ശബരിമലയില്‍ നിന്ന് കിട്ടിയ അടിയുടെ പേടിയിലാണ് സിപിഎം. ഗണപതി മിത്തെന്ന ഷംസീറിന്റെ വാവിട്ട വാക്കില്‍ നിന്ന് ഉരുകുകയാണ് സിപിഎം. ഹൈന്ദവ വിശ്വാസത്തില്‍ കേറിതോണ്ടിയതോടെ വോട്ട് ബാങ്കിനെ ഇത് ബാധിക്കുമോയെന്ന ഭയമാണ് സിപിഎമ്മിന്. ശബരിമലയില്‍ കൈവെച്ചതിന്റെ പൊള്ളല്‍ നല്ല ഓര്‍മ്മയുണ്ട്. ഇപ്പോള്‍ സഖാക്കള്‍ വന്ന് മിത്തല്ല എല്ലാം വിശ്വാസമെന്ന് ആവര്‍ത്തിക്കുന്നു. ഒരു മലക്കംമറിച്ചിലുമില്ല, മിത്ത് മിത്തായും ശാസ്ത്രം ശാസ്ത്രമായും കാണുന്ന പാര്‍ട്ടിയാണ് സിപിഎമ്മെന്ന് എംവി ജയരാജന്‍. മതത്തെയോ വിശ്വാസത്തെയോ എതിര്‍ക്കുന്ന പാര്‍ട്ടിയുമല്ല സി.പി.എം. മിത്തിനെ മിത്തായി കാണണമെന്ന് പറയുമ്പോള്‍, വിശ്വാസത്തെ വിശ്വാസമായി കാണുമ്പോള്‍ ധാരാളം വിശ്വാസികള്‍ ഗണപതിവിശ്വാസികള്‍ കൂടിയാണ്.

മതവിശ്വാസത്തിന്റെ ഭാഗമായി ആ വിശ്വാസം അനുസരിച്ച് ആചാരാനുഷ്ഠാനങ്ങളില്‍ ഏര്‍പ്പെടുന്നവരെ ബഹുമാനിക്കുന്ന പാര്‍ട്ടിയാണ് സി.പി.എം എന്നും അദ്ദേഹം കൂട്ടിച്ചേര്‍ത്തു. എന്നാല്‍, ശാസ്ത്രത്തെ നിരാകരിച്ചുകൊണ്ടൊരു നിലപാട് സി.പി.എമ്മിനില്ല. വിശ്വാസത്തെ നിരാകരിച്ചു കൊണ്ടൊരു നിലപാടും സി.പി.എമ്മിനില്ല. അപ്പോള്‍ ശാസ്ത്രത്തെയും വിശ്വാസത്തെയും പരിഗണിച്ചുകൊണ്ടുള്ള നിലപാടാണ് സി.പി.എം. സ്വീകരിക്കുന്നത്, അദ്ദേഹം പറഞ്ഞു.

ബി.ജെ.പി. സംസ്ഥാന അധ്യക്ഷന്‍ കെ. സുരേന്ദ്രനെ ജയരാജന്‍ രൂക്ഷമായി വിമര്‍ശിക്കുകയും ചെയ്തു. ഗണപതിയെ മിസ് ചെയ്യരുത് ഗണപതിയെ ഉപയോഗിക്കണം എന്ന് അണികളോട് ആഹ്വാനം ചെയ്യുമ്പോള്‍ അദ്ദേഹം ശബരിമലയെ ഓര്‍മപ്പെടുത്തുകയും ചെയ്യുന്നുണ്ട്, ജയരാജന്‍ പറഞ്ഞു. ശബരിമല ബി.ജെ.പിയ്ക്ക് ഗുണം ചെയ്തില്ലെന്ന് അദ്ദേഹം സമ്മതിക്കുന്നു. ബി.ജെ.പി. രണ്ടു സീറ്റില്‍ മത്സരിപ്പിച്ച സ്ഥാനാര്‍ഥിയാണ് സുരേന്ദ്രന്‍. രണ്ടിടത്തും തോറ്റു. മുന്‍പ് കിട്ടിയതിനെക്കാള്‍ വോട്ട് കിട്ടിയതുമില്ല. ബി.ജെ.പിയ്ക്ക് ലോക്സഭ തിരഞ്ഞെടുപ്പില്‍ വോട്ട് കുറഞ്ഞു. ഇത് തെളിയിക്കുന്നത് കേരളം മതനിരപക്ഷേ രാഷ്ട്രീയത്തിന് ശക്തമായ അടിത്തറയുള്ള സംസ്ഥാനമാണ് എന്നാണ്. അവിടെ സുരേന്ദ്രന്റെ പൊടിക്കയ്യൊന്നും വിജയിക്കില്ല, ജയരാജന്‍ പറഞ്ഞു.

