സംസ്ഥാനത്ത് ബക്രീദ് പ്രമാണിച്ച് ഇന്നും നാളെയും പൊതു അവധി. നേരത്തേ നിശ്ചയിച്ചതനുസരിച്ച് ഇന്നത്തെ അവധി നിലനിര്‍ത്തി നാളെക്കൂടി അവധി നല്‍കാനായി മന്ത്രിസഭായോഗത്തില്‍ തീരുമാനമായി. ബലിപെരുന്നാള്‍ നാളെയാണ്.

സര്‍ക്കാര്‍ ഓഫിസുകള്‍, പൊതുമേഖലാ സ്ഥാപനങ്ങള്‍, പ്രഫഷനല്‍ കോളജുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ എന്നിവയ്ക്ക് അവധിയായിരിക്കും. നെഗോഷ്യബ്ള്‍ ഇന്‍സ്ട്രുമെന്റ് ആക്ടും ഷോപ്‌സ് ആന്‍ഡ് കൊമേഴ്‌സ്യല്‍ എസ്റ്റാബ്ലിഷ്‌മെന്റ് ആക്ടും അനുസരിച്ചാണ് രണ്ടു ദിവസവും അവധി എന്നതിനാല്‍ ബാങ്കുകള്‍ ഉള്‍പ്പെടെയുള്ള വിവിധ സ്ഥാപനങ്ങള്‍ക്കും അവധി ബാധകമായിരിക്കും. കെഎസ്ഇബി കാഷ് കൗണ്ടര്‍ ഇന്നും നാളെയും പ്രവര്‍ത്തിക്കുന്നതല്ല . ഓണ്‍ലൈന്‍ സേവനങ്ങളെ ഇത് ബാധിക്കില്ല.

സംസ്ഥാനത്തെ കേന്ദ്ര സര്‍ക്കാര്‍ സ്ഥാപനങ്ങള്‍ക്കുള്ള ബക്രീദ് അവധി നാളെ ആണെന്ന് കേന്ദ്ര ഗവണ്‍മെന്റ് ജീവനക്കാരുടെ ക്ഷേമ ഏകോപന സമിതി അറിയിച്ചു. ഇന്നു നിയന്ത്രിത അവധിയായിരിക്കും.
അതേസമയം ഈദ് അവധിയുടെ പശ്ചാത്തലത്തില്‍ നാളത്തെ പരീക്ഷകള്‍ മാറ്റിയതായി കേരള, എംജി, കൊച്ചി, കാലടി, കാലിക്കറ്റ്, സാങ്കേതിക, ആരോഗ്യ സര്‍വകലാശാലകള്‍ അറിയിച്ചു.

കേരളയുടെ പരീക്ഷകള്‍ ജൂലൈ 4,5 തീയതികളിലേക്കും കാലിക്കറ്റിന്റേത് ജൂലൈ 6, ഓഗസ്റ്റ് 7 തീയതികളിലേക്കും കാലടി, ആരോഗ്യ സര്‍വകലാശാലകളുടേത് ജൂലൈ മൂന്നിലേക്കുമാണു മാറ്റിയത്.

സാങ്കേതിക സര്‍വകലാശാലയുടെ പരീക്ഷകള്‍ 30, ജൂലൈ 7,11 തീയതികളിലേക്കാണു മാറ്റിയത്. എംജി, കൊച്ചി സര്‍വകലാശാലകള്‍ പുതിയ തീയതി പിന്നീട് അറിയിക്കുന്നതായിരിക്കും.

റേഷന്‍ കടകള്‍ക്ക് ഇന്ന് പ്രവൃത്തിദിനമാക്കിയും നാളെ അവധി അനുവദിച്ചും ഭക്ഷ്യപൊതുവിതരണ കമ്മിഷണര്‍ ഉത്തരവിറക്കി. സപ്ലൈകോയുടെ സൂപ്പര്‍ മാര്‍ക്കറ്റുകള്‍, പീപ്പിള്‍സ് ബസാറുകള്‍, ഹൈപ്പര്‍ മാര്‍ക്കറ്റുകള്‍, മെഡിക്കല്‍ സ്റ്റോറുകള്‍ എന്നിവ ഇന്ന് തുറക്കുന്നതാണ്. നാളെ അവധിയായിരിക്കും. പെട്രോള്‍ ബങ്കുകള്‍ ഒഴികെ സപ്ലൈകോയുടെ എല്ലാ വില്‍പനശാലകള്‍ക്കും നാളെ അവധിയായിരിക്കും. മാവേലി സ്റ്റോറുകള്‍ക്ക് ഇന്നും നാളെയും അവധിയാണ്.