ബിഷപ്പിന്റെ പരാമര്‍ശം ക്രൈസ്തവവിഭാഗത്തിന്റെ മൊത്തം പ്രതികരണമല്ല, തലശേരി അതിരൂപത ആര്‍ച്ച് ബിഷപ്പ് മാര്‍ ജോസഫ് പാംപ്ലാനിയുടെ പ്രസ്താവന ബി.ജെ.പിക്ക് കേരളത്തിലേക്ക് കടക്കാന്‍ പഴുതുണ്ടാക്കാനുള്ള ശ്രമമാണോ എന്ന് സംശയിക്കണമെന്ന് സി.പി.എം സംസ്ഥാന സെക്രട്ടറി എം.വി.ഗോവിന്ദന്‍. പ്രസ്താവനയുടെ പേരില്‍ ഇടിഞ്ഞുപൊളിഞ്ഞ് വീഴുന്നതല്ല കേരളത്തിലെ മതേതരത്വം. റബര്‍വില കുറച്ചതിലെ പ്രധാനപ്രതി കേന്ദ്രസര്‍ക്കാരാണെന്നും എം.വി.ഗോവിന്ദന്‍ തിരുവനന്തപുരത്ത് പറഞ്ഞു. തലശേരി ആര്‍ച്ച് ബിഷപ് ഗോള്‍വാള്‍ക്കറിന്റെ പുസ്തകങ്ങള്‍ വായിക്കണമെന്ന് സിപിഐ നേതാവ് ബിനോയ് വിശ്വം പ്രതികരിച്ചു. വിചാരധാരയില്‍ പറയുന്ന രണ്ടാമത്തെ ആഭ്യന്തര ശത്രു ക്രൈസ്തവരാണ്. കേരളത്തെ ബിഷപ്പും ബി.ജെ.പിയും മനസിലാക്കിയിട്ടില്ല എന്നും വി.മുരളീധരന്റെ വാക്കുകള്‍ വിശ്വസിക്കുന്നത് ആത്മഹത്യാപരമെന്നും ബിനോയ് വിശ്വം പറഞ്ഞു.

ബിജെപിക്ക് വോട്ട് പിടിക്കുന്നുവെന്ന് പറഞ്ഞ് താന്‍ പറഞ്ഞ കാര്യങ്ങളെ തമസ്‌ക്കരിക്കാമെന്ന് ആരും സ്വപ്നം കാണേണ്ടന്ന് തലശേരി അതിരൂപത ആര്‍ച്ച് ബിഷപ്പ് മാര്‍ ജോസഫ് പാംപ്ലാനി പറഞ്ഞു. കര്‍ഷകന്റെ കാര്യം പറയുമ്പോള്‍ ബിജെപിയെന്ന് നിലവിളിച്ചിട്ട് കാര്യമില്ല. ന്യൂനപക്ഷത്തിന്റെ സംരക്ഷണം മൊത്തമായി ഏതെങ്കിലും രാഷ്ട്രീയ പാര്‍ട്ടി ഏറ്റെടുത്തിട്ടുള്ളതായി കരുതുന്നില്ലെന്നും മാര്‍ ജോസഫ് പാംപ്ലാനി പറഞ്ഞു. അതിനിടെ കഴിഞ്ഞ ചൊവ്വാഴ്ച പാംപ്ലാനിയുമായി ബി ജെ പി നേതാക്കള്‍ കൂടിക്കാഴ്ച്ച നടത്തുന്ന ചിത്രങ്ങള്‍ പുറത്തു വന്നു.

പഴയ നിപാടില്‍ ഉറച്ചു നില്‍ക്കുന്നുവെന്ന് പറഞ്ഞ മാര്‍ ജോസഫ് പാംപ്ലാനി ബി ജെ പിയെന്ന് പറഞ്ഞ് തങ്ങള്‍ ഉന്നയിച്ച വിഷയത്തെ ലഘുകരിക്കണ്ടെന്നും വ്യക്തമാക്കുന്നു. എം.വി.ഗോവിന്ദനും സി പി എമ്മും പറയുന്നത് അവരുടെ രാഷ്ട്രീയം. ഞങ്ങള്‍ ആര്‍ക്കും ചുവന്ന പരവതാനി വിരിക്കാന്‍ ആഗ്രഹിക്കുന്നില്ല. കെ സി വേണുഗോപാലിന്റെ പാര്‍ട്ടി കേന്ദ്രം ഭരിച്ചപ്പോള്‍ മലയോര കര്‍ഷകനു വേണ്ടി എന്തു ചെയ്തുവെന്നു ചോദിക്കുന്നു.

അതേസമയം, കേരളത്തില്‍ ബിഷപ്പുമാര്‍ക്ക് അഭിപ്രായസ്വാതന്ത്ര്യം നിഷേധിക്കുന്നുവെന്ന് കേന്ദ്ര സഹമന്ത്രി വി.മുരളീധരന്‍ പറഞ്ഞു. ക്രൈസ്തവ പുരോഹിതര്‍ വസ്തുതകള്‍ പറയുമ്പോള്‍ വളഞ്ഞിട്ടാക്രമിക്കുന്നു. റബറിന്റെ കാര്യത്തില്‍ കേന്ദ്ര സര്‍ക്കാര്‍ ആവശ്യമായ നടപടി സ്വീകരിക്കുന്നുണ്ടെന്നും വി.മുരളീധരന്‍ പറഞ്ഞു.