എറണാകുളം കൂത്താട്ടുകുളത്ത് അയല്‍വാസിയെ വീട്ടില്‍ കയറി കുത്തിക്കൊന്ന കേസിലെ പ്രതി പിടിയിലായി. മണക്കാട്ടുതാഴം മഹേഷിനെ (44) യാണ് കൂത്താട്ടുകുളം പൊലീസ് പിടികൂടിയത്. തിങ്കളാഴ്ച വൈകുന്നേരം ഏഴു മണിയോടെയായിരുന്നു സംഭവമുണ്ടായത്.

പിറവം തിരുമാറാടി കാക്കൂര്‍ പാലച്ചുവട് ലക്ഷംവീട് കോളനിയില്‍ കല്ലുവളവിങ്കല്‍ സോണിയാണ് (32) കൊല്ലപ്പെട്ടത്. ജോലി കഴിഞ്ഞ് വീട്ടിലെത്തിയ സോണിയെ മഹേഷ് വീട്ടില്‍ നിന്നും വിളിച്ചിറക്കി കുത്തുകയായിരുന്നു.തലയ്ക്കും നെഞ്ചിനും കുത്തേറ്റ സോണിയെ നാട്ടുകാര്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. ഞായറാഴ്ചയും സോണിയെ മഹേഷ് വീട്ടില്‍ കയറി ഭീഷണിപ്പെടുത്തിയിരുന്നതായി സൂചനകളുണ്ട്.