ഐപിഎല്‍ ആവേശപ്പോരാട്ടത്തില്‍ ചെന്നൈ വീണുടഞ്ഞു. സ്വന്തം തട്ടകത്തില്‍ തോല്‍വിയേറ്റുവാങ്ങി ചെന്നൈ. തകര്‍പ്പന്‍ സെഞ്ചറിയുമായി മാര്‍കസ് സ്റ്റോയിനിസ് കളം നിറഞ്ഞതോടെ ഐപിഎല്‍ പോരാട്ടത്തില്‍ ചെന്നൈയ്‌ക്കെതിരെ ലക്‌നൗവിന് 6 വിക്കറ്റിന്റെ ജയം. 63 പന്തില്‍ 124 റണ്‍സാണു സ്റ്റോയിനിസ് അടിച്ചുകൂട്ടിയത്.

6 സിക്‌സും 13 ഫോറും ഉള്‍പ്പെട്ട ഇന്നിങ്‌സ് ലക്‌നൗവിന്റെ നെടുംതൂണായി. സ്‌കോര്‍: ചെന്നൈ 20 ഓവറില്‍ 4 വിക്കറ്റ് നഷ്ടത്തില്‍ 210 റണ്‍സ്. ലക്‌നൗ: 19.3 ഓവറില്‍ 4 വിക്കറ്റ് നഷ്ടത്തില്‍ 213. മറുപടി ബാറ്റിങ്ങിന് ഇറങ്ങിയ ലക്‌നൗ നിരയില്‍ നിക്കോളാസ് പുരാന്‍ (34), ദീപക് ഹൂഡ (17), കെ.എല്‍.രാഹുല്‍ (16), ദേവദത്ത് പടിക്കല്‍ (13) എന്നിവരും മികച്ച പ്രകടനമായിരുന്നു. ക്യാപ്റ്റന്‍ ഋതുരാജ് ഗെയ്ക്വാദിന്റെ ബാറ്റിങ് കരുത്തില്‍ ലക്‌നൗവിന് 211 റണ്‍സ് വിജയലക്ഷ്യമാണു ചെന്നൈ കുറിച്ചത്.

60 പന്തില്‍നിന്ന് 108 റണ്‍സുമായി പുറത്താകാതെ നിന്ന ഗെയ്ക്വാദിനു അതേനാണയത്തില്‍ മറുപടി നല്‍കി സ്റ്റോയിനിസ് വിജയം സ്വന്തമാക്കി. ചെന്നൈ നിരയില്‍ 27 പന്തില്‍നിന്ന് 66 റണ്‍സുമായി ശിവം ദുബെ ക്യാപ്റ്റനു പിന്തുണ നല്‍കി. നേരിട്ട ഏക ബോള്‍ ബൗണ്ടറിയിലേക്ക് പായിച്ച് മുന്‍ ക്യാപ്റ്റന്‍ എം.എസ്.ധോണിയും പങ്കുചേര്‍ന്നു. രവീന്ദ്ര ജഡേജ (16), ഡാരിയല്‍ മിച്ചല്‍ (11), അജിന്‍ക്യ രഹാനെ (1) എന്നിങ്ങനെയാണു മറ്റുള്ളവരുടെ സമ്പാദ്യം. 4 ഓവറില്‍ 28 റണ്‍സ് വിട്ടുകൊടുത്ത മാറ്റ് ഹെന്റി, 4 ഓവറില്‍ 50 റണ്‍സ് വഴങ്ങിയ മൊഹ്‌സിന്‍ ഖാന്‍, 4 ഓവറില്‍ 47 റണ്‍സ് വിട്ടുകൊടുത്ത യാഷ് താക്കൂര്‍ എന്നിവര്‍ ലക്‌നൗവിനായി ഓരോ വിക്കറ്റ് വീതം വീഴ്ത്തി.

