ഒന്നാം ചരമവാര്ഷികത്തില് വി എസ്സിനെ അനുസ്മരിച്ച് പിണറായി
വി എസ് അച്യുതാനന്ദന്റെ ഒന്നാം ചരമവാര്ഷികത്തോടനുബന്ധിച്ച് വലിയചുടുകാട്ടില് വിപുലമായ അനുസ്മരണ പരിപാടികള് സംഘടിപ്പിച്ചു. മുന് മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്, സി പി എം സംസ്ഥാന സെക്രട്ടറി എം വി ഗോവിന്ദന് തുടങ്ങിയ മുതിര്ന്ന നേതാക്കളും നിരവധിയായ പ്രവര്ത്തകരും സ്മൃതിമണ്ഡപത്തിലെത്തി പുഷ്പാര്ച്ചന നടത്തി. തുടര്ന്ന് നടന്ന അനുസ്മരണ യോഗത്തില് വി എസിന് പകരക്കാരനായി വി എസ് മാത്രമേയുള്ളൂവെന്നും, പാര്ട്ടിയെ കരുത്തുറ്റ പ്രസ്ഥാനമാക്കി മാറ്റാന് അദ്ദേഹം നല്കിയ നേതൃത്വം നിര്ണായകമായിരുന്നുവെന്നും പിണറായി വിജയന് അനുസ്മരിച്ചു. വി എസ് വിട പറഞ്ഞ ഒരു വര്ഷക്കാലം പ്രയാസങ്ങളുടെ കാലമാണെന്നും പിണറായി ചൂണ്ടിക്കാട്ടി. പാര്ട്ടി, നാട്, നാട്ടുകാര് എല്ലാവര്ക്കും പ്രയാസകാലം തന്നെ. കേരളത്തില് പല ആളുകളിലും അസ്വസ്ഥതത നില നില്ക്കുന്നുവെന്നും ഇറാന് യുദ്ധമടക്കം ഇതിന് കാരണമാണെന്നും പിണറായി വിവരിച്ചു.
വി എസ് അനുസ്മരണ പ്രസംഗത്തില് ദില്ലിയില് നടക്കുന്ന വിദ്യാര്ത്ഥി പ്രക്ഷോഭങ്ങളെ പരാമര്ശിച്ച പിണറായി വിജയന്, കേന്ദ്ര സര്ക്കാരിനെതിരെ രൂക്ഷമായ വിമര്ശനമുന്നയിച്ചു. ദില്ലിയില് ഉയര്ന്നുവന്ന പ്രതിഷേധങ്ങളെയും നിരാഹാര സമരങ്ങളെയും തുടക്കത്തില് ബി ജെ പി സര്ക്കാര് നിസ്സാരമായി കണ്ടുവെങ്കിലും, പ്രക്ഷോഭം കൂടുതല് ശക്തമായതോടെ ഒടുവില് ചര്ച്ചയ്ക്ക് വഴങ്ങേണ്ടി വന്നുവെന്ന് അദ്ദേഹം ചൂണ്ടിക്കാട്ടി. കേന്ദ്ര സര്ക്കാരിന്റെ തെറ്റായ നയങ്ങള് രാജ്യത്തെ പുറകോട്ട് അടിക്കുകയാണെന്നും ആര് എസ് എസ് നയിക്കുന്ന ഭരണകൂടത്തിന് ഭരണഘടനയെ അംഗീകരിക്കാന് കഴിയുന്നില്ലെന്നും അദ്ദേഹം കുറ്റപ്പെടുത്തി.
https://www.facebook.com/Malayalivartha
