പന്ത്രണ്ട് കിലോമീറ്റര് തോട് വൃത്തിയാക്കാന് 12 കോടി... ആമയിഴഞ്ചാന് തോട് ശുചീകരണത്തിനായി അനുവദിച്ച കോടികള് എന്ത് ചെയ്തു?
ആമയിഴഞ്ചാന് തോട് ശുചീകരണത്തിനായി അനുവദിച്ച കോടികള് എന്ത് ചെയ്തുവെന്ന് തദ്ദേശവകുപ്പ് മന്ത്രിയും ജലസേചന മന്ത്രിയും മേയറും ഉത്തരം നല്കണമെന്ന് മുന് കേന്ദ്രമന്ത്രി വി. മുരളീധരന്. ബിജെപി തിരുവനന്തപുരം ജില്ലാ കമ്മിറ്റി നഗരസഭാ കാര്യാലയത്തിലേക്ക് സംഘടിപ്പിച്ച മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം. പന്ത്രണ്ട് കിലോമീറ്റര് തോട് വൃത്തിയാക്കാന് ബജറ്റില് നീക്കി വച്ച 12 കോടി എവിടെ പോയി എന്നതില് വിശദീകരണം വേണമെന്ന് മുരളീധരന് പറഞ്ഞു.
ജോയിയുടെ മരണത്തില് റെയില്വെയെ പഴിചാരി തടിയൂരാനുള്ള ശ്രമം ജനം പുച്ഛിച്ച് തള്ളുമെന്നും അദ്ദേഹം പറഞ്ഞു.മാലിന്യം തടയുന്നതിനായി റെയില്വേയുടെ പ്രദേശത്തേക്കു കടക്കുന്ന തോടിന്റെ ഭാഗത്ത് ഇരുമ്പുവലയും ഇരുമ്പുവേലിയും സ്ഥാപിച്ചിട്ടുണ്ട്. ബാക്കി ഭാഗങ്ങളില് നഗരസഭ എന്ത് ചെയ്തു എന്ന് വിശദീകരിക്കണം.മേയര്ക്ക് കമ്പം കാറോട്ടത്തിലാണെന്ന് മുരളീധരന് പരിഹസിച്ചു. കാറിന്റെ പിന്നിലിരുന്ന് കെഎസ്ആര്ടിസി ഡ്രൈവറുടെ ആക്ഷന് കാണുന്ന മേയര് കണ്മുന്നിലെ മാലിന്യ കൂമ്പാരം കാണില്ല.
തദ്ദേശവകുപ്പ് മന്ത്രി അന്താരാഷ്ട്ര വിഷയങ്ങളില് ഫേസ്ബുക്ക് പോസ്റ്റ് ഇട്ടാല് മാത്രം പോരാ. സാധാരണക്കാരുടെ വിഷയങ്ങളില് പരിഹാരം കണ്ടെത്തണമെന്ന് മുരളീധരന് ഓര്മിപ്പിച്ചു. ക്ഷേമ പെന്ഷന് കൊടുക്കാന് ഇല്ലാത്ത കാലത്തും കുടുംബസമേതം വിദേശയാത്ര പോയ വ്യക്തിയാണ് എം. ബി. രാജേഷ്. വിനോദസഞ്ചാരം നടത്തി മടങ്ങിയാല് പോര വിദേശരാജ്യങ്ങളിലെ നഗരപരിപാലനം കൂടി കണ്ണു തുറന്ന് കാണണമെന്നും വി. മുരളീധരന് കൂട്ടിച്ചേര്ത്തു.
https://www.facebook.com/Malayalivartha
