ഗവർണർ ആരിഫ് മുഹമ്മദ് ഖാന്റെ കാലാവധി 2024 സെപ്റ്റംബറിൽ അവസാനിക്കുന്നതുവരെ സർക്കാരിനു താൽപര്യമുള്ളവർക്കു വിസിയുടെ താൽക്കാലിക ചുമതല നൽകി മുന്നോട്ടു പോകാനാണു നീക്കം. മലയാളം സർവകലാശാല വൈസ് ചാൻസലറുടെ ചുമതലയും ഇപ്പോൾ ഡോ. സാബു തോമസിനാണ്. അവിടെയും താൽക്കാലിക വിസി വരും.

പുതിയ വൈസ് ചാൻസലറെ കണ്ടെത്താനുള്ള സേർച് കമ്മിറ്റി ഇതുവരെ രൂപീകരിച്ചിട്ടില്ല. സേർച് കമ്മിറ്റിയിൽ ചാൻസലർ കൂടിയായ ഗവർണറുടെ പ്രതിനിധിയും യുജിസി പ്രതിനിധിയും സർവകലാശാലാ പ്രതിനിധിയുമാണ് വേണ്ടത്. യുജിസി പ്രതിനിധിയായി മിസോറം സർവകലാശാല മുൻ വിസി പ്രഫ. കെ.ആർ.എസ്. സാംബശിവ റാവുവിന്റെ പേര് ഗവർണർ നൽകിയിരുന്നു. ഗവർണറുടെ പ്രതിനിധിയുടെ പേരു കൂടി വന്നാലും സർവകലാശാലയുടെ പ്രതിനിധിയുടെ പേര് നൽകാതെ നീട്ടിക്കൊണ്ടുപോകാനാണ് ആലോചന.

വൈസ് ചാൻസലർക്കു യാത്രയയപ്പ് നൽകാൻ എംജിയിൽ സെനറ്റ് യോഗം ചേരുമെങ്കിലും സേർച് കമ്മിറ്റിയിലേക്കു സർവകലാശാല പ്രതിനിധിയുടെ പേര് നിശ്ചയിക്കുന്നത് അജൻഡയിൽ ഉൾപ്പെടുത്തേണ്ടെന്നാണു തീരുമാനമെന്നറിയുന്നു. കേരള, സാങ്കേതിക, കാർഷിക, ഫിഷറീസ്, കലാമണ്ഡലം, നിയമം, കുസാറ്റ്, മലയാളം സർവകലാശാലകളിൽ ഇപ്പോൾ സ്ഥിരം വിസി ഇല്ല.

സാങ്കേതിക സർവകലാശാലയിൽ ( കെടിയു ) താൽക്കാലിക വൈസ് ചാൻസലറുടെ നിയമന കാലാവധി സർവകലാശാലാ നിയമം അനുസരിച്ച് അവസാനിച്ചു.
ഡിജിറ്റൽ യൂണിവേഴ്സിറ്റി വിസി ഡോ.സജി ഗോപിനാഥ് താൽക്കാലിക ചുമതലയിൽ തുടരുന്നതു തടയണമെന്നും യുജിസി ചട്ട പ്രകാരം സേർച് കമ്മിറ്റി രൂപീകരിച്ചു സ്ഥിരം വിസിയെ നിയമിക്കണമെന്നും ആവശ്യപ്പെട്ട് സേവ് യൂണിവേഴ്സിറ്റി ക്യാംപെയ്ൻ കമ്മിറ്റി ഗവർണർക്കു നിവേദനം നൽകി. ഇതു പരിശോധിച്ച ശേഷം ഗവർണർ സർക്കാരിനോടു വിശദീകരണം തേടാനാണു സാധ്യത.

വിസിയുടെ താൽക്കാലിക ചുമതല പരമാവധി 6 മാസം വരെ മാത്രമേ നൽകാൻ പാടുള്ളൂ എന്നു സർവകലാശാലാ നിയമത്തിലെ വകുപ്പ് 13 (7) ൽ വ്യവസ്ഥ ചെയ്തിട്ടുണ്ട്. ഇന്നു മുതൽ വിസി ഒപ്പിടുന്ന ഡിഗ്രി സർട്ടിഫിക്കറ്റുകൾക്ക് നിയമ സാധുതയില്ലെന്നും ചട്ട വിരുദ്ധമായി 6 സിൻഡിക്കറ്റ് അംഗങ്ങൾ തുടരുന്ന പോലെ വിസിയും തുടർന്നാൽ നിയമ നടപടി സ്വീകരിക്കുമെന്നും ക്യാംപെയ്ൻ കമ്മിറ്റി നിവേദനത്തിൽ പറയുന്നു.