തങ്ങളുടെ കൂട്ടത്തില്‍ നിന്നൊരാള്‍ കേന്ദ്രമന്ത്രിയായതില്‍ ഏറെ അഭിമാനമുണ്ടെന്ന് നിര്‍മ്മാതാവ് സുരേഷ് കുമാര്‍. എന്തുകാര്യം പറഞ്ഞാലും ചെയ്തുതരാന്‍ മനസുള്ളയാളാണ് സുരേഷ് ഗോപി. സഹപ്രവര്‍ത്തകരും കൂട്ടുകാരും ചേര്‍ന്ന് സുരേഷ് ഗോപിക്ക് തിരുവനന്തപുരത്തു വച്ചു നടത്തിയ സ്വീകരണ ചടങ്ങില്‍ സംസാരിക്കുയായിരുന്നു അദ്ദേഹം. ഐ.ടി ഡിപ്പാര്‍ട്ടുമെന്റുമായി ബന്ധപ്പെട്ട് അടുത്തിടെയുണ്ടായ സംഭവവും സുരേഷ് കുമാര്‍ വിശദീകരിച്ചു. വോയിസ് മെസേജ് മാത്രമാണ് സുരേഷ് ഗോപിക്ക് അയച്ചത്. മണിക്കൂറുകള്‍ക്കുള്ളില്‍ ഐടി മിനിസ്റ്ററുടെ പ്രൈവറ്റ് സെക്രട്ടറി കാര്യം തിരക്കി വിളിച്ചു. വൈകാതെ പരിഹാരമുണ്ടാവുകയും ചെയ്തു.

വടക്കന്‍ വീരഗാഥയുടെ ഷൂട്ടിംഗ് നടക്കുന്ന സമയത്ത് ഒരുദിവസം സുരേഷ് ഗോപി എന്നോട് പറഞ്ഞു ഗുരുവായൂര്‍ ക്ഷേത്രത്തില്‍ പോയി 108 തവണ പ്രദക്ഷിണം വയ്ക്കാമെന്ന്. ഞാന്‍ സമ്മതിച്ചു. അങ്ങനെ ഞങ്ങള്‍ പോയി. വളരെ എളുപ്പമാണെന്നാണ് ഞാന്‍ കരുതിയത്. പക്ഷേ തുടങ്ങിയപ്പോഴല്ലേ മനസിലായത് എളുപ്പമല്ല കാര്യമെന്ന്. എട്ടു തവണ കഴിഞ്ഞപ്പോള്‍ തന്നെ ഞാന്‍ തളര്‍ന്നു. ഒടുവില്‍ പൂര്‍ത്തിയായപ്പോള്‍ കാലൊക്കെ പൊള്ളി. സുരേഷിന് ഒരുകുഴപ്പവുമുണ്ടായില്ല.

കമ്മിഷണര്‍' ചെയ്യുന്നത് വരെ ജീവിതത്തില്‍ 'പോടാ' എന്നൊരു വാക്ക് പോലും താന്‍ ഉപയോഗിച്ചിട്ടില്ലെന്ന് മറുപടി പ്രസംഗത്തില്‍ സുരേഷ് ഗോപി വ്യക്തമാക്കി. എന്തൊരു നല്ല പൊന്നുമോന്‍ ആയിരുന്നു ഇവനെന്ന് അമ്മ ഇപ്പോഴും പറയും. എന്നെ തല്ലാന്‍ ആളെ അയച്ചിട്ടുള്ള ആളാണ് സുരേഷ്‌കുമാര്‍, അതും ചെയ്യാത്ത തെറ്റിന്. എന്റെ തല്ലു കൊള്ളാന്‍ പറ്റില്ല എന്ന് പറഞ്ഞവരുടെ തല്ലല്ല, അവരോടൊപ്പം സ്‌ക്രീന്‍ സ്‌പേസ് ഷെയര്‍ ചെയ്യാന്‍ ബുദ്ധിമുട്ടാണ് എന്നാണ് ഞാന്‍ പറഞ്ഞത്. അത് ഇനിയും അങ്ങനെ തന്നെ. അത് മാത്രമാണ് അന്ന് നടന്നത്. അത് പറഞ്ഞതിന് അന്ന് റഹ്മാനെ പൊക്കിക്കൊണ്ട് നടന്ന സുരേഷ് കുമാര്‍ ആണ് ഇന്ന് കേരളത്തില്‍ മുഴുവന്‍ എന്റെ ഇരട്ട സഹോദരനായി അറിയപ്പെടുന്ന ഈ സുരേഷ് കുമാറെന്നും സുരേഷ് ഗോപി പറഞ്ഞു.

അന്ന് റൂമിനകത്ത് പേടിച്ചിരുന്നു ഫോണ്‍ എടുത്ത് ഞാന്‍ ഒരു തെറ്റും ചെയ്തിട്ടില്ല എന്ന് പറഞ്ഞ ഇടത്തുനിന്ന് കമ്മിഷണറിലൂടെ ഞാന്‍ പരിണമിച്ചു വന്നെങ്കില്‍ ഇന്ന് സുരേഷ് കുമാര്‍ എന്നെ തല്ലാന്‍ ആളുകളെ വിട്ടാല്‍ ആ ആളുകളെയും ഞാന്‍ തല്ലി ഓടിക്കും, സുരേഷ് കുമാറിന്റെ നെഞ്ചും താന്‍ ഇടിച്ചു തകര്‍ക്കുമെന്നും സുരേഷ് തമാശ പൊട്ടിച്ചു.