നടിയെ ആക്രമിച്ച കേസ്...വിചാരണ വൈകുന്നതിന് പിന്നില് നടന് ദിലീപിന്റെ അഭിഭാഷകരാണെന്ന് സര്ക്കാര്
കൊച്ചിയില് നടിയെ ആക്രമിച്ച കേസില് വിചാരണ വൈകുന്നതിന് പിന്നില് നടന് ദിലീപിന്റെ അഭിഭാഷകരാണെന്ന് സര്ക്കാര് സുപ്രീംകോടതിയെ അറിയിച്ചു. സാക്ഷിയായ സംവിധായകന് ബാലചന്ദ്രകുമാറിന്റെ വിസ്താരം ദിലീപിന്റെ അഭിഭാഷകര് നീട്ടിക്കൊണ്ടു പോകുകയാണെന്നും വിചാരണ വൈകുന്നതിന് കാരണം ഇതാണെന്നും സര്ക്കാര് സുപ്രീംകോടതിയില് വ്യക്തമാക്കി.
അതേസമയം കേസിന്റെ വിചാരണ ജൂലായ് 31നകം പൂര്ത്തിയാക്കണമെന്ന് സുപ്രീംകോടതി ഉത്തരവിട്ടു. കേസ് ആഗസ്റ്റ് നാലിന് വീണ്ടും പരിഗണിക്കും. അതിനുള്ളില് വിചാരണ പൂര്ത്തിയാക്കി റിപ്പോര്ട്ട് സമര്പ്പിക്കണമെന്നും ജസ്റ്റിസ് ദിനേഷ് മഹേശ്വരി അദ്ധ്യക്ഷനായ ബെഞ്ച് ഉത്തരവിട്ടു. ഓരോ തവണയും കേസിന്റെ പുരോഗതി സംബന്ധിച്ച് ഒരേ തരത്തിലുള്ള റിപ്പോര്ട്ടാണ് വിചാരണ കോടതി ജഡ്ജി അയക്കുന്നതെന്നും ജസ്റ്റിസ് ദിനേശ് മഹേശ്വരി ചൂണ്ടിക്കാട്ടി.
23 ദിവസമായി എതിര് വിഭാഗം ക്രോസ് എക്സാമിനേഷന് നടത്തുകയാണെന്ന് സംസ്ഥാനത്തിനായി ഹാജരായ മുതിര്ന്ന അഭിഭാഷകന് രഞ്ജിത്ത് കുമാര്, സ്റ്റാന്ഡിംഗ് കൗണ്സല് നിഷേ രാജന് ഷൊങ്കര് എന്നിവര് കോടതിയെ അറിയിച്ചു. എന്നാല് ഓണ്ലൈന് വിചാരണയില് സാങ്കേതിക പ്രശ്നങ്ങള് ഉണ്ടാകുന്നതിന് കാരണം താനല്ലെന്ന് ദിലീപ് വാദിച്ചു. വിസ്താരം പൂര്ത്തിയാക്കാന് അഞ്ചു ദിവസംകൂടി വേണമെന്നും ദിലീപിന്റെ അഭിഭാഷക രഞ്ജിത റോത്തഗി കോടതിയോട് ആവശ്യപ്പെട്ടു.
https://www.facebook.com/Malayalivartha
