ലൈംഗികപീഡനം ഒതുക്കാന്‍ 21 ലക്ഷം രൂപ കൈക്കൂലി വാങ്ങിയ അഡീഷണല്‍ എസ്.ഐയെയും എ.എസ്.ഐയെയും അന്വേഷണവിധേയമായി സസ്‌പെന്‍ഡ് ചെയ്തു. കമ്പംമെട്ട് പോലീസ് സ്‌റ്റേഷനിലെ അഡീഷണല്‍ എസ്.ഐ: എച്ച്. സുരേഷ്‌കുമാര്‍, കട്ടപ്പന സ്‌റ്റേഷനിലെ എ.എസ്.ഐ: കെ. സദാനന്ദന്‍ എന്നിവര്‍ക്കെതിരെയാണ് എറണാകുളം റേഞ്ച് ഐ.ജി. മഹിപാല്‍ യാദവ് നടപടിയെടുത്തത്.
കഴിഞ്ഞ മാര്‍ച്ചിലായിരുന്നു സംഭവം. പെണ്‍കുട്ടിയെ വാഗമണിലെത്തിച്ച് പീഡിപ്പിച്ച കേസില്‍ പ്രമുഖന്റെ മകനാണ് കുടുങ്ങിയത്. കേസ് ഒഴിവാക്കാനായി ഉദ്യോഗസ്ഥര്‍ ഇയാളില്‍നിന്ന് പണം ആവശ്യപ്പെടുകയായിരുന്നത്രേ. വണ്ടന്‍മേട്ടിലെ ക്വാര്‍ട്ടേഴ്‌സിലാണ് ഇതുസംബന്ധിച്ച ചര്‍ച്ച നടന്നതെന്നാണ് വിവരം. 20 ലക്ഷം രൂപ പെണ്‍കുട്ടിക്കും ഒരുലക്ഷം പോലീസ് ഉദ്യോഗസ്ഥര്‍ക്കുമെന്ന നിലയിലാണ് പണം വാങ്ങിയത്. ഇടനിലക്കാരായി കേരളാ കോണ്‍ഗ്രസ്(എം) തൊഴിലാളി യൂണിയന്‍ സംസ്ഥാന നേതാവും കട്ടപ്പന സ്വദേശിയായ മറ്റൊരാളും ഉണ്ടായിരുന്നതായി സൂചനയുണ്ട്. മൂന്നു ചെക്കുകളും ബാക്കി പണവുമായാണ് തുക കൈപ്പറ്റിയത്.
ഇതില്‍ 20 ലക്ഷവും പോലീസ് ഉദ്യോഗസ്ഥരും ഇടനിലക്കാരും കൈവശപ്പെടുത്തിയശേഷം ഒരുലക്ഷം രൂപയാണ് പെണ്‍കുട്ടിക്കു നല്‍കിയയെന്നും പറയപ്പെടുന്നു. കേസ് ഒത്തുതീര്‍പ്പാക്കിയതു സംബന്ധിച്ച ലഭിച്ച സൂചനയെത്തുടര്‍ന്ന് െ്രെകംബ്രാഞ്ച് ഉന്നത ഉദ്യോഗസ്ഥര്‍ക്കു റിപ്പോര്‍ട്ട് നല്‍കിയിരുന്നു. ഇതോടെയാണ് കൂടുതല്‍ അന്വേഷണം നടത്താന്‍ കട്ടപ്പന ഡിവൈ.എസ്.പി: പി.കെ. ജഗദീഷിനെ ചുമതലപ്പെടുത്തിയത്.
ഇദ്ദേഹം നടത്തിയ അന്വേഷണത്തില്‍ ഉദ്യോഗസ്ഥര്‍ പണം വാങ്ങിയതായി തെളിവു ലഭിച്ചു. മൂന്നു ചെക്കുകള്‍ ആരോപണ വിധേയരായ പോലീസ് ഉദ്യോഗസ്ഥരുടെ പേരിലായിരുന്നു. കൂടിയ തുകയായിരുന്നതിനാല്‍ ഇതു മാറിയ പൊതുമേഖലാ ബാങ്കില്‍ ഉദ്യോഗസ്ഥരുടെ വിവരങ്ങള്‍ രേഖപ്പെടുത്തിയിരുന്നതായി അന്വേഷണത്തില്‍ കണ്ടെത്തി.
ഇക്കാര്യം വ്യക്തമാക്കി രണ്ടാഴ്ച മുമ്പ് ജില്ലാ പോലീസ് മേധാവിക്കു കൈമാറിയ റിപ്പോര്‍ട്ട് ഐ.ജിക്കു ലഭിച്ചതോടെയാണ് ഉദ്യോഗസ്ഥരെ സസ്‌പെന്‍ഡ് ചെയ്തത്. കേസില്‍ വിജിലന്‍സ് അന്വേഷണത്തിനും ഐ.ജി. ശിപാര്‍ശ ചെയ്തു. ഇടനിലക്കാരനായ കേരളാ കോണ്‍ഗ്രസ്(എം) നേതാവിനെതിരേയടക്കം അന്വേഷണം നടത്താനാണ് ശുപാര്‍ശ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha