നിയന്ത്രണം വിട്ട മിനിലോറി പാഞ്ഞുകയറി ബൈക്ക് യാത്രക്കാരന് ദാരുണാന്ത്യം
നിയന്ത്രണം വിട്ട മിനിലോറി പാഞ്ഞുകയറി ബൈക്ക് യാത്രക്കാരന് മരിച്ചു. നെറ്റ്ബോള് കേരളാ ജൂനിയര് ടീം മുന് ക്യാപ്റ്റന് ചന്ദ്രലേഖയുടെ അച്ഛനും മാടമ്പില് ദേവീ സൗണ്ട് ഉടമയുമായ കണ്ടല്ലൂര് തെക്ക് ബേബിഭവനത്തില് ഇന്ദ്രാദ്മജനാണ് (ബേബി-56) മരിച്ചത്.
തിങ്കളാഴ്ച രാവിലെ ഏഴരയോടെ കണ്ടല്ലൂര് തെക്ക് വെണ്ടേശ്ശേരില് ജംഗ്ഷനിലായിരുന്നു അപകടം നടന്നത്. തെക്കുഭാഗത്തേക്കു പോകുകയായിരുന്ന ഇന്ദ്രാദ്മജനെ എതിര്ദിശയില് നിന്ന് മണ്ണുകയറ്റിവന്ന ലോറി നിയന്ത്രണം വിട്ടു വന്നിടിക്കുകയായിരുന്നു. ബൈക്കില് ഇടിച്ച ശേഷം കിഴക്കുവശത്തെ വീടിന്റെ മതിലിലേക്കും ലോറി ഇടിച്ചു കയറി.
മതിലിനും ലോറിക്കുമിടയില്പ്പെട്ട ഇന്ദ്രാദ്മജനെ കായംകുളത്ത് നിന്ന് അഗ്നിരക്ഷാസേനയെത്തിയാണ് പുറത്തെടുത്തത്. തുടര്ന്ന് ഇയാളെ കായംകുളം താലൂക്ക് ആശുപത്രിയിലേക്കു കൊണ്ടു പോയെങ്കിലും രക്ഷിക്കാനായില്ല.
മിനി ലോറിയുടെ ഡ്രൈവര് ഗോപകുമാറും(41) ലോറിക്കുളളില് കുടുങ്ങി. അഗ്നിരക്ഷാസേനയാണ് ഇയാളെയും ഡോറു പൊളിച്ചു പുറത്തെടുത്തത്. ഗോപകുമാറിനും കാലിനു പരിക്കുണ്ട്.
https://www.facebook.com/Malayalivartha
