ആറ്റുകാല്‍ പൊങ്കാല മഹോല്‍സവത്തോടനുബന്ധിച്ചു തിരുവനന്തപുരം നഗരസഭ പരിധിയില്‍ വരുന്ന കച്ചവടസ്ഥാപനങ്ങള്‍, ഹോട്ടലുകള്‍, റെസ്റ്ററന്റുകള്‍, ബേക്കറികള്‍ എന്നിവ ഉള്‍പ്പെടെയുള്ള ഭക്ഷ്യസാധനങ്ങള്‍ വില്‍ക്കുന്നവരും ഉല്‍പാദിപ്പിക്കുന്നവരും ഭക്ഷ്യസുരക്ഷാ മാനദണ്ഡങ്ങള്‍ കര്‍ശനമായി പാലിക്കുന്നുണ്ടെന്ന് ഉറപ്പുവരുത്തണമെന്നു ഭക്ഷ്യസുരക്ഷാ കമ്മിഷണര്‍ ടി.വി. അനുപമ ഐഎഎസ് അറിയിച്ചു.

ഉല്‍സവവുമായി ബന്ധപ്പെട്ട് അന്നദാനം നടത്തുന്നവരും താല്‍ക്കാലിക വില്‍പന നടത്തുന്നവരും നിര്‍ബന്ധമായും ഭക്ഷ്യസുരക്ഷാ രജിസ്‌ട്രേഷന്‍ എടുക്കേണ്ടതാണ്. കൂടുതല്‍ വിവരങ്ങള്‍ക്ക് 89433 46526 എന്ന നമ്പറിലോ അടുത്തുള്ള അക്ഷയകേന്ദ്രങ്ങളുമായോ ബന്ധപ്പെടാവുന്നതാണ്. രജിസ്‌ട്രേഷന്‍ എടുക്കുന്നവര്‍ക്കു മാത്രമേ പ്രവര്‍ത്തനാനുമതി ലഭിക്കുകയുള്ളു. എല്ലാ അക്ഷയകേന്ദ്രങ്ങള്‍ വഴിയും ഭക്ഷ്യസുരക്ഷാ റജിസ്‌ട്രേഷന്‍ നടത്താവുന്നതാണ്.
ഉല്‍സവവുമായി ബന്ധപ്പെട്ടു കൃത്രിമ നിറങ്ങളും കൃത്രിമ മധുരപദാര്‍ഥങ്ങളും ചേര്‍ത്ത് ജ്യുസ്, ഐസ് മിഠായി എന്നിവ വില്‍പന നടത്തുവാനുള്ള സാഹചര്യം ശ്രദ്ധയില്‍പ്പെട്ടിട്ടുണ്ട്. ഇപ്രകാരം ചെയ്യുന്നതില്‍ നിന്ന് എല്ലാ വ്യാപാരികളും താല്‍ക്കാലിക കച്ചവടക്കാരും ഒഴിഞ്ഞുനില്‍ക്കണമെന്ന് അറിയിക്കുന്നു. ഇപ്രകാരം ചെയ്യുന്നത് അഞ്ചു ലക്ഷം രൂപ പിഴയും ആറു മാസം വരെ തടവുശിക്ഷയും ലഭിക്കാവുന്ന ക്രിമിനല്‍ കുറ്റകൃത്യമാണ്. പഞ്ഞി മിഠായി, ഐസ് മിഠായി എന്നിവ വാങ്ങി കഴിക്കാതിരിക്കാന്‍ പൊതുജനങ്ങള്‍ ശ്രദ്ധിക്കേണ്ടതാണ്.
ഉല്‍സവകാലത്തു ഭക്ഷ്യ വില്‍പന സ്ഥാപനങ്ങളുടെ പ്രവര്‍ത്തനങ്ങള്‍ മെച്ചപ്പെടുത്തുന്നതിനായി തിരുവനന്തപുരം ജില്ലാ ഫുഡ് സേഫ്റ്റി അസിസ്റ്റന്റ് കമ്മിഷണറുടെയും ഇന്റലിജന്‍സിന്റെയും പ്രത്യേക സ്‌ക്വാഡുകളെ വിന്യസിക്കുന്നതാണെന്നു ഫുഡ് സേഫ്റ്റി കമ്മിഷണര്‍ അറിയിച്ചു. സുരക്ഷിതമായ ആഹാരം എല്ലാവര്‍ക്കും ലഭിക്കുന്നതിനായി ഫുഡ് സേഫ്റ്റി ഡിപ്പാര്‍ട്ട്‌മെന്റ് സ്വീകരിക്കുന്ന നടപടികളോടു കച്ചവടക്കാരും പൊതുജനങ്ങളും ഭക്തജനങ്ങളും പൂര്‍ണമായും സഹകരിക്കണമെന്നു ഫുഡ് സേഫ്റ്റി കമ്മിഷണര്‍ അറിയിച്ചു.

ഭക്ഷ്യസുരക്ഷയുമായി ബന്ധപ്പെട്ട എല്ലാ പരാതികളും 1800 425 1125 എന്ന ടോള്‍ഫ്രീ നമ്പറിലോ 89433 41130, 89433 46526, 89433 46529, 89433 46195 തുടങ്ങിയ നമ്പറുകളിലോ അറിയിക്കാവുന്നതാണ്. പൊങ്കാല മഹോല്‍സവത്തോടനുബന്ധിച്ചു ഫുഡ് സേഫ്റ്റി കണ്‍ട്രോള്‍ റൂം ആറ്റുകാല്‍ ട്രസ്റ്റ് ഓഫിസില്‍ പ്രവര്‍ത്തനമാരംഭിക്കുന്നതായിരിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha