പ്രമുഖ താളവാദ്യകലാകാരനും സംഗീത സംവിധായകനുമായ ഐ.എം. ഷക്കീര് അന്തരിച്ചു....
പ്രമുഖ താളവാദ്യകലാകാരനും സംഗീത സംവിധായകനുമായ ഐ.എം. ഷക്കീര് (62) അന്തരിച്ചു. പ്രമുഖ ചലച്ചിത്ര പിന്നണിഗായകന് അഫ്സലിന്റെ ജ്യേഷ്ഠ സഹോദരനാണ്.
ഇളയ സഹോദരനായ അന്സാറും ചലച്ചിത്ര പിന്നണിഗായകനാണ്. മക്കള്: ഹുസ്ന, ഫര്സാന, സിത്താര, അസീമ, അബ്ദുള് ഹക്കിം. മരുമകന്: മുഹമ്മദ് ഷിറാസ്. കൊച്ചിന് കലാഭവന്, കൊച്ചിന് കോറസ്, കൊച്ചിന് ആര്ട്സ് അക്കാദമി തുടങ്ങിയ ഗാനമേള ട്രൂപ്പുകളില് കോംഗോ ഡ്രമ്മര് എന്ന നിലയില് ശ്രദ്ധേയനായി.
1980 മുതല് തുടര്ച്ചയായി 12 വര്ഷക്കാലം യേശുദാസിന്റെ ഗാനമേള ട്രൂപ്പില് അംഗമായിരുന്നു. ദക്ഷിണാമൂര്ത്തി സ്വാമി മുതല് എം. ജയചന്ദ്രന് വരെയുള്ള സംഗീത സംവിധായകരുടെ നൂറുകണക്കിന് ഗാനങ്ങളുടെ പിന്നണിയില് പ്രവര്ത്തിച്ചിട്ടുണ്ട്. ദക്ഷിണേന്ത്യയിലെ ആദ്യകാല ഇലക്ട്രോണിക്ക് റിഥം പ്രോഗ്രാമേഴ്സില് പ്രധാനിയായിരുന്ന ഇദ്ദേഹം, കീബോര്ഡ് ആര്ട്ടിസ്റ്റ് ജാക്സണ് അരുജയോടോപ്പം ചേര്ന്ന് ഷക്കീര് ജാക്സണ് എന്നപേരില് ജഗതി ആന്ഡ് ജഗദീഷ് ഇന് ടൗണ്, ഹൗസ് ഓണര്, സ്വര്ണമെഡല് എന്നീ ചലച്ചിത്രങ്ങള്ക്ക് പാട്ടുകള് ഒരുക്കി.
വലത്തോട്ടു തിരിഞ്ഞാല് നാലാമത്തെ വീട് എന്ന ചിത്രത്തില് സ്വതന്ത്ര സംഗീത സംവിധായകനായി. നിരവധി പ്രണയഗാനങ്ങള്ക്കും ഭക്തിഗാനങ്ങള്ക്കും മാപ്പിള പാട്ടുകള്ക്കും സംഗീതം പകര്ന്നിട്ടുണ്ട്. കബറടക്കം വെള്ളിയാഴ്ച 10-ന് കപ്പലണ്ടിമുക്ക് പടിഞ്ഞാറെ പള്ളി കബര്സ്ഥാനില് നടക്കും.
https://www.facebook.com/Malayalivartha
