നിലമ്പൂര്‍ അമരമ്പലം സൗത്ത് കുതിരപ്പുഴയില്‍ കാണാതായ രണ്ടുപേരുടെയും മൃതദേഹങ്ങള്‍ കണ്ടെത്തി. സുശീല (55), കൊച്ചുമകള്‍ അനുശ്രീ (12) എന്നിവരുടെ മൃതദേഹങ്ങളാണ് കണ്ടെത്തിയത്.

ബുധനാഴ്ച പുലര്‍ച്ച രണ്ടരയോടെയാണ് അഞ്ചംഗ കുടുംബം കുതിരപ്പുഴയില്‍ ചാടിയത്. അമരമ്പലം സ്വദേശികളായ കൊട്ടാടന്‍ സുശീല, മകള്‍ സന്ധ്യ (32), സന്ധ്യയുടെ മക്കളായ അനുഷ (12), അരുണ്‍ (11), അനുശ്രീ എന്നിവര്‍ പുഴയില്‍ ചാടുകയായിരുന്നു. ഇതില്‍ സന്ധ്യയും അനുഷയും അരുണും രക്ഷപ്പെട്ടെങ്കിലും സുശീലയുടെയും അനുശ്രീയെയും കണ്ടെത്താനായിരുന്നില്ല. ഇവരില്‍ രണ്ട് കുട്ടികള്‍ ആദ്യം രക്ഷപ്പെട്ടു.

ഇളയകുട്ടി അരുണ്‍, ഇരട്ടക്കുട്ടികളില്‍ അനുഷ എന്നിവര്‍ നീന്തി രക്ഷപ്പെട്ട് വീടിന് അയല്‍വാസികളോട് പറഞ്ഞപ്പോഴാണ് നാട്ടുകാര്‍ വിവരം അറിഞ്ഞത്.ഇതോടെ നാട്ടുകാര്‍ നടത്തിയ തെരച്ചിലില്‍ സുശീലയുടെ മകള്‍ സന്ധ്യയെ മൂന്ന് കിലോമീറ്റര്‍ അകലെ നിന്നും കണ്ടെത്തുകയും ചെയ്തു.

നാട്ടുകാര്‍, പൊലീസ്, ദുരന്തനിവാരണ സേന, അഗ്‌നിരക്ഷാ സേന, എമര്‍ജന്‍സി റെസ്‌ക്യൂ ഫോഴ്സ്, ട്രോമാകെയര്‍ തുടങ്ങിയവര്‍ ഏറെ വൈകിയും തെരച്ചില്‍ തുടര്‍ന്നെങ്കിലും ഫലമുണ്ടായില്ല. പ്രതികൂല കാലാവസ്ഥയും പുഴയില്‍ വെള്ളം ഉയര്‍ന്നതും അടിയൊഴുക്കും രക്ഷാപ്രവര്‍ത്തനത്തിന് തടസമായി. ഇവരെ കാണാതായതിന്റെ രണ്ട് കിലോമീറ്റര്‍ അകലെയാണ് ഇപ്പോള്‍ രണ്ടുപേരുടെയും മൃതദേഹങ്ങള്‍ കണ്ടെത്തിയിരിക്കുന്നത്.

സാമ്പത്തിക പ്രതിസന്ധിയാണ് ഇവര്‍ ആത്മഹത്യ തെരഞ്ഞെടുക്കുവാന്‍ കാരണമെന്ന് പറയപ്പെടുന്നു. സുശീലയുടെ മകള്‍ സന്ധ്യ ജോലിക്കു പോയാണ് കുടുംബം പുലര്‍ത്തിയിരുന്നത്. എന്നാല്‍, രണ്ടു മാസമായി സന്ധ്യ അസുഖമായി ജോലിക്കു പോയിരുന്നില്ല. ഇതോടെ കുടുംബമാകെ പ്രതിസന്ധിയിലായിപ്പോയി.