കുമ്മനം രാജശേഖരന് ബിജെപി അധ്യക്ഷന്, ഔദ്യോഗിക പ്രഖ്യാപനം ഇന്നുണ്ടാകുമെന്ന് സൂചന
ബി.ജെ.പിയുടെ പുതിയ സംസ്ഥാന പ്രസിഡന്റായി കുമ്മനം രാജശേഖരനെ ഇന്ന് പ്രഖ്യാപിച്ചേക്കും. ബുധനാഴ്ച ന്യൂഡല്ഹിയില് ചേര്ന്ന ബി.ജെ.പി കോര് കമ്മിറ്റി യോഗത്തിലാണ് കുമ്മനത്തെ സംസ്ഥാന പ്രസിഡന്റാക്കാന് തീരുമാനമെടുത്തത്. ഹിന്ദു ഐക്യവേദി സംസ്ഥാന ജനറല് സെക്രട്ടറിയാണ് കുമ്മനം. വെള്ളിയാഴ്ച തന്നെ അദ്ദേഹം തിരുവനന്തപുരത്ത് ചുമതലയേല്ക്കും. പ്രധാനമന്ത്രി നരേന്ദ്രമോഡിയുടെ കേരള സന്ദര്ശനത്തിന് പിന്നാലെ ഡല്ഹിയില് നടന്ന കോര് കമ്മിറ്റി യോഗത്തിലേക്ക് കുമ്മനവും ക്ഷണിതാവായിരുന്നു.
ആര്എസ്എസ് നേതൃത്വം കുമ്മനം രാജശേഖരനെ ബിജെപിയിലേക്കു വിട്ടുനല്കിയിട്ടുണ്ടെന്നു കേരളത്തിന്റെ ചുമതലയുള്ള പ്രഭാരിയായ ബിജെപി ദേശീയ സെക്രട്ടറി എച്ച്. രാജ അറിയിച്ചു. അദ്ദേഹം സംസ്ഥാന അധ്യക്ഷനാകണമോ മറ്റു ചുമതലകള് വഹിക്കണമോയെന്ന കാര്യത്തില് അന്തിമതീരുമാനം അമിത് ഷായുടേതാണെന്നു രാജ പറഞ്ഞു.
കുമ്മനം രാജശേഖരന്റെ സേവനം ബിജെപിക്കു വിട്ടുനല്കാന് ആര്എസ്എസ് നേതൃത്വം നേരത്തേ തീരുമാനിച്ചിരുന്നു. ആര്എസ്എസ് പ്രചാരകര് സാധാരണ ഗതിയില് ബിജെപിയിലെത്തിയാല് സംഘടനാ ചുമതലയുള്ള ജനറല് സെക്രട്ടറി സ്ഥാനത്തേക്കാണു നിയോഗിക്കപ്പെടാറുള്ളത്. കേരളത്തിലെ അസാധാരണ സാഹചര്യത്തില് കുമ്മനത്തെ സംസ്ഥാന അധ്യക്ഷനാക്കണമെന്ന വാദവുമായി ബിജെപിയിലെ മുരളീധരപക്ഷവും വിഎച്ച്പി നേതൃത്വവും ബിജെപി കേന്ദ്രനേതൃത്വത്തിന്മേല് ശക്തമായ സമ്മര്ദംചെലുത്തിയിരുന്നു.
കേരള ബിജെപി ഘടകത്തിലെ രൂക്ഷമായ വിഭാഗീയത കാരണം സംസ്ഥാന ഘടകത്തിലുള്ളവരില് ആരെയും സംസ്ഥാന അധ്യക്ഷസ്ഥാനത്തേക്കു പരിഗണിക്കാന് തയാറല്ലെന്ന നിലപാടാണു സ്വീകരിച്ചത്. സംസ്ഥാന അധ്യക്ഷനെ തിരഞ്ഞെടുക്കുന്നതു സംബന്ധിച്ചു സംസ്ഥാന കോര് കമ്മിറ്റി അംഗങ്ങളുടെ അഭിപ്രായ നിര്ദേശങ്ങള് സംഘടനാ ചുമതലയുള്ള ദേശീയ ഭാരവാഹികളെ അറിയിച്ചിട്ടുണ്ടെന്നു ഡല്ഹിയില് നിന്നു മടങ്ങുന്നതിനു മുന്പു മുതിര്ന്ന നേതാവ് ഒ. രാജഗോപാല് പറഞ്ഞു.
കുമ്മനം രാജശേഖരനെ അധ്യക്ഷനാക്കുന്നതിനെ ഒരു വിഭാഗം യോഗത്തില് എതിര്ത്തതാണ് സമവായം അസാധ്യമാക്കിയത്. രാജശേഖരനെ അധ്യക്ഷനാക്കിയാല് കേരളത്തിലെ സാമൂഹിക അന്തരീക്ഷത്തില് തിരിച്ചടിയുണ്ടാകുമെന്ന് അഭിപ്രായമുയര്ന്നിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
