സുധാകരനിത് ബെസ്റ്റ് സമയമാണ്. ജോണ്‍സണ്‍ മാവുങ്കല്‍ കേസില്‍ ഒരുവട്ട ചോദ്യം ചെയ്യലും അറസ്റ്റും കഴിഞ്ഞ് ഇന്റലിജന്‍സ് അന്വേഷണത്തിലാണ്. അതിന് പിന്നാലെ സ്വന്തം ശിഷ്യനായ നേതാവ് തന്നെ പണികൊടുത്തു. സുധാകരനെ പുകഴ്ത്താന്‍ ചെയ്തത് പണി കിട്ടി.

അരിയില്‍ ഷുക്കൂര്‍ വധക്കേസില്‍ പി ജയരാജനും ടി വി രാജേഷും പ്രതിയായതിന് പിറകില്‍ കെപിസിസി പ്രസിഡന്റ് കെ സുധാകരനാണെന്ന് പറഞ്ഞ കോണ്‍ഗ്രസ് നേതാവ് ബി ആര്‍ എം ഷഫീര്‍ വെട്ടിലായി. കണ്ണൂരില്‍ കോണ്‍ഗ്രസ് ജില്ലാ കമ്മറ്റി സംഘടിപ്പിച്ച രാഷ്ട്രീയ വിശദീകരണ പൊതുയോഗത്തില്‍ സംസാരിക്കവെയാണ് ഷഫീറിന്റെ വെളിപ്പെടുത്തല്‍.

''അരിയില്‍ ഷുക്കൂര്‍ കേസില്‍ പൊലീസിനെ വിരട്ടി എഫ്ഐആര്‍ ഇടീച്ചു. സിബിഐയ്ക്ക് വേണ്ടിയിട്ട് ഡല്‍ഹിയില്‍ പോയി നിയമപോരാട്ടം നടത്തി. കേസില്‍ ജയരാജനും രാജേഷും പ്രതിയായിട്ടുണ്ടെങ്കില്‍ അതിന് പുറകില്‍ കെ സുധാകരന്റെ വിയര്‍പ്പുണ്ട്'' എന്നാണ് ബി ആര്‍ എം ഷഫീര്‍ പറഞ്ഞത്.

ഇത് സിപിഎമ്മിന് വലിയ ആയുധമാണ് കിട്ടിയത്. തന്നെയും ടി.വി.രാജേഷിനെയും അരിയില്‍ ഷുക്കൂര്‍ വധക്കേസ് ഗൂഢാലോചനയില്‍ ഉള്‍പ്പെടുത്താന്‍ സിബിഐയില്‍ സമ്മര്‍ദം ചെലുത്തിയത് കെപിസിസി പ്രസിഡന്റ് കെ.സുധാകരനാണെന്നു വ്യക്തമായ സാഹചര്യത്തില്‍ കേസില്‍ തുടരന്വേഷണം വേണമെന്ന് സിപിഎം സംസ്ഥാന സമിതി അംഗം പി.ജയരാജന്‍ പറഞ്ഞു.

തങ്ങളെ പ്രതി ചേര്‍ത്തതു രാഷ്ട്രീയ വേട്ടയെന്നു തെളിഞ്ഞു. സുധാകരന്റേതു ക്രിമിനല്‍ ഗൂഢാലോചനാക്കുറ്റമാണ്. കൃത്രിമമായ തെളിവുകളെ അടിസ്ഥാനപ്പെടുത്തി ആരെയെങ്കിലും കേസില്‍ പെടുത്തിയാല്‍ അതു ചെയ്തയാളും അതേ ശിക്ഷയ്ക്ക് അര്‍ഹനാണ്. കേന്ദ്രം ബിജെപി ഭരിക്കുമ്പോള്‍ സിബിഐയെ സ്വാധീനിക്കാന്‍ സുധാകരന്‍ ശ്രമിച്ചത്, ആര്‍എസ്എസുമായുള്ള സുധാകരന്റെ ജൈവബന്ധം തെളിയിക്കുന്നതാണ്. തുടരന്വേഷണത്തിനായി നിയമ നടപടി സ്വീകരിക്കുമെന്നും ജയരാജന്‍ തിരുവനന്തപുരത്തു പറഞ്ഞു.

