മിസ്റ്റര്‍ കേരള ട്രാന്‍സ്‌മെന്‍ പ്രവീണ്‍നാഥിന്റെ ആത്മഹത്യയില്‍ ഭാര്യ റിഷാന ഐഷുവിനെതിരെ ആരോപണവുമായി കുടുംബം. റിഷാന പതിവായി പ്രവീണിനെ മര്‍ദിച്ചിരുന്നതായാണ് പുറത്തുവരുന്ന വിവരം. കരിയര്‍ നശിപ്പിക്കുമെന്ന് ഭീഷണിപ്പെടുത്തി. സൈബര്‍ ബുള്ളീയിംഗിന്റെ പേരിലല്ല ആത്മഹത്യയെന്നും റിഷാനയ്‌ക്കെതിരെ പരാതിയുമായി മുന്നോട്ട് പോകുമെന്നും സഹോദരന്‍ പുഷ്പന്‍ പറഞ്ഞു.

ഇന്നലെയാണ് വിഷം കഴിച്ച് ആത്മഹത്യയ്ക്ക് ശ്രമിച്ച പ്രവീണ്‍ നാഥ് മരിച്ചത്. തൃശൂര്‍ മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയാണ് മരണം. പ്രവീണിന്റെ മരണത്തിന് പിന്നാലെ റിഷാനയും ആത്മഹത്യയ്ക്ക് ശ്രമിച്ചിരുന്നു. വിഷം കഴിച്ച റിഷാന ഇപ്പോള്‍ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. മിസ്റ്റര്‍ കേരള ട്രാന്‍സ്‌മെന്‍ എന്ന രീതിയില്‍ പ്രശസ്തനായിരുന്നു പ്രവീണ്‍. പാലക്കാട് നെന്‍മാറയിലുള്ള എലവഞ്ചേരിയാണ് പ്രവീണിന്റെ സ്വദേശം. ട്രാന്‍സ് വുമണായ റിഷാന ഐഷുവും പ്രവീണ്‍ നാഥും കഴിഞ്ഞ ഫെബ്രുവരി 14നാണ് വിവാഹിതരായത്.

'പ്രവീണിന് കടുത്ത ശാരീരിക മര്‍ദ്ദനമേറ്റിറ്റുണ്ട്. കയ്യിലും തലയിലും പാടുകളുണ്ടായിരുന്നു. വീട്ടില്‍ വന്ന ദിവസം ഭക്ഷണം ഇറക്കാന്‍ പറ്റുന്നില്ലാന്ന് പറഞ്ഞ് ആശുപത്രിയില്‍ പോയിരുന്നു. അന്ന് ചികിത്സ തേടിയതിന്റെ തെളിവുകള്‍ ഉണ്ട്. പ്രവീണിന്റെ ഭാര്യ അവനെ കസേരയില്‍ കെട്ടിയിട്ട് വായില്‍ തുണി തിരുകി ഉപദ്രവിച്ചു എന്ന് പറഞ്ഞ് കരച്ചിലായിരുന്നു. ഈ സംഭവം കഴിഞ്ഞ് നാല് ദിവസത്തിന് ശേഷമാണ് വിവാഹമോചനത്തെ കുറിച്ച് സമൂഹമാദ്ധ്യമങ്ങളില്‍ പോസ്റ്റിടുന്നത്. കുറച്ച് ദിവസങ്ങള്‍ക്ക് ശേഷം റിഷാന ഭീഷണിപ്പെടുത്തിയാണ് ആ പോസ്റ്റ് പിന്‍വലിച്ചത്.' പുഷ്പന്‍ പറഞ്ഞു.