കഴിഞ്ഞ ചന്ദ്രയാന്‍ ദൗത്യം അവസാന ഘട്ടത്തിലാണ് പാളിയത്. അതിനെയെല്ലാം മറികടക്കാനുള്ള ഊര്‍ജമാണ് പ്രധാനമന്ത്രി നരേന്ദ്രമോദിയുടെ ആശ്വാസ വാക്കുകള്‍ ഐഎസ്ആര്‍ഒ ഉദ്യോഗസ്ഥര്‍ക്ക് നല്‍കിയത്. ആ ഊര്‍ജത്തോടെ ചന്ദ്രയാന്‍ വീണ്ടും. ഇന്ത്യയുടെ ചാന്ദ്ര പര്യവേക്ഷണ ദൗത്യമായ ചന്ദ്രയാന്‍ 3 ജൂലായ് 12നും 19നും ഇടയില്‍ വിക്ഷേപിക്കുമെന്ന് ഐ.എസ്.ആര്‍.ഒ. ചെയര്‍മാന്‍ എസ്. സോമനാഥ്. ചന്ദ്രയാന്‍ 3 ബഹിരാകാശപേടകം പൂര്‍ണമായും സംയോജിപ്പിച്ചുവെന്നും അന്തിമഘട്ട പരിശോധനകള്‍ പൂര്‍ത്തിയാക്കിയ ശേഷം വിക്ഷേപണ തിയതി പ്രഖ്യാപിക്കുമെന്നും സോമനാഥ് അറിയിച്ചു.

അതിനിടെ ജൂലായ് 13ന് ഉച്ചയ്ക്ക് 2.30നായിരിക്കും ചന്ദ്രയാന്‍ മൂന്നിന്റെ വിക്ഷേപണമെന്ന് ഐ.എസ്.ആര്‍.ഒ ഉദ്യോഗസ്ഥരെ ഉദ്ധരിച്ച് വാര്‍ത്താ ഏജന്‍സിയായ പി.ടി.ഐ റിപ്പോര്‍ട്ട് ചെയ്തു. ഐഎസ്ആര്‍ഒയുടെ ഏറ്റവും കരുത്തുറ്റ വിക്ഷേപണ വാഹനമായ ലോഞ്ച് വെഹിക്കിളില്‍ മാര്‍ക്ക് 3 റോക്കറ്റ് ഉപയോഗിച്ച് ശ്രീഹരിക്കോട്ടയിലെ സതീഷ് ധവാന്‍ സ്പേസ് സെന്ററില്‍ നിന്നാണ് ചന്ദ്രയാന്‍ 3 വിക്ഷേപിക്കുക.

ചന്ദ്രനിലേക്കുള്ള ഐഎസ്ആര്‍ഒയുടെ മൂന്നാമത്തെ ദൗത്യമാണിത്. ആദ്യദൗത്യം പൂര്‍ണമായും വിജയകരമായിരുന്നു. ചന്ദ്രയാന്‍ 2 ദൗത്യത്തിന് ഓര്‍ബിറ്റര്‍, ലാന്‍ഡര്‍, റോവര്‍ എന്നിങ്ങനെ മൂന്ന് സംവിധാനങ്ങളാണുണ്ടായിരുന്നത്. ഇതില്‍ ഓര്‍ബിറ്റര്‍ ചന്ദ്രന്റെ ഭ്രമണപഥത്തില്‍ വിന്യസിക്കാന്‍ ഐഎസ്ആര്‍ഒയ്ക്ക് സാധിച്ചു. എന്നാല്‍ ലാന്‍ഡര്‍ സുരക്ഷിതമായി ഇറക്കാനുള്ള ശ്രമം പരാജയപ്പെട്ടു. ഇതിന് പിന്നാലെയാണ് മൂന്നാം ചാന്ദ്ര ദൗത്യത്തിന് ഐഎസ്ആര്‍ഒ ഒരുങ്ങുന്നത്.

615 കോടി രൂപയാണ് ചന്ദ്രയാന്‍ 3 ദൗത്യത്തിന്റെ ബജറ്റ്. പുതിയ ഓര്‍ബിറ്റര്‍ ചന്ദ്രയാന്‍ മൂന്നിന് ഉണ്ടാവില്ല. പകരം ചന്ദ്രയാന്‍ 2 ഓര്‍ബിറ്റര്‍ തന്നെ പുതിയ ദൗത്യത്തിന് വേണ്ടി പ്രയോജനപ്പെടുത്തും. സോഫ്റ്റ് ലാന്‍ഡ് ചെയ്യാന്‍ സാധിക്കുന്ന ലാന്‍ഡറും അതിനുള്ളിലായുള്ള റോവറുമായിരിക്കും പുതിയ ദൗത്യത്തില്‍ വിക്ഷേപിക്കുക. ലാന്‍ഡര്‍ സുരക്ഷിതമായി ഇറങ്ങിയാല്‍ പര്യവേക്ഷണത്തിനുള്ള റോവറും വിന്യസിക്കും. കഴിഞ്ഞ തവണ ലാന്‍ഡര്‍ ഇറക്കാനുള്ള ശ്രമം പരാജയപ്പെട്ടതില്‍നിന്ന് കൂടുതല്‍ പാഠങ്ങള്‍ ഉള്‍ക്കൊണ്ടാണ് മൂന്നാം ചാന്ദ്ര ദൗത്യത്തിന് ഐഎസ്ആര്‍ഒ തയ്യാറെടുത്തത്.

