പ്രതിഷേധത്തിനിടെ അറസ്റ്റിലായ രാഹുല് ഗാന്ധിയെയും പ്രിയങ്ക ഗാന്ധിയെയും മറ്റ് നേതാക്കളെയും പൊലീസ് വിട്ടയച്ചു
പ്രധാനമന്ത്രിയുടെ വസതിക്ക് മുന്നില് നടന്ന പ്രക്ഷോഭത്തില് പൊലീസ് ബലപ്രയോഗത്തിലൂടെ അറസ്റ്റ് ചെയ്ത് നീക്കിയ പ്രതിപക്ഷ നേതാവ് രാഹുല് ഗാന്ധിയും പ്രിയങ്ക ഗാന്ധിയും ഉള്പ്പെടെയുള്ള എല്ലാ എം പിമാരെയും വിട്ടയച്ചു. ഛത്രസാല് പൊലീസ് സ്റ്റേഷനില് നിന്നാണ് രാഹുല് ഗാന്ധിയെയും കെ സി വേണുഗോപാലിനെയും സമാജ്വാദി പാര്ട്ടി അധ്യക്ഷന് അഖിലേഷ് യാദവിനെയും വിട്ടയച്ചത്. പ്രിയങ്ക ഗാന്ധിയെ മന്ദിര് മാര്ഗ് പൊലീസ് സ്റ്റേഷനില് നിന്നുമാണ് പുറത്തുവിട്ടത്.
നേതാക്കളെ കാണാന് മുതിര്ന്ന കോണ്ഗ്രസ് നേതാവ് സോണിയ ഗാന്ധിയും മന്ദിര് മാര്ഗ് പൊലീസ് സ്റ്റേഷനിലെത്തിയിരുന്നു. രാത്രി ഒമ്പതരയോടെയാണ് നേതാക്കളെയെല്ലാം പൊലീസ് വിട്ടയച്ചത്. നേതാക്കളെ കൊണ്ടുവന്നതിന് പിന്നാലെ ഛത്രസാലിലും മന്ദിര് മാര്ഗിലും വലിയ തോതില് പ്രവര്ത്തകര് ഒഴുകിയെത്തിയിരുന്നു. വീണ്ടും സംഘര്ഷ സാധ്യതയിലേക്ക് നീങ്ങിയതോടെയാണ് നേതാക്കളെയെല്ലാം പൊലീസ് വിട്ടയക്കാന് തീരുമാനിച്ചത്.
ബലപ്രയോഗത്തിനിടെ തന്റെ വസ്ത്രമടക്കം പൊലീസ് വലിച്ചുകീറിയെന്ന് പ്രിയങ്ക ആരോപിച്ചു. ശാന്തമായി പ്രതിഷേധിക്കുക എന്നത് ഭരണഘടനാപരമായ അവകാശമാണെന്നും, കേന്ദ്ര സര്ക്കാരും പൊലീസും ചേര്ന്ന് വിദ്യാര്ത്ഥികളുടെയും ജനപ്രതിനിധികളുടെയും ശബ്ദത്തെ ക്രൂരമായി അടിച്ചമര്ത്താനാണ് ശ്രമിക്കുന്നതെന്നും അവര് കുറ്റപ്പെടുത്തി. പാര്ലമെന്റിലും പുറത്തും നാളെ മുതല് അതിശക്തമായ പ്രക്ഷോഭങ്ങള് സംഘടിപ്പിക്കുമെന്നും പ്രിയങ്ക കൂട്ടിച്ചേര്ത്തു.
https://www.facebook.com/Malayalivartha
