ലെംഗിക പീഡന പരാതിയില് അന്വേഷണം നടത്താന് ഉത്തരവിട്ട നടപടിക്കെതിരെ ഹൈക്കോടതിയില് ഹര്ജി
മുതിര്ന്ന പൊലീസ് ഉദ്യോഗസ്ഥര്ക്കെതിരെ ഉയര്ന്ന ലൈംഗിക പീഡന പരാതിയില് അന്വേഷണം നടത്താന് ഉത്തരവിട്ട പൊന്നാനി മജിസ്ട്രേറ്റ് കോടതിയുടെ നടപടിക്കെതിരെ ഹൈക്കോടതിയില് ഹര്ജി. മുന് പൊന്നാനി സിഐ വിനോദ് വലിയാറ്റൂര്, മുന് താനൂര് ഡിവൈഎസ്പി ബെന്നി വി.വി, മുന് മലപ്പുറം എസ്പി സുജിത് ദാസ് എന്നിവരാണ് ഹൈക്കോടതിയെ സമീപിച്ചത്. തങ്ങള്ക്കെതിരെയുള്ള ആരോപണങ്ങള് പൂര്ണമായും കെട്ടിച്ചമച്ചതാണെന്ന് ഉദ്യോഗസ്ഥര് ഹര്ജിയില് പറയുന്നു.
2022ലാണ് കേസിനാസ്പദമായ സംഭവങ്ങളുടെ തുടക്കം. പൊന്നാനി എസ്എച്ച്ഒ ആയിരുന്ന വിനോദ്, വലിയാറ്റൂരിനരികില് പരാതിയുമായി എത്തിയ വീട്ടമ്മയെ പിന്നീട് വീട്ടിലെത്തി ബലാത്സംഗം ചെയ്തെന്നായിരുന്നു പരാതി. പിന്നീട് 2024ല് ഡിഐജിക്ക് നല്കിയ പരാതിയില് മുന് എസ്പിയും ഡിവൈഎസ്പിയും തന്നെ പീഡിപ്പിച്ചു എന്ന് വീട്ടമ്മ പറയുന്നു. എസ്എച്ച്ഒ പീഡിപ്പിച്ചതില് പരാതിപ്പെടാന് എത്തിയപ്പോഴായിരുന്നു ഇതെന്നായിരുന്നു വീട്ടമ്മ പറഞ്ഞത്. തുടര്ന്ന് ആദ്യം പൊന്നാനി മജിസ്ട്രേറ്റ് കോടതിയിലും പിന്നീട് ഹൈക്കോടതിയിലും കേസ് എത്തി. പൊലീസ് ഉദ്യോഗസ്ഥര്ക്കെതിരെ കേസ് എടുക്കാനുള്ള ഉത്തരവ് ഹൈക്കോടതി ഡിവിഷന് ബെഞ്ച് റദ്ദാക്കി. ഇതിനെതിരെ വീട്ടമ്മ സുപ്രീം കോടതിയില് പോയെങ്കിലും കേസില് ഇടപെടാന് വിസമ്മതിക്കുകയും മജിസ്ട്രേറ്റ് കോടതിയോട് തന്നെ വിഷയത്തില് തീര്പ്പുണ്ടാക്കാനും സുപ്രീം കോടതി നിര്ദേശിച്ചു. തുടര്ന്നാണ് കഴിഞ്ഞ ദിവസം പൊന്നാനി മജിസ്ട്രേറ്റ് കോടതി പൊലീസ് ഉദ്യോഗസ്ഥര്ക്കെതിരെ അന്വേഷണം പ്രഖ്യാപിച്ചത്. ഇതിനെതിരെയാണ് ഇപ്പോള് പൊലീസ് ഉദ്യോഗസ്ഥര് ഹൈക്കോടതിയെ സമീപിച്ചത്.
പുതിയ പരാതികള്ക്ക് പിന്നില് ഗൂഢാലോചന നടന്നിട്ടുണ്ടെന്ന് ഉദ്യോഗസ്ഥര് ഹര്ജിയില് ആരോപിക്കുന്നു. സര്ക്കാര് ഉദ്യോഗസ്ഥര്ക്കെതിരെയുള്ള പരാതികളില് കേസ് റജിസ്റ്റര് ചെയ്യാന് നിര്ദേശിക്കുന്നതിനു മുന്പായി മേലധികാരിയുടെ റിപ്പോര്ട്ടും പ്രതിസ്ഥാനത്തുള്ള ഉദ്യോഗസ്ഥന്റെ വിശദീകരണവും പരിശോധിക്കേണ്ടതുണ്ട്. ഹൈക്കോടതി ഡിവിഷന് ബെഞ്ചിന്റെയും സുപ്രീം കോടതിയുടെയും മുന് ഉത്തരവുകളിലെ നിര്ദേശങ്ങള് കാറ്റില്പ്പറത്തി മജിസ്ട്രേറ്റ് യാന്ത്രികമായി കേസ് റജിസ്റ്റര് ചെയ്യാന് പൊന്നാനി പൊലീസിനു നിര്ദേശം നല്കുകയായിരുന്നു എന്ന് ഹര്ജിയില് ആരോപിക്കുന്നു. മജിസ്ട്രേറ്റ് കോടതിയുടെ ഉത്തരവ് നിയമവിരുദ്ധമാണെന്നും അതിനാല് ഉത്തരവ് റദ്ദാക്കി തങ്ങള്ക്ക് അര്ഹമായ നിയമപരമായ പരിരക്ഷ ഉറപ്പാക്കണമെന്നുമാണ് ഉദ്യോഗസ്ഥര് ഹര്ജിയിലൂടെ ഹൈക്കോടതിയോട് ആവശ്യപ്പെട്ടിരിക്കുന്നത്.
https://www.facebook.com/Malayalivartha
