ഓട്ടോറിക്ഷയും കാറും കൂട്ടിയിടിച്ച് അപകടമുണ്ടായപ്പോള്‍ നഷ്ടപരിഹാരമായി കാറുകാരന്‍ പണം ആവശ്യപ്പെട്ടതില്‍ മനംനൊന്ത് ഓട്ടോറിക്ഷാ ഡ്രൈവര്‍ ആത്മഹത്യ ചെയ്തതായി കുടുംബത്തിന്റെ ആരോപണം...

കാറുകാരന്‍ 48,000 രൂപ ആവശ്യപ്പെട്ടതില്‍ ഏറെ വിഷമത്തിലായിരുന്നു യുവാവ്. നാട്ടുകാര്‍ക്ക് മുന്നില്‍ വച്ചുള്ള അധിക്ഷേപങ്ങളില്‍ മനംനൊന്ത് ഓട്ടോ ഡ്രൈവര്‍ ആയ 21 കാരന്‍ ആത്മഹത്യ ചെയ്തതായാണ് കുടുംബം പറയുന്നത്.

വിഴിഞ്ഞം ഉച്ചക്കട എസ് എസ് നിവാസില്‍ ആദര്‍ശ് എസ് എസ് ആണ് വെള്ളിയാഴ്ച രാത്രി ആത്മഹത്യ ചെയ്തത്. വെള്ളിയാഴ്ച രാത്രി 7 മണിയോടെ ഉച്ചക്കട - പയറ്റുവിള റോഡില്‍ ഹനുമാന്‍ സ്വാമി ക്ഷേത്രത്തിന് സമീപത്തായി ആദര്‍ശ് ഓടിച്ചിരുന്ന ഓട്ടോറിക്ഷയും ഒരു സ്വിഫ്റ്റ് കാറുമായി കൂട്ടിയിടിച്ചിരുന്നു.

കാറില്‍ ഇടിച്ച ശേഷം നിയന്ത്രണം വിട്ട ഓട്ടോറിക്ഷ സമീപത്തെ പോസ്റ്റില്‍ ഇടിച്ചാണ് നിന്നത്. അപകടത്തില്‍ ആദര്‍ശിന് കാലിന് പരിക്ക് പറ്റിയിരുന്നു. തുടര്‍ന്ന് കാര്‍ ഓടിച്ചിരുന്ന യുവാവ് ഓട്ടോറിക്ഷ ലൈറ്റ് ഇല്ലാതെ വന്ന് ഇടിച്ചതാണെന്നും അതിനാല്‍ വാഹനം കണ്ടില്ലെന്നും ആദര്‍ശ് മദ്യപിച്ചാണ് വാഹനം ഓടിച്ചതെന്നും തടിച്ചുകൂടിയ നാട്ടുകാര്‍ക്ക് മുന്നില്‍ ആരോപണം ഉന്നയിച്ചു.


അപകടത്തില്‍ കാറിനും ഓട്ടോറിക്ഷയ്ക്കും കേടുപാടുകള്‍ സംഭവിച്ചിരുന്നു. ഇന്‍ഷുറന്‍സ് ക്ലെയിം ചെയ്യാമെന്ന് ആദര്‍ശ് പറഞ്ഞെങ്കിലും കാര്‍ ഓടിച്ചിരുന്ന യുവാവ് ഇതിന് തയ്യാറായില്ല. തനിക്ക് തേര്‍ഡ് പാര്‍ട്ടി ഇന്‍ഷുറന്‍സ് ആണ് ഉള്ളത് എന്നും അതിനാല്‍ വാഹനം അറ്റകുറ്റപ്പണികള്‍ ചെയ്യാന്‍ 48,000 നഷ്ടപരിഹാരം വേണമെന്നും യുവാവ് ആദര്‍ശിനോട് ആവശ്യപ്പെട്ടതായി കുടുംബം പറയുന്നു. അപകട സ്ഥലത്തിന് സമീപം ആണ് ആദര്‍ശിന്റെ വീട്.

