കരുവന്നൂര്‍ കള്ളപ്പണ കേസില്‍ മുന്‍ ഭരണസമിതി അംഗങ്ങളെ മാപ്പുസാക്ഷിയാക്കാന്‍ ഇ.ഡി നീക്കം
കരുവന്നൂര്‍ കള്ളപ്പണ കേസില്‍ പാര്‍ട്ടി നേതാക്കളെ പൂട്ടാന്‍ കരുനീക്കവുമായി എന്‍ഫോഴ്‌സ്‌മെന്റ് ഡയറക്ടറേറ്റ്. ബാങ്കിന്റെ രണ്ട് മുന്‍ ഭരണസമിതി അംഗങ്ങളെ മാപ്പുസാക്ഷിയാക്കുന്നത് അടക്കം തന്ത്രങ്ങളാണ് ഇ.ഡി കൈക്കൊള്ളുന്നത്. സാക്ഷികള്‍ സ്വാധീനിക്കപ്പെടുമെന്നതിനാല്‍ അതിരഹസ്യമായാണ് നീക്കം. ഇതിനായി കോടതിയെ സമീപിച്ചു. കരുവന്നൂര്‍ ബാങ്ക് അനുവദിച്ച ബിനാമി വായ്പകളെല്ലാം ഉന്നത നേതാക്കളുടെ അറിവോടെയായിരുന്നെന്നാണ് ഇ.ഡിക്ക് ലഭിച്ച വിവരം. ബാങ്ക് സെക്രട്ടറി സുനില്‍, മുന്‍ മാനേജര്‍ ബിജു കരീം എന്നിവര്‍ ഇതുസംബന്ധിച്ച് നേരത്തേ മൊഴി നല്‍കിയിരുന്നു.
സി.പി.എമ്മിന്റെ സമാന്തര കമ്മിറ്റിയാണ് ലോണ്‍ അനുവദിക്കാനുള്ള തീരുമാനങ്ങളെടുത്തതെന്നും ഈ തീരുമാനത്തില്‍ ഭരണസമിതിക്ക് റോളൊന്നും ഉണ്ടായിരുന്നില്ലെന്നുമാണ് മൊഴി. കള്ളപ്പണ ഇടപാട് ഘട്ടത്തില്‍ 13 അംഗ ഭരണസമിതിയാണ് ഉണ്ടായിരുന്നത്. മുന്‍ മാനേജര്‍ ബിജു കരീമിന്റെ ആവശ്യപ്രകാരം ലോണ്‍ രേഖകളില്‍ ഒപ്പിട്ട് നല്‍കിയിരുന്നതായും അപേക്ഷയില്‍ പലതിലും വിവരങ്ങളൊന്നും ഉണ്ടായിരുന്നില്ലെന്നും ഭരണസമിതി അംഗങ്ങളില്‍ ചിലര്‍ മൊഴി നല്‍കിയിട്ടുണ്ട്. ഇവരില്‍ രണ്ടു പേരെയാണ് മാപ്പുസാക്ഷിയാക്കാന്‍ ഇ.ഡി കോടതിയെ സമീപിച്ചിട്ടുള്ളത്.
കുറ്റപത്രം സ്വീകരിക്കല്‍ നടപടി പൂര്‍ത്തിയായാല്‍ ഇവരുടെ മൊഴി രേഖപ്പെടുത്തും. കേസില്‍ അന്വേഷണം നേരിടുന്ന സി.പി.എം സംസ്ഥാന കമ്മിറ്റി അംഗങ്ങളായ എ.സി. മൊയ്തീന്‍, കെ. കണ്ണന്‍ എന്നിവര്‍ക്ക് ഈ മൊഴികള്‍ നിര്‍ണായകമാണ്. സി.പി.എം ജില്ല സെക്രട്ടറി എം.കെ. വര്‍ഗീസിന് ഈ മാസം 24ന് ഹാജരാകാന്‍ നോട്ടീസ് നല്‍കിയിട്ടുണ്ട്.
https://www.facebook.com/Malayalivartha
