ശമ്പള വിതരണം വൈകുന്നതിനെതിരെ കെ.എസ്.ആര്‍.ടി.സിയില്‍ തൊഴിലാളി യൂണിയനുകളുടെ സംയുക്ത പ്രതിഷേധം ഇന്ന് മുതല്‍. സി.ഐ.ടി.യു, ഐ.എന്‍.ടി.യു.സി എന്നിവ ചേര്‍ന്നാണ് പ്രതിഷേധ ധര്‍ണ നടത്തുന്നത്.


കെ.എസ്.ആര്‍.ടി.സി തിരുവനന്തപുരം ചീഫ് ഓഫിസിന് മുന്നില്‍ രാവിലെ പത്തരക്കാണ് സമരം ആരംഭിക്കുക. ഇതിന് ശേഷം തുടര്‍സമരങ്ങളും ആസൂത്രണം ചെയ്യും. തമ്പാനൂര്‍ സെന്‍ട്രല്‍ ഡിപ്പോക്ക് മുന്നിലായി ബി.ജെ.പി അനുകൂല സംഘടന ബി.എം.എസിന്റെ നേതൃത്വത്തില്‍ 12 മണിക്കൂര്‍ പട്ടിണി സമരവും ഇന്ന് നടക്കുന്നുണ്ട്. മാര്‍ച്ചിലെ ശമ്പളത്തിന്റെ ആദ്യ ഗഡു മാത്രമാണ് ഇതുവരെ ജീവനക്കാര്‍ക്ക് കിട്ടിയത്.

വിഷുവിന് മുമ്പ് രണ്ടാം ഗഡു ലഭിക്കുമെന്ന് പ്രതീക്ഷിച്ചിരുന്നെങ്കിലും ഇത് കിട്ടാതിരുന്നതാണ് സംയുക്ത പ്രതിഷേധത്തിലേക്ക് നയിച്ചത്.