വീട്ടില്‍ നിന്ന് പോകുന്ന വഴിക്കാണ് അപകടമെന്ന് ബന്ധുക്കള്‍ . സംഭവമറിഞ്ഞ് സ്ഥലത്തെത്തിയ ആദര്‍ശിന്റെ സഹോദരന്‍ അനൂപ് എന്ത് ചെയ്യണമെന്ന് അറിയാതെ ഭയന്ന് നിന്ന ആദര്‍ശിനോട് വീട്ടിലേക്ക് പോകാനായി ആവശ്യപ്പെട്ടു. തുടര്‍ന്ന് സ്ഥലത്തെത്തിയ പൊലീസ് സംഘത്തിനോടും കാറോടിച്ചിരുന്ന യുവാവിനോടും അനൂപ് ഇന്‍ഷുറന്‍സ് ക്ലെയിം ചെയ്യുന്ന കാര്യങ്ങള്‍ ചര്‍ച്ചചെയ്‌തെങ്കിലും കാര്‍ ഓടിച്ചിരുന്ന യുവാവ് വാഹനത്തിന് തേര്‍ഡ് പാര്‍ട്ടി ഇന്‍ഷുറന്‍സ് ആയതിനാല്‍ വാഹനം ശരിയാക്കാന്‍ സര്‍വീസ് സെന്ററില്‍ നിന്ന് പറഞ്ഞ 48,000 രൂപ നഷ്ടപരിഹാരം വേണമെന്ന് നിലപാടില്‍ തന്നെ ഉറച്ചുനിന്നു.


ഇതിനിടയില്‍ വീട്ടിലേക്ക് പോയ ആദര്‍ശിനെ ആശുപത്രിയിലേക്ക് കൊണ്ടുപോകാനായി എത്തിയ പിതൃ സഹോദരനാണ് ആദര്‍ശ് വീടിനുള്ളില്‍ തൂങ്ങി നില്‍ക്കുന്നത് കാണുന്നത്. ഉടനെ അദ്ദേഹം അപകട സ്ഥലത്ത് ഓടിയെത്തി ആദര്‍ശിന്റെ സഹോദരന്‍ അനൂപിനോടും നാട്ടുകാരോടും വിവരം പറഞ്ഞു. ഇവര്‍ എത്തി ആദര്‍ശിനെ ഉടന്‍ തന്നെ നെയ്യാറ്റിന്‍കരയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അന്ന് രാത്രി തന്നെ അപകടത്തില്‍പ്പെട്ട കാര്‍ സ്ഥലത്തുനിന്ന് മാറ്റിയതായി ആദര്‍ശിന്റെ കുടുംബം ആരോപിക്കുന്നു.


സമീപത്തെ സിസിടിവി ക്യാമറയില്‍ അപകടത്തിന്റെ ദൃശ്യങ്ങള്‍ പതിഞ്ഞിട്ടുണ്ട്. ബൈക്കിന് ഓവര്‍ടേക്ക് ചെയ്ത് വരുന്ന ഓട്ടോറിക്ഷയും എതിര്‍ദിശയില്‍ നിന്ന് വരുന്ന കാറും കൂട്ടിയിടിക്കുന്നതും തുടര്‍ന്ന് ഓട്ടോറിക്ഷ നിയന്ത്രണം വിട്ടു സമീപത്തെ പോസ്റ്റില്‍ ഇടിക്കുന്നതും ദൃശ്യങ്ങളില്‍ വ്യക്തമാണ്.

എന്നാല്‍ കാര്‍ ഓടിച്ചിരുന്ന യുവാവിന്റെ ആരോപണം തള്ളി ഓട്ടോറിക്ഷ ഹെഡ് ലൈറ്റ് ഇട്ടാണ് വന്നതെന്ന് ദൃശ്യങ്ങളില്‍ കാണാന്‍ സാധിക്കും. കാര്‍ ഓടിച്ചിരുന്ന യുവാവിന്റെ അധിക്ഷേപം കാരണമാണ് ആദര്‍ശ് ആത്മഹത്യ ചെയ്തതെന്നും സംഭവത്തില്‍ നടപടി സ്വീകരിക്കണമെന്നും ആവശ്യപ്പെട്ട് മുഖ്യമന്ത്രിക്കും സംസ്ഥാന പൊലീസ് മേധാവിക്കും പരാതി നല്‍കിയതായി മരിച്ച ആദര്‍ശിന്റെ സഹോദരന്‍് പറഞ്ഞു

കാറോടിച്ചിരുന്ന വ്യക്തി നാട്ടുകാര്‍ക്ക് മുമ്പില്‍ വച്ച് അധിക്ഷേപിച്ചതും അമിതമായ തുക ആവശ്യപ്പെട്ടതിലുമുള്ള മാനസിക സംഘര്‍ഷവും മനോവിഷമവും ആണ് ആദര്‍ശിന്റെ ആത്മഹത്യയ്ക്ക് കാരണമെന്നാണ് കുടുംബത്തിന്റെ ആരോപണം.