വര്‍ഗീയവത്കരണനയം കേരളം തിരസ്‌കരിക്കും. ശ്രീനാരായണ ഗുരു അടക്കമുള്ള നവോത്ഥാന നായകര്‍ ഉയര്‍ത്തിയിട്ടുള്ള മൂല്യങ്ങളെ ഉയര്‍ത്തിപ്പിടിച്ചുകൊണ്ട് കേരളം മുന്നോട്ടുപോകും. അതില്‍ ഞങ്ങള്‍ക്ക് ഒരു പ്രയാസവുമില്ല. ഗണപതിയെ പിടിച്ച് സ്പീക്കറിനെതിരേ ഇവര്‍ പ്രകോപന മുദ്രാവാക്യം വിളിച്ച് രംഗത്തുവന്നത് മറ്റൊന്നിനുമായിരുന്നില്ല, ലോക്സഭാ തിരഞ്ഞെടുപ്പില്‍ വോട്ട് തട്ടാനാണെന്ന് ജനങ്ങള്‍ക്ക് ബോധ്യപ്പെട്ടു. ഇത് സുരേന്ദ്രന്‍ ആവര്‍ത്തിച്ചതോടെ, അണികള്‍ക്ക് നല്‍കിയ സന്ദേശം പുറത്തുവന്നതാണെങ്കിലും അത് ഒരു കാര്യം വ്യക്തമാക്കി. ഗണപതിയെ അവര്‍ വിശ്വാസത്തിന്റെ ഭാഗമായല്ല പിടിക്കുന്നത്, വോട്ടിനുള്ള ഒരു തന്ത്രമായാണെന്ന്, ജയരാജന്‍ പറഞ്ഞു.

ഏതായാലും സംഘപരിവാറും സിപിഎമ്മും കുളംകലക്കി മീന്‍പിടുത്തമാണ് നടത്തുന്നത്. ഇരുകൂട്ടരുടേയും ലക്ഷ്യം വിശ്വാസമല്ല മറിച്ച് വോട്ട് തന്നെയാണ്. ശബരിമല സമയത്തും ഇത് തന്നെയാണ് നടന്നത്. വിശ്വാസത്തെ കേറിത്തോണ്ടി പണി മേടിച്ച സിപിഎമ്മും അത് അവസരമാക്കുന്ന ബിജെപിയും വല്ലാത്ത നന്മ മരങ്ങള്‍ തന്നെ. ശാസ്ത്രം ശാസ്ത്രമായും മിത്ത് മിത്തായും വിശ്വാസസം വിശ്വാസമായും കാണുന്ന ഒരു വിഭാഗം ജനങ്ങള്‍ ഇവിടെ ഉണ്ട്. അവരുടെ അടുത്ത് നിങ്ങളുടെ ഈ പരിപ്പ് വേവൂല്ല. രാഷ്ട്രീയക്കാര്‍ ഈ തൊട്ടിത്തരം നിര്‍ത്തിയേക്ക്. അതായത് പുര കത്തുമ്പോള്‍ അതില്‍ നിന്ന് കഴുക്കോല്‍ ഊരിയെടുക്കുന്ന ഏര്‍പ്പാട്.