല്‍ 5 വരെയുള്ള പ്രതികള്‍. 2009 ല്‍ നിലവില്‍ വന്ന കേരള ഭൂ സംരക്ഷണ (ഭേദഗതി) നിയമത്തിലെ വകുപ്പ് 7 (എ) , (ബി) എന്നീ വകുപ്പുകള്‍ ചുമത്തിയാണ് കോടതി പ്രതികളെ വിചാരണ ചെയ്യാന്‍ ഉത്തരവിട്ടത്.