ഡല്‍ഹിയില്‍ ബഹുനിലക്കെട്ടിടം തകര്‍ന്നുവീണുണ്ടായ അപകടത്തില്‍ ഒട്ടേറെപ്പേര്‍ കുടുങ്ങിക്കിടക്കുന്നതായി വിവരം. തെക്കന്‍ ഡല്‍ഹിയിലെ സാകേത് മെട്രോ സ്‌റ്റേഷനു സമീപം സൈദുല്ലാജാബിലുള്ള കെട്ടിടമാണ് ശനിയാഴ്ച വൈകിട്ട് തകര്‍ന്നുവീണത്. അവശിഷ്ടങ്ങള്‍ക്കുള്ളില്‍ ആളുകള്‍ കുടുങ്ങിക്കിടക്കുന്നുവെന്ന് കരുതുന്നതായി ഡല്‍ഹി അഗ്‌നിരക്ഷാസേന ഉദ്യോഗസ്ഥര്‍ പറഞ്ഞു.

അഗ്‌നിരക്ഷാസേനയുടെ അഞ്ച് യൂണിറ്റുകള്‍ രക്ഷാപ്രവര്‍ത്തനത്തിനായി സ്ഥലത്തെത്തിയിട്ടുണ്ട്. വൈകിട്ട് ഏഴേമുക്കാലോടെയാണ് അപകടമുണ്ടായി എന്ന വിവരം തങ്ങള്‍ക്ക് ലഭിച്ചതെന്ന് അഗ്‌നിരക്ഷാ ഉദ്യോഗസ്ഥര്‍ പറഞ്ഞു. മൂന്നുനിലക്കെട്ടിടത്തിന്റെ താഴത്തെ നിലയില്‍ കോച്ചിങ് സെന്റര്‍ പ്രവര്‍ത്തിച്ചിരുന്നതായി പൊലീസ് വൃത്തങ്ങള്‍ പറഞ്ഞു. മുകളിലത്തെ നിലകളുടെ നിര്‍മാണം നടന്നുവരുകയായിരുന്നു. കുടുങ്ങിയവര്‍ വിദ്യാര്‍ഥികളാണോയെന്ന് സംശയമുണ്ടെന്നും അധികൃതര്‍ കൂട്ടിച്ചേര്‍ത്തു.