പള്സര് സുനിയുടെ ജാമ്യാപേക്ഷ തള്ളി ഹൈക്കോടതി
കൊച്ചിയില് നടിയെ ആക്രമിച്ച കേസില് തന്റെ ശിക്ഷ മരവിപ്പിക്കണമെന്ന് ആവശ്യപ്പെട്ട് ഒന്നാം പ്രതി സുനില് എന്.എസ്. എന്ന പള്സര് സുനി നല്കിയ ഹര്ജി ഹൈക്കോടതി തള്ളി. എറണാകുളം പ്രിന്സിപ്പല് സെഷന്സ് കോടതി വിധിച്ച 20 വര്ഷത്തെ കഠിനതടവ് മരവിപ്പിച്ച് ജാമ്യം അനുവദിക്കണമെന്ന ഹര്ജിയാണ് ജസ്റ്റിസ് രാജ വിജയരാഘവന്, ജസ്റ്റിസ് കെ.വി. ജയകുമാര് എന്നിവരടങ്ങിയ ഡിവിഷന് ബെഞ്ച് തള്ളിയത്.
വിചാരണക്കാലത്ത് അടക്കം ദീര്ഘകാലം ജയിലിലായിരുന്നു എന്നത് ശിക്ഷ മരവിപ്പിക്കാനുള്ള കാരണമായി കണക്കാക്കാനാവില്ലെന്ന് കോടതി പറഞ്ഞു. നടിയെ ആക്രമിക്കുകയും ദൃശ്യങ്ങള് പകര്ത്തുകയും ചെയ്ത കുറ്റകൃത്യത്തിന്റെ ഗൗരവം സമൂഹ മനഃസാക്ഷിയെ ഞെട്ടിക്കുന്നതും സ്ത്രീകളുടെ അന്തസ്സിനും സുരക്ഷയ്ക്കും വെല്ലുവിളിയുമാണ്. പ്രതിയുടെ ക്രിമിനല് പശ്ചാത്തലവും ജാമ്യവ്യവസ്ഥകള് ലംഘിച്ച ചരിത്രവും കണക്കിലെടുക്കുമ്പോള് ശിക്ഷ മരവിപ്പിക്കാന് തക്കതായ ഒരു അസാധാരണ സാഹചര്യവും നിലവിലില്ലെന്നും കോടതി വ്യക്തമാക്കി.
എട്ടു വര്ഷത്തോളം തടവുശിക്ഷ അനുഭവിച്ചു കഴിഞ്ഞു എന്നായിരുന്നു പള്സര് സുനിയുടെ വാദം. എന്നാല് ആസൂത്രണം ചെയ്തു നടത്തിയ കുറ്റകൃത്യമാണിതെന്ന് സ്പെഷല് പബ്ലിക് പ്രോസിക്യൂട്ടറും അതിജീവിതയ്ക്കു വേണ്ടി ഹാജരായ അഭിഭാഷകനും ചൂണ്ടിക്കാട്ടി. ഈ കുറ്റകൃത്യം ചെയ്ത രീതി മുന്പില്ലാത്ത വിധത്തിലുള്ളതാണ്. അത് സമൂഹത്തിന്റെ മനഃസാക്ഷിയെ ഞെട്ടിച്ചുവെന്നതു തള്ളിക്കളയാനാവില്ല. സ്ത്രീകളുടെ അന്തസ്സ്, സ്വന്തം ശരീരത്തിലുള്ള അവകാശം, സുരക്ഷിതത്വബോധം എന്നിവയ്ക്കു മേല് ആഞ്ഞടിച്ച ഒന്നുകൂടിയാണ് ഈ കുറ്റകൃത്യം. ഇത് നിയമവാഴ്ചയിലുള്ള പൊതുജനങ്ങളുടെ വിശ്വാസത്തെയും ക്രിമിനല് നീതിന്യായ വ്യവസ്ഥയെയും തകിടം മറിക്കുന്നതാണ്. അതുകൊണ്ടു തന്നെ ദീര്ഘകാലത്തെ ജയില്വാസം എന്നത് ശിക്ഷ മരവിപ്പിക്കുന്നതിനുള്ള ഒരു കാരണമായി കണക്കാക്കാനാവില്ല.
ഹര്ജിക്കാരന് ഈ കുറ്റകൃത്യത്തിലുള്ള പങ്ക്, കുറ്റകൃത്യത്തിന്റെ സ്വഭാവം, അതിന്റെ രീതിയും ഗൗരവവും തീവ്രതയും, വിചാരണക്കോടതി ചുമത്തിയ ശിക്ഷാവിധി, ഗുരുതരമായ മറ്റ് 11 കുറ്റകൃത്യങ്ങളില് പ്രതിയായ ഹര്ജിക്കാരന്റെ മുന്കാല ക്രിമിനല് പശ്ചാത്തലം, ഈ കേസില് ജാമ്യത്തിലിറങ്ങിയ സമയത്ത് മറ്റൊരു ക്രിമിനല് കേസില് കൂടി ഇയാള് ഉള്പ്പെട്ടതായി പറയപ്പെടുന്നത്, കോടതി ചുമത്തിയ ജാമ്യവ്യവസ്ഥകള് ലംഘിച്ചത് എന്നിവയെല്ലാം കണക്കിലെടുക്കുമ്പോള്, ശിക്ഷാവിധി മരവിപ്പിക്കാന് തക്കതായ യാതൊരു അസാധാരണ സാഹചര്യവും ബോധ്യപ്പെടുത്താന് സാധിച്ചിട്ടില്ലെന്ന് കോടതി വിലയിരുത്തി.
https://www.facebook.com/Malayalivartha
