പാലക്കാട് പട്ടാപ്പകല് വീട്ടില് അതിക്രമിച്ചു കയറി വീട്ടമ്മയെ കത്തി കാട്ടി ഭീഷണിപ്പെടുത്തി അലമാര കുത്തിത്തുറന്ന് 57 പവന് ആഭരണവും ഒന്നര ലക്ഷം രൂപയും കവര്ന്ന കേസില് നാലുപേര് പിടിയില്...
പാലക്കാട് പട്ടാപ്പകല് വീട്ടില് അതിക്രമിച്ചുകയറി വീട്ടമ്മയെ കത്തി കാട്ടി ഭീഷണിപ്പെടുത്തി അലമാര കുത്തിത്തുറന്ന് 57 പവന് ആഭരണവും ഒന്നര ലക്ഷം രൂപയും കവര്ന്ന കേസില് നാലുപേര് പിടിയിലായി.
പാലക്കാട് വടവന്നൂര് കൂത്തന്പാക്കം വീട്ടില് സുരേഷ് (34), വടവന്നൂര് കൂത്തന്പാക്കം വീട്ടില് വിജയകുമാര് (42), നന്ദിയോട് അയ്യപ്പന്ചള്ള വീട്ടില് റോബിന് (31), വണ്ടിത്താവളം പരുത്തിക്കാട്ട് മടപ്രദീപ് (38) എന്നിവരെയാണ് പാലക്കാട് കസബ പൊലീസ് അറസ്റ്റ് ചെയ്തത്.
കഴിഞ്ഞ 13ന് രാവിലെ 10.45നും 11.45നും ഇടക്കാണ് സംഭവം നടന്നത്. കല്മണ്ഡപം പ്രതിഭാനഗറില് അന്സാരിയുടെ ഭാര്യ ഷെഫീനയാണ് ആക്രമണത്തിനിരയായത്.
ഷെഫീന തനിച്ചായിരുന്നു വീട്ടില്. മുന്വശത്ത് പൂട്ടിയിട്ട വാതില് തുറന്ന് അകത്തുകയറിയ സംഘം ഷെഫീനയെ കത്തികാട്ടി ഭീഷണിപ്പെടുത്തി വായില് തുണി തിരുകി കയറുകൊണ്ട് കെട്ടിവച്ചു.
മുറിക്കുള്ളില് കയറി അലമാര തകര്ത്ത് ആഭരണങ്ങളും പണവുമായി വീട്ടിലെ ബൈക്കുമായി പുറത്തിറങ്ങിയ പ്രതികള് 100 മീറ്റര് അകലെ ബൈക്ക് ഉപേക്ഷിച്ച് ഓട്ടോറിക്ഷയില് കയറി പോകുകയു ചെയ്തു. കവര്ന്ന സ്വര്ണം 18,55,000 രൂപക്ക് കോയമ്പത്തൂരിലെ സേട്ടുവിന് വിറ്റത് അറസ്റ്റിലായ നാലുപേരാണ്. കവര്ച്ച നടത്തിയ പ്രതികളെക്കുറിച്ച് വ്യക്തമായ വിവരം ലഭിച്ചതായും ഉടന് അറസ്റ്റ് ചെയ്യുമെന്നും പൊലീസ് .
അന്വേഷണത്തിന്റെ തുടക്കത്തില് ഒരു തെളിവും ഇല്ലാതിരുന്ന കേസില് സി.സി ടി.വി കേന്ദ്രീകരിച്ചുള്ള അന്വേഷണമാണ് തുമ്പുണ്ടാക്കിയത്. കേസുമായി ബന്ധപ്പെട്ട് കൂടുതല് അറസ്റ്റ് ഉടനുണ്ടായേക്കും.
https://www.facebook.com/Malayalivartha