തിരുവല്ല പരുമലയില്‍ നഴ്‌സിന്റെ വേഷത്തില്‍ എത്തി യുവതിയെ സിറിഞ്ച് ഉപയോഗിച്ച് കൊലപ്പെടുത്താന്‍ ശ്രമിച്ച സംഭവത്തില്‍ ആക്രണത്തിനിരയായ യുവതിയുടെ ഭര്‍ത്താവിനെ പൊലീസ് വീണ്ടും ചോദ്യം ചെയ്തു. കായംകുളം പുല്ലുകുളങ്ങര കണ്ടല്ലൂര്‍ വെട്ടത്തില്‍ കിഴക്കേതില്‍ അനുഷയാണ് പരുമല സെന്റ് ഗ്രിഗോറിയോസ് ആശുപത്രിയില്‍ പ്രസവശേഷം കുഞ്ഞിന്റെ ചികിത്സയ്ക്കായി കഴിഞ്ഞ കരിയിലക്കുളങ്ങര അയിരുവിളയില്‍ സ്‌നേഹയെ വെള്ളിയാഴ്ച കൊലപ്പെടുത്താന്‍ ശ്രമിച്ചത്. സ്‌നേഹയുടെ ഭര്‍ത്താവ് അരുണിനെയാണ് പുളിക്കീഴ് പൊലീസ് ഇന്ന് വീണ്ടും ചോദ്യംചെയ്തത്.

അരുണിനെ സ്വന്തമാക്കാനാണ് സ്‌നേഹയെ കൊല്ലാന്‍ ശ്രമിച്ചതെന്ന് അനുഷ പറഞ്ഞിരുന്നു. അനുഷയുമായി സുഹൃത്ത് ബന്ധം മാത്രമാണ് ഉണ്ടായിരുന്നതെന്ന് അരുണ്‍ നേരത്തെ പൊലീസിന് മൊഴി നല്‍കിയിരുന്നു. ചില സംശയങ്ങള്‍ ദൂരീകരിക്കാനാണ് അരുണിനെ വീണ്ടും ചോദ്യം ചെയ്തത്. അനുഷയുമായുള്ള ബന്ധം, കൊലപാതകത്തിന് മുമ്പ് അനുഷ അരുണിനയച്ച മെസേജുകള്‍ തുടങ്ങിയവയെക്കുറിച്ചുള്ള വിവരങ്ങള്‍ പൊലീസ് ശേഖരിച്ചു. ആദ്യത്തെ ചോദ്യം ചെയ്യലില്‍ പറഞ്ഞ കാര്യങ്ങള്‍ തന്നെയാണ് അരുണ്‍ ഇന്നും ആവര്‍ത്തിച്ചത്. കേസുമായി ബന്ധപ്പെടുത്തുന്ന യാതൊരു വിവരങ്ങളും ലഭിക്കാത്തതിനാല്‍ അരുണിനെ വിട്ടയച്ചു. ആവശ്യമെങ്കില്‍ വീണ്ടും ചോദ്യംചെയ്യലിന് ഹാജരാകണമെന്ന് നിര്‍ദ്ദേശിച്ചിട്ടുണ്ട്.

അനുഷ മാത്രമാണ് നിലവിലുള്ള പ്രതി. ഇവര്‍ മാവേലിക്കര സബ് ജയിലില്‍ റിമാന്‍ഡിലാണ്. അനുഷയെ കസ്റ്റഡിയില്‍ വിട്ടുകിട്ടുന്നതിനായി പൊലീസ് നാളെ കോടതിയില്‍ അപേക്ഷ നല്‍കും. അനുഷയുടെയും അരുണിന്റെയും ഫോണുകള്‍ പരിശോധിക്കാനുള്ള നീക്കത്തിലാണ് പൊലീസ്. കോടതിയുടെ അനുമതിയോടെ ഫോണുകള്‍ ശാസ്ത്രീയ പരിശോധനയ്ക്ക് ഫോറന്‍സിക് ലാബില്‍ അയയ്ക്കുമെന്ന് ഡിവൈ.എസ്.പി അഷാദ് പറഞ്ഞു.