4 ഓവറില്‍ 35 റണ്‍സ് വിട്ടുകൊടുത്ത മതീഷ പതിരാന ചെന്നൈയ്ക്കായി 2 വിക്കറ്റ് വീഴ്ത്തി. മുസ്താഫിസുര്‍ റഹ്‌മാനും ദീപക് ചാഹറും ഓരോ വിക്കറ്റ് വീതവും നേടി. ലക്‌നൗവുമായുള്ള കഴിഞ്ഞ കളിയുടെ കടം വീട്ടാനുറച്ചാണു ചിദംബരം സ്റ്റേഡിയത്തില്‍ ചെന്നൈ ടീം ഇറങ്ങിയതെങ്കിലും നിരാശരായാണു മടങ്ങുന്നത്. ടോസ് നേടിയ ലക്‌നൗ ഫീല്‍ഡിങ് തിരഞ്ഞെടുത്തതോടെ ചെന്നൈ ബാറ്റിങ് വെടിക്കെട്ടിനു തിരികൊളുത്തി. എന്നാല്‍ മറുപടി ബാറ്റിങ്ങില്‍ സ്റ്റോയിനിസ് കത്തിക്കയറിയതോടെ ചെന്നൈയുടെ ആരാധക മഞ്ഞപ്പട നിരാശരായി.

ക്യാപ്റ്റന്‍സി കൈമാറിയെങ്കിലും ടീമിലെ തന്റെ റോള്‍ ഇപ്പോഴും മനോഹരമായാണ് ചെന്നൈ സൂപ്പര്‍ കിങ്‌സ് താരം എം.എസ്.ധോണി കൈകാര്യം ചെയ്യുന്നത്. വിക്കറ്റ് കീപ്പിങ്ങിലും ബാറ്റിങ്ങിലെ ഫിനിഷര്‍ റോളിലും 17ാം സീസണിലും തകര്‍ത്താടുകയാണ് ചെന്നൈ ആരാധകരുടെ 'തല'.

ഈ സീസണില്‍ 5 ഇന്നിങ്‌സില്‍ മാത്രമാണ് ധോണി ബാറ്റിങ്ങിനിറങ്ങിയത്. 255.88 സ്‌ട്രൈക്ക് റേറ്റില്‍ 87 റണ്‍സാണ് താരം നേടിയത്. ഒരിക്കല്‍ പോലും വിക്കറ്റ് നഷ്ടപ്പെടുത്തിയിട്ടുമില്ല. ഡെത്ത് ഓവറുകളില്‍ ഇപ്പോഴും ബോളര്‍മാര്‍ക്ക് പേടിസ്വപ്നമായ ധോണിയുടെ മികച്ച ഫോമിനു പിന്നിലെ രഹസ്യം വെളിപ്പെടുത്തിയിരിക്കുകയാണ് ചെന്നൈ ടീമിന്റെ ബാറ്റിങ് കോച്ച് മൈക്കല്‍ ഹസി.

ഐപിഎല്‍ സീസണ്‍ ആരംഭിക്കുന്നതിനു മാസങ്ങള്‍ക്കു മുന്‍പുതന്നെ ധോണി പരിശീലനം ആരംഭിച്ചിരുന്നു. വളരെ ആസ്വദിച്ച് ക്രിക്കറ്റ് കളിക്കാന്‍ ഇഷ്ടപ്പെടുന്നയാളാണ് എംഎസ്. ഓരോ മത്സരത്തിലും അദ്ദേഹത്തിനെതിരെ വ്യത്യസ്ത പ്ലാനുകളുമായാണ് ബോളര്‍മാര്‍ എത്തുന്നത്. കാരണം 42ാം വയസ്സിലും മികച്ച ഫിനിഷറായി തുടരുകയാണ് അദ്ദേഹം. ഒരുപക്ഷേ എക്കാലത്തെയും മികച്ച ഫിനിഷര്‍ തന്നെയാവും ധോണി. ഓരോ ദിവസവും അദ്ദേഹത്തിന്റെ ബാറ്റിങ് കൂടുതല്‍ കരുത്തുറ്റതാവുകയാണെന്ന് ഹസി പറഞ്ഞു.

ചൊവ്വാഴ്ച ഹോംഗ്രൗണ്ടില്‍ ലക്‌നൗ സൂപ്പര്‍ ജയന്റ്‌സിനെ നേരിടുന്നതിനു മുന്നോടിയായാണ് ഹസി ഇക്കാര്യം പറഞ്ഞത്. സീസണിലെ എട്ടാം മത്സരത്തിനാണ് ചെന്നൈയും ലക്‌നൗവും ഇറങ്ങിയത്.