തങ്ങളെ ആദ്യം കള്ളക്കേസില്‍പെടുത്തിയത് യുഡിഎഫ് ഗവണ്മെന്റാണ്. ക്രിമിനല്‍ നടപടി ചട്ടം 118 പ്രകാരമാണു തെറ്റായി പ്രതിചേര്‍ത്തത്. കുറ്റകൃത്യം അറിഞ്ഞിട്ടും തടഞ്ഞില്ല എന്ന കുറ്റത്തെ ഉള്‍പ്പെടുത്താന്‍ വേണ്ടിയാണ് ഈ വകുപ്പ് ചേര്‍ത്തത്. കേട്ടുകേള്‍വിയില്ലാത്ത നിലയിലാണ് തങ്ങളെ ആ കേസിലുള്‍പ്പെടുത്തി വേട്ടയാടിയതെന്നു ജയരാജന്‍ സമൂഹ മാധ്യമത്തില്‍ അഭിപ്രായപ്പെട്ടു.

കേസ് സിബിഐ ഏറ്റെടുത്തതിനു ശേഷം 2018 സെപ്റ്റംബറില്‍ തങ്ങളെ 120 ബി വകുപ്പനുസരിച്ച് ഗൂഢാലോചന കേസില്‍ ഉള്‍പ്പെടുത്തി. ഇതിനു വേണ്ടി സുധാകരന്‍ ഡല്‍ഹിയില്‍ പോയി സിബിഐയില്‍ സമ്മര്‍ദം ചെലുത്തിയെന്നാണ് കഴിഞ്ഞ ദിവസം കോണ്‍ഗ്രസ് നേതാവ് കണ്ണൂരില്‍ പ്രസംഗിച്ചത്.

കെ. സുധാകരനെതിരെ കള്ളക്കേസ് ചുമത്തുന്നതിനെതിരെ കഴിഞ്ഞദിവസം കണ്ണൂരില്‍ ഡിസിസി സംഘടിപ്പിച്ച രാഷ്ട്രീയ വിശദീകരണ യോഗത്തിലെ പ്രസംഗത്തില്‍ കെപിസിസി സെക്രട്ടറി ബി.ആര്‍.എം. ഷഫീര്‍ നടത്തിയ പരാമര്‍ശത്തെ അടിസ്ഥാനമാക്കിയാണ് പി. ജയരാജന്റെ പ്രതികരണം. അരിയില്‍ ഷുക്കൂര്‍ വധക്കേസില്‍ പി. ജയരാജനും ടി.വി. രാജേഷും പ്രതിയായതിനു പിന്നില്‍ കെ.സുധാകരന്റെ വിയര്‍പ്പുണ്ടെന്നായിരുന്നു ഷഫീറിന്റെ പരാമര്‍ശം.

2012 ഫെബ്രുവരി 20ന് കണ്ണപുരം കീഴറ വള്ളുവന്‍കടവിന് അടുത്താണ് എംഎസ്എഫ് പ്രാദേശിക നേതാവായിരുന്ന അരിയില്‍ ഷുക്കൂര്‍ (24) കൊല്ലപ്പെടുന്നത്. ഈ കേസിന്റെ ഗൂഢാലോചനയില്‍ സിപിഎം സംസ്ഥാന സമിതി അംഗങ്ങളായ പി.ജയരാജനും ടി.വി.രാജേഷും പ്രതി ചേര്‍ക്കപ്പെട്ടിരുന്നു.

കോണ്‍ഗ്രസ് വക്താവ് ബി.ആര്‍.എം. ഷെഫീറിന്റെ വെളിപ്പെടുത്തലിന്റെ അടിസ്ഥാനത്തില്‍ തുടരന്വേഷണം നടത്തണമെന്ന് സി.പി.എം. ജില്ലാ സെക്രട്ടറി എം.വി. ജയരാജനും ആവശ്യപ്പെട്ടു. നിരപരാധികളെ കുറ്റവിമുക്തരാക്കി വ്യാജ തെളിവുണ്ടാക്കിയതിന്റെ പേരില്‍ കെ. സുധാകരന്റെ പേരില്‍ കേസെടുക്കണമെന്നും അദ്ദേഹം ആവശ്യപ്പെട്ടു.