2008ല്‍ ചന്ദ്രയാന്‍-1 വിക്ഷേപണം ഇന്ത്യയെ ബഹിരാകാശത്ത് അവഗണിക്കാനാവാത്ത ശക്തിയാക്കി. ചന്ദ്രന്റെ ദക്ഷിണധ്രുവത്തില്‍ ആദ്യം എത്തിയ രാജ്യമെന്ന നിലയില്‍ അവിടെ ഇന്ത്യയ്ക്കാണ് മുന്‍ഗണന. എന്നാല്‍ രണ്ടാം ദൗത്യമായ ചന്ദ്രയാന്‍ -2 ഭാഗിക വിജയം മാത്രമായിരുന്നു. ചന്ദ്രയാന്‍-2ന്റെ ഭാഗമായി വിക്ഷേപിച്ച വിക്രം റോവര്‍ ചന്ദ്രോപരിതലത്തില്‍ ലാന്‍ഡ് ചെയ്യാന്‍ ശ്രമിച്ചിരുന്നെങ്കിലും പരാജയപ്പെടുകയായിരുന്നു. അതിനാല്‍ തന്നെ ചന്ദ്രന്റെ ദക്ഷിണ ധ്രുവത്തില്‍ വിജയകരമായി സോഫ്റ്റ് ലാന്‍ഡിംഗ് നടത്തുകയാണ് ചന്ദ്രയാന്‍ മൂന്നിന്റെ ലക്ഷ്യം.

ലാന്‍ഡര്‍, റോവര്‍ എന്നിവ മാത്രമാണ് ചന്ദ്രയാന്‍-3 ദൗത്യത്തിലെ പ്രധാന ഉപകരണങ്ങള്‍. രണ്ടാം ദൗത്യത്തില്‍ വിക്ഷേപിച്ച ഓര്‍ബിറ്റര്‍ വിജയകരമായി തുടര്‍ന്ന് പ്രവര്‍ത്തിക്കുന്നതിനാലാണ് ഇത്തവണ ഒഴിവാക്കിയത്. ഓര്‍ബിറ്ററിന് പകരം പ്രൊപ്പല്‍ഷന്‍ മൊഡ്യൂളായിരിക്കും ലാന്‍ഡറിനെ ചന്ദ്രന്റെ ഭ്രമണപഥത്തിന് 100 കിലോമീറ്റര്‍ ദൂരം വരെ വഹിക്കുക.അപകട സാദ്ധ്യത ലഘൂകരിച്ച് വിജയസാദ്ധ്യത വര്‍ദ്ധിപ്പിക്കുന്നതിനായി കര്‍ശനമായ പരിശോധനകള്‍ക്ക് ശേഷമായിരിക്കും വിക്ഷേപണം നടത്തുക. ആകെ 615 കോടി ചിലവ് വരുന്ന ചന്ദ്രയാന്‍ ദൗത്യത്തെ ജി എസ് എല്‍ വി മാര്‍ക്ക് 3 ഹെവി ലിഫ്റ്റ് ലോഞ്ച് വെഹിക്കിളാണ് വഹിക്കുക. ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ കേന്ദ്രത്തില്‍ നിന്നാണ് ഇന്ത്യയുടെ അഭിമാന ദൗത്യത്തിന്റെ വിക്ഷേപണമുണ്ടാവുക.

നീണ്ട കാത്തിരിപ്പിനൊടുവിലാണ് ഐഎസ്ആര്‍ഒ വീണ്ടും ചന്ദ്രനിലേക്ക് പുറപ്പെടുന്നത്. കഴിഞ്ഞ തവണത്തെ പരാജയത്തില്‍ നിന്ന് പഠിച്ച വിലപ്പെട്ട പാഠങ്ങളാണ് ഇത്തവണത്തെ മൂലധനം. ലാന്‍ഡറിന്റെ ഘടന മുതല്‍ ഇറങ്ങല്‍ രീതി വരെ വീണ്ടും വീണ്ടും പരിശോധിച്ച് പരിഷ്‌കരിച്ച് മാറ്റങ്ങള്‍ വരുത്തിയാണ് ഈ രണ്ടാം ശ്രമം. വിജയം മാത്രമേ ഇസ്രൊ ചന്ദ്രയാന്‍ മൂന്നില്‍ നിന്ന് പ്രതീക്ഷിക്കുന്നുള്ളൂ. ഭൂമിയില്‍ നിന്ന് പുറപ്പെട്ട് 40 ദിവസങ്ങള്‍ക്ക് ശേഷമായിരിക്കും ലാന്‍ഡിംഗ് ശ്രമം.