കോഴിക്കോട് കട്ടിപ്പാറയിലെ ആദിവാസി യുവതി ലീലയെ കൊലപ്പെടുത്തിയ സംഭവത്തില്‍ സഹോദരി ഭര്‍ത്താവ് രാജനെ കൊലപാതക കുറ്റം ചുമത്തി അറസ്റ്റ് ചെയ്തു. മദ്യലഹരിയില്‍ ഉണ്ടായ തര്‍ക്കമാണ് കൊലപാതകത്തില്‍ കലാശിച്ചത്.

കൊന്നത് കഴുത്ത് ഞെരിച്ചെന്നാണ് പോസ്റ്റ്‌മോര്‍ട്ടം റിപ്പോര്‍ട്ടില്‍ കണ്ടെത്തല്‍. രണ്ടാഴ്ചയിലേറെ കാണാതായ ശേഷം കഴിഞ്ഞ ചൊവ്വാഴ്ചയാണ് ലീലയുടെ മൃതദേഹം ഉള്‍വനത്തില്‍ നിന്ന് കണ്ടെത്തിയത്. കാണാതായ ദിവസം ലീലയും ഭര്‍ത്താവ് രാജഗോപാലും, രാജനും ചേര്‍ന്ന് മദ്യപിച്ചിരുന്നുവെന്നാണ് വിവരം.

മൃതദേഹം കണ്ടെത്തിയതിന് പിന്നാലെ രാജനെ പൊലീസ് കസ്റ്റഡിയിലെടുത്തിരുന്നു. ലീലയുടെ കൊലപാതകത്തില്‍ രാജന് പങ്കുള്ളതായി ചിലര്‍ മൊഴി നല്‍കിയിരുന്നു.

ഇരുപത് ദിവസം മുമ്പാണ് ലീലയെ വീട്ടില്‍ നിന്നും കാണാതാവുന്നത്. പോലീസും വനം വകുപ്പ് ഉദ്യോഗസ്ഥരും ചേര്‍ന്ന് വനത്തിനുള്ളില്‍ നടത്തിയ തെരച്ചിലിലാണ് അഴുകിയ നിലയില്‍ മൃതദേഹം കണ്ടെത്തിയത്.