സംസ്ഥാനത്തെ സഹകരണ സംഘങ്ങള്‍ക്ക് നല്‍കിയ ആധുനിക സൗകര്യങ്ങളോടുകൂടിയ മത്സ്യബന്ധനവള്ളങ്ങള്‍ നീറ്റിലിറക്കി. താനൂര്‍ ഹാര്‍ബറില്‍ നടന്ന ചടങ്ങില്‍ മന്ത്രി വി അബ്ദുറഹിമാന്‍ ഫ്‌ലാഗ് ഓഫ് ചെയ്തു.

പരമ്പരാഗത മത്സ്യത്തൊഴിലാളികള്‍ക്ക് ലാഭകരമായ മത്സ്യബന്ധനം നടത്തുന്നതിനായാണ് ആധുനിക സൗകര്യങ്ങളോടുകൂടിയ വള്ളങ്ങള്‍ നല്‍കിയതെന്ന് മന്ത്രി .

സംസ്ഥാനത്തെ 10 മത്സ്യബന്ധന യാനങ്ങളില്‍ മൂന്നെണ്ണം മലപ്പുറം ജില്ലയിലാണ്. അതില്‍ രണ്ടെണ്ണം താനൂരിലും. വരും സമയങ്ങളില്‍ കൂടുതല്‍ സംഘങ്ങള്‍ക്ക് യാനങ്ങള്‍ നല്‍കുകയാണ് സര്‍ക്കാര്‍ ലക്ഷ്യമിടുന്നതെന്നും കൂട്ടിചേര്‍ത്ത് മന്ത്രി.

ചടങ്ങില്‍ മത്സ്യഫെഡ് ഡയറക്ടര്‍ പി പി സൈതലവി അധ്യക്ഷനായി. മത്സ്യഫെഡ് ജില്ലാ മാനേജര്‍ മനോജ് റിപ്പോര്‍ട്ട് അവതരിപ്പിച്ചു.ഉണ്യാല്‍ തേവര്‍കടപ്പുറം- ചീരാന്‍കടപ്പുറം മത്സ്യ സഹകരണ സംഘം, താനൂര്‍ ടൗണ്‍ മത്സ്യത്തൊഴിലാളി ക്ഷേമ സഹകരണ സംഘം എന്നിവര്‍ക്കാണ് താനൂരില്‍ യാനങ്ങള്‍ കിട്ടിയത്.

പരമ്പരാഗത മത്സ്യത്തൊഴിലാളികള്‍ക്ക് പ്രത്യേക പരിഗണന നല്‍കി 1.57കോടി ചെലവ് വരുന്ന വള്ളമാണ് നല്‍കിയത്. ഹൈഡ്രോളിക് സംവിധാനത്തിലാണ് ബോട്ട് പ്രവര്‍ത്തിക്കുന്നത്. 200 നോട്ടിക്കല്‍ മൈല്‍ വരെ മത്സ്യബന്ധനം നടത്താനുള്ള ലൈസന്‍സ് അടക്കം സര്‍ക്കാര്‍ അനുവദിച്ചിട്ടുണ്ട്.

കൊച്ചിന്‍ ഷിപ്പിയാര്‍ഡിനു കീഴില്‍ ഉഡുപ്പിക്കു സമീപമുള്ള മാല്‍പ്പേ യാര്‍ഡില്‍ നിന്നും ആധുനിക രീതിയിലുള്ള ചൂണ്ടയും ഗില്‍നെറ്റ് വലകളും വള്ളത്തില്‍ ഘടിപ്പിച്ചിട്ടുണ്ട്. ലോങ്‌ലൈനര്‍വിഞ്ച്, ഗില്‍നെറ്റ് ഹോളര്‍, അത്യാധുനിക സാങ്കേതികവിദ്യയില്‍ പ്രവര്‍ത്തിക്കുന്ന ജിപിഎസ് ഉള്‍പ്പെടെയുള്ള ആശയവിനിമയ ഉപകരണങ്ങള്‍, ദുരന്ത മുന്നറിയിപ്പ്, മാഗ്‌നെറ്റിക് കോമ്പസ് എന്നിവ സജ്ജീകരിച്ചിട്ടുണ്ട്.