വലിയവേളി സ്വദേശിനി റോസ (55 ) യെ ദേശീയ പാത റോഡില്‍ തള്ളിയിട്ട് കൊലപ്പെടുത്തിയ കേസില്‍ വിചാരണക്കായി 1 മുതല്‍ 4 വരെയുള്ള പോസിക്യൂഷന്‍ ഭാഗം സാക്ഷികളെ ഹാജരാക്കാനായി തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്‌ട്രേട്ട് കോടതി ഉത്തരവിട്ടു.

കേസിലെ പ്രതിയായ ആറ്റിപ്ര വില്ലേജില്‍ പൗണ്ട് കടവ് വാര്‍ഡില്‍ വലിയ വേളി തൈവിളാകം വീട്ടില്‍ എല്‍സി ജോസഫ് മകള്‍ മേബിള്‍ റെയ്മണ്ട് എന്ന 49 കാരിക്ക് കോടതി വിചാരണക്കു മുന്നോടിയായി കുറ്റപത്രം നല്‍കിയിരുന്നു.

ഏപ്രില്‍ 3 ന് സാക്ഷികളെ ഹാജരാക്കാന്‍ സിറ്റി മെഡിക്കല്‍ കോളേജ് പോലീസ് സര്‍ക്കിള്‍ ഇന്‍സ്‌പെക്ടറോടാണ് എ സിജെഎം ഷിബു ഡാനിയേല്‍ ഉത്തരവിട്ടത്.


2015 ഏപ്രില്‍ 22 ന് വൈകിട്ട് 5.45 മണിയോടെ കേശവദാസപുരം മത്സ്യ മാര്‍ക്കറ്റില്‍ വച്ചാണ് കേസിനാസ്പദമായ സംഭവം നടന്നത്. മത്സ്യക്കച്ചവടക്കാരായ റോസയും മേബിളും പരസ്പരം വഴക്കുണ്ടാക്കുകയും തുടര്‍ന്ന് പിടിവലിയും ഉന്തും തള്ളും ഉണ്ടായി മേബിള്‍ റോസയെ കൈ കൊണ്ട് ബലം പ്രയോഗിച്ച് തറയില്‍ തള്ളിയിട്ട് അര്‍ദ്ധ ബോധാവസ്ഥയില്‍ ആക്കുന്നതിനിടയാക്കി.

തല്‍സമയം തറയില്‍ മറിഞ്ഞു കിടന്ന റോസയെ അവിടെ ഉപേക്ഷിച്ചും അവര്‍ക്ക് തക്ക സമയത്ത് ചികിത്സ കൊടുക്കാതെയും പ്രവര്‍ത്തിക്കുകയും തുടര്‍ന്ന് മറ്റുള്ളവര്‍ റോസയെ മെഡിക്കല്‍ കോളേജ് ആശുപത്രിയിലും അവിടെ നിന്ന് കോസ്‌മോ പൊളിറ്റന്‍ ആശുപത്രിയിലും എത്തിച്ച് ചികിത്സ നടത്തി വരവേ പ്രതിയുടെ അവിവേകമായതും ഉപേക്ഷയാലുള്ളതുമായ പ്രവൃത്തിയില്‍ ഉണ്ടായ സംഭവത്തില്‍ വച്ച് പിറ്റേന്ന് വൈകിട്ട് 5 . 25 മണിക്ക് റോസക്ക് മരണം സംഭവിക്കുന്നതിനിടയാക്കിയെന്നാണ് കേസ്.


ഇന്ത്യന്‍ ശിക്ഷാ നിയമത്തിലെ വകുപ്പ് 304 ( എ) ( ഉപേക്ഷയാല്‍ മരണം സംഭവിപ്പിക്കല്‍) ചുമത്തിയാണ് പ്രതിയെ കോടതി വിചാരണ ചെയ്യുന്നത്.