തദ്ദേശ തിരഞ്ഞെടുപ്പുമായി ബന്ധപ്പെട്ട് വ്യാപക അക്രമം നടന്ന ഇടങ്ങളില്‍ ഇന്ന് റീപോളിംഗ് നടക്കും. തിരഞ്ഞെടുപ്പില്‍ വ്യാപക കൃത്രിമം നടന്നതോടെയാണ് 600ലധികം ബൂത്തുകളില്‍ ഇന്ന് റീപോളിംഗ് നടക്കാന്‍ തിരഞ്ഞെടുപ്പ് കമ്മീഷന്‍ തീരുമാനിച്ചത്.

സംസ്ഥാനത്ത് ആക്രമണങ്ങളെത്തുടര്‍ന്ന് കനത്തസുരക്ഷയാണ് ഏര്‍പ്പെടുത്തിയിരിക്കുന്നത്. മൂര്‍ഷിദാബാദിലാണ് ഏറ്റവുമധികം ബൂത്തുകളില്‍ റീപോളിംഗ് നടക്കുന്നത്. 175 എണ്ണം. ഇതിനൊപ്പം നാദിയ പുരുലിയ, മാല്‍ഡ,ബിര്‍ഭും, നോര്‍ത്ത് 24 പര്‍ഗാനാസ്, സൗത്ത് 24 പര്‍ഗാനാസ്, ജല്‍പൈഗുരി എന്നിവിടങ്ങളിലാണ് റീപോളിംഗ്. സംസ്ഥാനത്ത് വോട്ടെടുപ്പിനെയുണ്ടായ അക്രമസംഭവങ്ങളില്‍ 19 പേരാണ് മരിച്ചത്.

സംഘര്‍ഷത്തെക്കുറിച്ച് ജില്ലാ മജിസ്ട്രേറ്റുമാരില്‍ നിന്ന് കമ്മിഷന്‍ റിപ്പോര്‍ട്ട് ആവശ്യപ്പെട്ടിട്ടുണ്ടായിരുന്നു. അതേസമയം ആക്രമണങ്ങള്‍ക്ക് പിന്നില്‍ ബി.ജെ.പിയാണെന്ന് ആരോപിച്ച് തൃണമൂല്‍ രംഗത്തെത്തി.


എന്നാല്‍ ടി.എം.സിയാണ് അക്രമം അഴിച്ചുവിട്ട് തിരഞ്ഞെടുപ്പ് അട്ടിമറിക്കാനായി ശ്രമിക്കുന്നതെന്ന് ബി.ജെ.പി ആരോപിച്ചു.സംഭവത്തെത്തുടര്‍ന്ന് ഗവര്‍ണര്‍ സി.വി. ആനന്ദബോസ് കേന്ദ്ര ആഭ്യന്തര മന്ത്രി അമിത് ഷായുമായി ഇന്ന് കൂടിക്കാഴ്ച നടത്തിയേക്കും.